ZAJ NYEEM HNUB TIM 11 LUB 9 HLI 2024
HNUB PLAUB LUB LIS PIAM 23 CAIJ NYOB NRUAB XYOO
COV LUS NYOB HAUV LAS KAS NTAWV MOO ZOO (LK 6: 20-26)
Kwv tij Hmoob sawv daws, cov lus nej hnov hauv lub Moo Zoo hnub no, peb hais tias yog cov lus hais txog ‘cov tau txoj hmoov zoo’.
Yog nej nco tau mas nyob hauv Mas Tais phau Ntawv Moo Zoo, nws hais txog cov tau txoj hmoov zoo 8 nqe. Tab sis nyob hauv Lus Kas phau Ntawv Moo Zoo raws li nej hnov hauv hnub no, mas Lus Kas hais tias muaj 4 cov neeg tau txoj hmoov zoo; yam li cov pluag, cov tshaib, cov quaj, thiab cov neeg raug hiam.
4 cov neeg no, lub zim txwv no lawv raug txom nyem tab sis fab lwm tiam lawv yuav tau txais koob haum loj.
Lus Kas tseem sau ntxiv tias Huab Tais Yes Xus tau hais tias muaj 4 cov neeg lawv tau txoj hmoov phem; yam li cov nplua nuj, cov noj tsau, cov luag, thiab cov nyem no zeej tsoom cav lus zoo txog lawv. Lawv cov no txoj hmoov phem vim tias lub neej fab lwm tiam, lawv yuav tsis pom Tswv Ntuj lub Ceeb Tsheej.
Kwv tij Hmoob, Huab Tais Yes Xus cov lus hauv zaj cov tau txoj hmoov zoo thiab cov tau txoj hmoov phem no, mas Huab Tais Yes Xus hais los txhib thiab ntuas tsoom neeg tuaj mloog Huab Tais Yes Xus. Cov neeg ntawd, ib txhia yog neeg liaj neeg teb nrhiav noj thawm hnub, ib txhia yog cov neeg muaj noj muaj hnav.
Huab Tais Yes Xus xav kom cov neeg tuaj mloog nws, lawv txawj sib pab sib nres, tus neeg muaj txawj hlub tus neeg pluag, tus neeg zoo txawj hlub tus neeg txom nyem mas lub teb chaws thiaj yuav nyob tau yam kaj siab lug.
Huab Tais Yes Xus cov lus pab tau cov neeg pluag, cov neeg tshaib plab, cov neeg quaj ntsuag, cov neeg raug hiam kom lawv lub siab kaj tuaj; kom lawv txhob tu siab rau lawv lub neej nyem no, tab sis kom lawv tso siab tias lawv yuav muaj kev zoo siab hom khaj.
Huab Tais Yes Xus cov lus pab tau cov neeg nplua nuj, cov neeg muaj noj muaj hnav, cov neeg nyob sov siab, cov neeg luag hwm; kom lawv paub hlub cov neeg txom nyem dua lawv, kom lawv tsis txhob muab lawv tus kheej khi rau txoj kev lom zem cuav txawj zaj ntshis, yam lawv yuav xub muab siab rau mas yog tseem kev lom zem, tseem kev zoo siab nyob pem Tswv Ntuj lub Ceeb Tsheej.
Kwv tij Hmoob, Huab Tais Yes Xus cov lus no zoo pab peb kom paub pom txog lwm tus neeg tseem txom nyem dua peb, zoo pab peb kom muab siab rau nrhiav txoj kev zoo siab hom khaj nyob pem Tswv Ntuj lub Ceeb Tsheej.
Peb xaiv tau, saib peb yuav ua tus neeg tau txoj hmoov zoo, los xaiv ua tus neeg tau txoj hmoov phem.
