ZAJ NYEEM HNUB TIM 1 LUB 7 HLI 2025
HNUB PEB, LIS PIAM 13 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 8: 23-27)
Kwv tij Hmoob sawv daws, raws li zaj lus hauv hnub no hais mas thaum Huab Tais Yes Xus thiab cov thwj tim nce mus hauv nkoj, ces Huab Tais Yes Xus tsaug zog hso cov thwj tim nkuam lub nkoj hla dej ntuj. Nyob nyob txawm muaj cua ntsawj tuaj ua rau dej ntuj nphau nhwv tuaj npog nkaus lub nkoj. Cov thwj tim pom li ntawd, lawv ntshai, ces lawv tsa Huab Tais Yes Xus sawv los pab lawv.
Muab piv rau peb lub neej mas zoo li ntawd, muaj ntau zaus peb raug teeb meem, muaj xwv txheej tuaj nphav peb, los tuaj npog nkaus peb cia. Thaum ntawd peb saib zoo nkaus peb lub neej mas tsau nti xam tsis pom kev tawm.
Cov thwj tim tab tom ntsib xwv txheej zoo li hais, lawv nco tias muaj Huab Tais Yes Xus nrog lawv nyob, ces lawv vam txog nws. Ntawm peb mas peb kuj yuav vam txog Huab Tais Yes Xus pab thaum peb raug teeb meem, peb thov Huab Tais Yes Xus pub ib lo lus pab peb ua siab loj, thov Huab Tais Yes Xus tshem cov xwm phem tuaj raug tuaj nphav peb.
Tab txawm Huab Tais Yes Xus yuav hais zoo li hais rau cov thwj tim tias “Vim li cas nej ntshai, ua cas nej ntseeg me ua luaj”, tsis kav hais tas Huab Tais Yes Xus kuj yuav pab peb.
Muab xav txog lub neej thaum tseem me, mas ntseeg tau tias thaum peb mus txob plaub, peb dhia los khaub zig niam thiab txiv thov nkawd pab, mas niam thiab txiv yuav yws yws los ntshai xuas ob peb pas rau peb tas, nkawd mam pab peb. Niam txiv yws, cem, los yog ntaus peb li ntawd vim peb tsis mloog lus, vim peb txob plaub. Niam txiv yws los ntaus kom peb hloov ua tus tshiab, paub tias qhov twg zoo los phem, ces peb thiaj tsis ua yuam kev ntxiv.
Hnub no, Huab Tais Yes Xus hais cov lus ntawd rau cov thwj tim kuj yog vim lawv ntseeg tsis tas tias Huab Tais Yes Xus muaj hwj chim ua tau puas tsav yim, lawv pom Huab Tais Yes Xus kho cov neeg mob, tab sis lawv tseem ntseeg tsis tas siab, mas Huab Tais Yes Xus thiaj hais cov lus ntawd.
Kwv tij, nyob hauv txoj kev ntseeg mas ntshai peb zoo li cov thwj tim, peb pom Huab Tais Yes Xus, ces peb xav raws nws, xav kawm ntawm nws, tab sis zoo li peb ntseeg tsis tas peb siab, peb ntsib me ntsis teeb meem, los raug hem ces peb ntshai, txawm li ntawd los Huab Tais Yes Xus tsis tso peb pom tseg, nws nyob nrog peb maj mam qhia kom peb paub txog nws.
Ib yam li hnub no, Huab Tais Yes Xus txwv cuab thiab dej ntuj, tab sis zoo li cov thwj tim tseem tsis to taub zoo pes tsawg, lawv tseem hais tias “Tus ntawd yog leej twg, tab yog cua thiab dej ntuj los yeej mloog nws lus?”
Ces tsis ntev Huab Tais Yes Xus yuav ua kom lawv pom tias nws yog leej twg.
