ZAJ NYEEM HNUB TIM 15 LUB 1 HLIS 2025
HNUB PLAUB THAWJ LUB LIS PIAM, CAIJ NYOB NRUAB XYOO
HN 2: 14-18, MK 1: 29-39
Kwv tij Hmoob zoo nyiam, Mas Kos piav tias Huab Tais Yes Xus hnov tias Xis Moos niam tais mob kub cev mas Huab Tais Yes Xus hlub tus niam tais, nws thiaj txav mus tuav niam tais thiab tsa sawv. Tam sim ntawd, tus niam tais tub mob cia li thim hlo, nws zoo siab nws maj zeeg los tsob hwb Huab Tais Yes Xus lawv.
Mas Kos piav ntxiv tias yav tsaus ntuj cov neeg coj lawv cov neeg mob tuaj rau Huab Tais Yes Xus kho. Huab Tais Yes Xus kho lawv kom zoo tas, cov raug dab los Huab Tais Yes Xus kuj ntiab dab tawm tab sis Huab Tais Yes Xus txwv tsis pub cov dab hais dab tsi txog Huab Tais Yes Xus.
Cov dab paub Huab Tais Yes Xus, lawv xav hais txog Huab Tais Yes Xus kom sawv daws yuam kev.
Mas Kos sau piav ntxiv tias Huab Tais Yes Xus sawv ntxov mus teev Ntuj tom ib qho xu kev, ces cov neeg coob tuaj nrhiav Huab Tais Yes Xus tom Xis Moos tsev tab sis tsis pom Huab Tais Yes Xus, ces Xis Moos lawv thiaj tawm tuaj nrhiav Huab Tais Yes Xus.
Kwv tij, nej puas xav tias ua cas cov thwj tim tsis hais txog Huab Tais Yes Xus rau tsoom sid, tsuas hnov hais txog cov dab xav hais txog Huab Tais Yes Xus xwb?
Nyaj tej zaum cov thwj tim tseem paub Huab Tais Yes Xus tsis zoo txaus, los lawv lub siab tseem ua xyem xyav txog Huab Tais Yes Xus. Tos muab hais li no vim yog peb tig rov los ntsia peb tus kheej, mas peb pom muaj li hais. Muaj ntau zaus cov neeg xav paub txog Huab Tais Yes Xus, cov neeg xav los ntseeg txog Huab Tais Yes Xus, lawv tuaj nug dab tsi ntawm peb, mas zoo li peb hais tsis tas los hais tsis meej pes tawg rau lawv vim peb lub siab tseem ua xyam xyav, peb tsis ruaj siab tias xyov kuv hais puas raug los tsis raug.
Tej zaus lub sij hawm ntawd Xis Moos lawv zoo li ntawd vim lawv nyuag qhuav txiav siab raws Huab Tais Yes Xus.
Leej Ntshiab Zes Laus tus txhais phau Ntawv Ntshiab ua lus Las Tis Nas tau hais tias “Tus twg tsis nyeem Ntawv Ntshiab, mas tus ntawd tsis paub Huab Tais Yes Xus.” Lo lus no muaj tseeb tiag. Peb lees tias peb cov neeg ntseeg hauv lub Koom Txoos Kav Tos Liv tsis muab siab nyeem Ntawv Ntshiab npaum li cov neeg ntseeg hauv lub Koom Txoos Plos Tes Taas, ces peb cov Kav Tos Liv thiaj tsis muaj cuab kav tshaj txog lawv kev ntseeg txog Yes Xus cuag li cov Plos Tes Taas. Yog li peb thiaj nquag hnov peb cov Kav Tos Liv hais lo lus yooj yooj yim tias “Ab! Txoj kev tshaj Ntuj Lus yog Txiv Plig txoj hauj lwm as.”
Puas tau txog lub zim txwv peb cov Kav Tos Liv yuav tig los nyeem Ntawv Ntshiab kom ntau dua qub?
Kwv tij, yog peb nyiam Huab Tais Yes Xus mas tsim nyog peb yuav muab siab rau nyeem Tswv Ntuj Lo Lus nyob hauv phau Ntawv Ntshiab vim tias tas nrho phau Ntawv Ntshiab puav leeg hais txog Huab Tais Yes Xus yog tus Cawm lub qab ntuj neeg raws li lo lus hauv tsab ntawv sau mus rau cov Hes Nplaws hnub no hais tias Yes Xus yog tus cawm Has Nplas Has tsoom xeeb ntxwv.
Muaj tej tus hais tias “Kuv nyeem phau Ntawv Ntshiab thaum twg mas kuv tsaug zog ua luaj”, los hais tias “Kuv nyeem npaum cas los tsis to taub li”, tseem muaj tej tus hais tias “Kuv tsis txawj ntawv”.
Xav kom nej cov txawj ntawv mas nej xav tias ‘Hnub no Huab Tais Tswv Ntuj xav hais lus dab tsi nyob hauv phau Ntawv Ntshiab rau kuv ne” ces nej nyeem saib Huab Tais Tswv Ntuj ntuas nej li cas. Yog nej tsis muaj phau Ntawv Ntshiab mas nej hu xov tooj tuaj thov ntawm peb ZOO TSWV ZOV YAJ no tau. Yog nej tsis txawj nyeem los nej nrhiav mloog tau hauv Youtube.
Lub zim txwv no muaj cov phau Ntawv Ntshiab luam tawm ua ntau xeem lus thiab zom ua suab tso hauv Youtube ntau chav rau nej mus mloog.
Vam tias lub Xyoo Ntshiab no peb tsoom neeg ntseeg yuav kub siab thiab muab siab rau rhiav kev kom paub Huab Tais Yes Xus mog.
