ZAJ NYEEM HNUB TIM 12 LUB 6 HLI 2026
HNUB HWM YES XUS LUB PLAWV NTSHIAB
COV LUS NYOB HAUV MAS TAIS NTAWV MOO ZOO (MT 11: 25-30)
Kwv tij Hmoob, nyob hauv xyoo 1956 Vaj Qhia Pis Yus 12 tshaj tias tom qab hnub Leej Ntuj Plig Ntshiab nqes los li 19 hnub, mas lub Koom Txoos yuav ua lub Txoos hwm Huab Tais Yes Xus lub plawv ntshiab. Yog muab suav los, mas poob rau Hnub Rau tom qab hnub hwm Yes Xus lub Cev thiab cov Ntshav. Nyob hauv xyoo no ncaj rau hnub tim 12 lub 6 hli; yog hnub no.
Nyob hauv Vaj Qhia Fas Ntshis Kus tsab ntawv ‘Tswv Ntuj nyiam peb’ nqe 48 sau tias kev hwm Huab Tais Yes Xus lub plawv tsis yog hwm ib ces ntawm Huab Tais Yes Xus lub cev, tab sis yog peb tab tom tsom tas nrho Huab Tais Yes Xus tib si kom pom txog Tswv Ntuj lub siab nyiam peb. Huab Tais Yes Xus lub plawv yog lub cim qhia txog nws lub siab nyiam ntiaj teb neeg tsis muaj ciaj ciam yam li lub hiav txwv tsis muaj ntug dej.
Ntawv Moo Zoo hnub no Huab Tais Yes Xus hais rau Leej Txiv tias yog nws tsis qhia rau leej twg, mas leej twg yeej yuav tsis paub txog Leej Txiv thiab Leej Tub. Tab sis yog leej twg paub Leej Tub, mas nws kuj yuav paub Leej Txiv thiab.
Huab Tais Yes Xus siab zoo thiab hlub neeg tas nrho, nws tuaj txais lub cev nqaij neeg kom tau qhia sawv daws txog Leej Txiv. Huab Tais Yes Xus yeem tuag sau Ntoo Cuam kom sawv daws pom txog Leej Txiv kev nyiam thiab hlub ntiaj teb neeg.
Huab Tais Yes Xus hais ntxiv tias “Tas nej sawv daws uas nej khwv thiab ris nra hnyav, nej tuaj cuag kuv mog. Kuv yuav cia nej so los siav. Nej txais kuv tus quab, nej kawm ntawm kuv mog, vim kuv siab zoo, kuv tsis muab hlob. Nej tus plig yuav nrhiav tau chaw los siav, vim kuv tus quab kwv yooj yim thiab kuv lub nra sib.”
Huab Tais Yes Xus niaj hnub hu peb li ntawd. Nyob ntawm peb, saib peb puas qhib siab ntseeg txog Huab Tais Yes Xus, peb puas xav paub Huab Tais Yes Xus thiab paub Huab Tais Leej Txiv. Tus paub tau Huab Tais Yes Xus kawg yog tus neeg tsis muab hlob xwb, nws ua zoo li lub khob tsis muaj dej, mas nws thiaj yuav khaws tau Huab Tais Yes Xus cov lus thiab cov hauj lwm qhia txog Huab Tais Leej Txiv.
Nyob zoo sawv dawws.
