ZAJ NYEEM HNUB TIM 14 LUB 10 HLI 2025
HNUB NCO TXOG LEEJ NTSHIAB VAJ QHIA KAS LIS TUS
COV LUS NYOB HAUV LUS KAS NTAWV MOO ZOO (LK 11: 37-41)
Kwv tij sawv daws, nyob rau hauv zaj no peb yuav pom tias, tus Fas Lis Xais caw Yes Xus mus hauv nws tsev, tiam sis nws tsis tau qhib siab caw Huab Tais los hauv nws lub neej thiab nws lub siab. Li ntawd, nws kev txais tos Huab Tais Yes Xus tsuas yog zoo li kev tos txais qhua sab nraud xwb. Thaum nws pom Huab Tais Yes Xus tsis ua tej kab ke ntxuav tes raws li cov Yus Das mas nws xav hnyos Yes Xus, nws saib tej yam ntawd yog qhov loj, yog qhov tseem ceeb, Tab sis, hnub no Huab Tais Yes Xus xav qhia rau tus Fas Lis Xais ntawd thiab rau peb sawv daws tias, kev ntxuav tes ua ntej noj mov tsuas yog kev noj qab haus huv xwb, tsis tau pab kom yus tus ntsuj plig huv tuaj, tiam sis, cov Fas Lis Xais xav tias lawv ua li ntawd mas lawv lub siab yuav huv tuaj lawm. Li ntawd Huab Tais Yes Xus thiaj taw kev kom lawv pom tias, kev uas yuav ua kom yus huv tuaj tsis yog cov kab ke sab nraud, tiam sis, yuav tsum yog yam sab hauv, peb yuav tsum mloog Tswv Ntuj cov lus qhia thiab peb yuav tsum hloov peb lub siab tig los ua qhov zoo raws li lub Moo Zoo qhia, mas peb thiaj li yuav huv tuaj tau.
Nyob zoo sawv daws.
