ZAJ NYEEM HNUB TIM 13 LUB 10 HLI 2025
HNUB OB LIS PIAM 28 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 11: 29-32)
Kwv tij sawv daws, nyob rau hauv zaj no hais txog lub Cim los yog hwj huam yees ntxwv, qhov ntawd yog yam txhawb kom yus muaj txoj kev ntseeg zoo dua tuaj, tiam sis tsis yog qhov yuav ua kom yus los ntseeg. Leej twg xav tias tau pom hwj huam yees ntxwv mas nws thiaj ntseeg, ces nws yuav tsis pom lub huwj huam, thiab nws yuav nrhiav tsis tau txoj kev ntseeg tseeb. Vim txoj kev ntseeg yog qhov nyob hauv nruab nrab peb lub neej, ua rau peb xav qhov zoo, thiab ua qhov yog, peb ntseeg tias yam ntawd yuav hloov peb lub neej tau. Qhov twg tsis raws li peb txoj kev ntseeg mas peb yuav tsum hloov, hos tej hwj huam yees ntxwv tsuas yog qhov sab nraud xwb, uas qee zaus yuav ua rau peb ceeb, ua rau peb qhuas, tiam sis, nws tsuas kawg li ntawd xwb. Huab Tais Yes Xus hais meej tias, hwj huam yees ntxwv tsuas yog ib lub cim, kom pab txhawb peb txoj kev ntseeg xwb, qhov yuav pab kom peb ntseeg ruaj khov yog Huab Tais cov lus qhia, yog lub Moo Zoo uas nws yuav nkag mus rau hauv peb lub siab, thiab hloov peb lub neej mus rau qhov zoo lawm yav tom ntej, zoo yam li Yos Nas uas nws tau mus tshaj lub Moo Zoo rau cov neeg nyob Nis Nis Vas, ces lawv hloov siab, lawv tig los ua zoo. Li ntawd lub ntsiab tseem ceeb nyob rau hauv zaj no Huab Tais Yes Xus xav qhia peb tias, qhov yuav pab kom peb tig los yuav lub siab tshiab, yog peb yuav tsum nquag teev Ntuj thiab mloog Yes Xus lub Moo Zoo, peb hloov peb lub siab los ua zoo raws li lub Moo Zoo qhia, ces Tswv Ntuj lub Ceeb Tsheej thiaj li yuav tuaj txog peb. Peb txhob tom kom pom Tswv Ntuj lub Ceeb Tsheej peb mam ntseeg, tiam sis, peb yuav tsum ntseeg vim peb tau hnov Yes Xus lub Moo Zoo.
Nyob zoo sawv daws.
