ZAJ NYEEM HNUB TIM 10 LUB 8 HLI 2024
HNUB UA HMOOV LEEJ NTSHIAB LOS LEES NTXOS
COV LUS NYOB ZAM NTAWV MOO ZOO (Z 12: 24-26)
Kwv tij Hmoob sawv daws, hnub no lub Koom Txoos ua hmoov cav txog Leej Ntshiab Los Lees Ntxos txoj kev taug ua tim khawv. Lub Koom Txoos xaiv zaj Ntawv Moo Zoo hais txog thaum Huab Tais Yes Xus hais qhia rau cov thwj tim tias lub noob nplej twg xav kom nws tuaj thiab txhawv tau ua tes hnab mas lub noob ntawd tsum poob rau hauv av, lub nplaub yuav lwj mus mas lub noob thiaj yuav nthaw tau kaus. Nyob hauv lub neej ua neeg ntseeg los yeej ib yam, yog peb xav kom txoj kev ntseeg ri mus, mas peb yuav tau yeem muab tas peb lub neej los ua tim khawv txog txoj kev ntseeg; yog peb xav tau txoj sia nyob mus li mas peb kuj yuav yeem siv peb txoj sia los pua rau peb Tswv Ntuj tus Huab Tais muaj txoj sia.
Leej Ntshiab Los Lees Ntxos lub neej mas zoo li lub Moo Zoo hnub no, thaum Vaj Qhia thiab nws cov phooj ywg Tub Tsob Hwb raug ntes, nws xav nrog lawv raug ntes ib yam. Tab sis tseem hwv ho tsis ntes nws, Los Lees Ntxos paub tias tseem hwv yuav tuaj txeem Vaj Qhia lub cuab tam mas nws muab Vaj Qhia lub cuab tam muag mus faib rau cov neeg txom nyem. Tseem hwv hnov li ntawd, lawv tuaj ntes nws thiab hais kom nws rho cov cuab tam seem los rau tseem hwv. Los Lees Ntxos hais cov neeg txom nyem tuaj, ces nws hais tias cov no yog Vaj Qhia lub cuab tam. Cov tseem hwv npau taws lawv coj nws mus hlawv tuag ua tim khawv.
Kwv tij Hmoob, Los Lees Ntxos ua li ntawd tsis yog nws tab meeg ua kom cov tseem hwv muab nws tua, tab sis vim nws nyiam Huab Tais Yes Xus nyob hauv cov neeg txom nyem, nws yeem muab Vaj Qhia lub cuab tam pub rau cov neeg txom nyem zoo dua cia rau cov tseem hwv tuaj muab lwg. Los Lees Ntxos txoj kev tuag zaum no ua rau muaj coob leej zoo siab tig los yuav lub siab tshiab thiab coj lub neej ua Tub Tsob Hwb xws li Leej Ntshiab Los Lees Ntxos.
Hnub no, peb thiaj yuav vam txog Leej Ntshiab Los Lees Ntxos pab thov Ntuj rau cov neeg txom nyem thov kom muaj tej tus neeg muaj lub siab hlub thiab khuv leej txog lawv. Tsis tas li ntawd, peb tseem vam txog Leej Ntshiab Los Lees Ntxos pab thov Ntuj rau peb cov Hmoob, thov kom muaj tej tus tub hluas thiab ntxhais hluas hnov Huab Tais Tswv Ntuj lub suab hu lawv mus leg Tswv Ntuj txoj hauj lwm, mas txoj kev ntseeg nyob hauv peb haiv Hmoob thiaj yuav huaj vam xws li luag lwm haiv.
