ZAJ NYEEM HNUB TIM 1 LUB 2 HLIS 2024
HNUB TSIB LUB LIS PIAM 4 CAIJ NYOB NRUAB XYOO
COV LUS NYOB HAUV MAS KOS NTAWV MOO ZOO (MK 6: 7-13)
Kwv tij Hmoob sawv daws, thaum Huab Tais Yes Xus tshaj nws lub Moo Zoo rau tsoom sid, nws pom tias yog nws tib tug ua hauj lwm xwb mas txoj hauj lwm yuav mus tau qeeb, yog li Huab Tais Yes Xus thiaj tau xaiv 12 tug hauv cov thwj tim niaj hnub nyob ze nws thiab mloog nws cov lus qhia, los pab nws tshaj lub Moo Zoo. Lawv 12 tug no peb hais tias yog cov Hauv Paus Xa Lus. Huab Tais Yes Xus xa lawv ua ib nkawm mus ua ke, kom tau sib pab tawm tswv yim thiab ib tug tau nres ib tug.
Huab Tais Yes Xus ntuas lawv tias “Nej rau khau khiab xwb, txhob hnav ob lub tsho.”
Lo lus no yog Huab Tais Yes Xus ntuas lawv kom ua neeg me txo lub hwj chim tseg, vim nyob hauv cov Yus Das mas tsuas yog tus neeg muaj xwb thiaj yuav hnav ob lub tsho; yog lub tsho ntev tuaj sab hauv thiab lub tsho tsha sab tuaj sab nraud.
Huab Tais Yes Xus kuj ntuas lawv kom muab siab rau tshaj lub Moo Zoo tsis tseg, nws hais tias “Nej chaws mus hauv lub tsev twg, nej yuav nyob hauv lub tsev ntawd mus txog hnub nej rov qab.”
Yes Xus kuj tseem ntuas lawv kom txhob khuam lub sij hawm dag rau tej qhov chaw tsis muaj neeg kam txais lawv thiab.
Cov kwv tij, Huab Tais Yes Xus pub lub hwj huam kom lawv ntiab tau dab tsis huv, kho tau cov neeg muaj mob kom rov zoo, ntuas lawv kom hloov siab tshiab.
Niaj hnub no lub Koom Txoos ua raws li Huab Tais Yes Xus cov lus no, lub Koom Txoos ntuas kom cov neeg ntseeg sawv daws sib tuav tes kauj ruam mus tshaj lub Moo Zoo ua ke thiab kom ib tug tau pab ib tug kom tig los yuav lub siab tshiab.
Yog peb sawv daws ua neeg me nyob ntawm lwm tus xub ntiag, yog peb niaj hnub hloov siab tshiab ntiab tus dab tsis huv tawm hauv peb mus, yog peb tsis nkim lub zog nyob dag ua tej yam tsis muaj qab hau, yog peb kub siab ua tus piv txwv zoo rau luag pom; mas yog peb tau pab Huab Tais Yes Xus tshaj nws lub Moo Zoo lawm.
Nyob zoo sawv daws.
