ZAJ NYEEM HNUB TIM 14 LUB 5 HLIS 2024
HNUB UA HMOOV LEEJ NTSHIAB MAS THIAS
COV LUS NYOB HAUV ZAM NTAWV MOO ZOO (Z 15: 9-17)
Kwv tij Hmoob sawv daws, Tswv Ntuj hlub peb neeg ntiaj teb, mas Huab Tais Leej Txiv thiaj xa Huab Tais Leej Tub los xeeb ua neeg kom tau nyob nruab nrab hauv ntiaj teb neeg, cia Huab Tais Leej Tub raug txom nyem thiab tuag saum Ntoo Cuam txhiv neeg cov txhaum. Yog vim Tswv Ntuj hlub peb npaum no, mas peb cov ntseeg txog Huab Tais Yes Xus thiaj tau txais kev cawm.
Hnub no Huab Tais Yes Xus thiaj ntuas peb sawv daws tias tsis yog peb xaiv nws, tiam sis yog nws xaiv peb los ua nws cov thwj tim, los txais txoj kev cawm thiab xa txoj kev cawm no mus pub rau lwm tus.
Cov kwv tij Hmoob sawv daws, hnub no lub Koom Txoos ua hmoov Leej Ntshiab Mas Thias, mas yog peb nyeem hauv phau ntawv cov Hauv Paus Xa Lus tej hauj lwm, peb yuav pom tias tas cov neeg ntseeg sib txoos xaiv ib tug Hauv Paus Xa Lus los sawv Yus Das Kas Lis Yaus chaw, lawv teev Ntuj thiab pov ntawv saib txoj hmoov yuav poob rau tus twg. Tus Huab Tais Yes Xus xaiv los ua Hauv Paus Xa Lus yog Mas Thias.
Lub Koom Txoos tau qhia peb tias Mas Thias muab siab rau tshaj lub Moo Zoo mus txog rau Yus Dias teb, Kas Pas Dos Xias teb, Hais Nkws Tos teb thiab Es Thes Pias teb. Xyoo 80 Mas Thias raug cov Yus Das muab taus txiav caj dab tuag ua tim khawv.
Kwv tij Hmoob sawv daws, hnub no Huab Tais Yes Xus xaiv peb los ua nws thwj tim, Huab Tais Yes Xus muab ib txog kab xwm rau peb ua; yog kom peb coj Tswv Ntuj txoj kev hlub mus pub rau lwm tus nyob hauv peb cov hauj lwm sis nyiam sis hlub. Li ntawd, peb yuav ua neej kom txoj kev nyiam hauv peb txi txiv mog.
