ZAJ NYEEM HNUB TIM 1 LUB 12 HLIS 2025
HNUB OB, THAWJ LIS PIAM CAIJ TOS HUAB TAIS
COV LUS NYOB HAUV MAS TAIS NTAWV MOO ZOO (MT 8: 5-11)
Kwv tij sawv daws, tus xab txheeb, los yog tus nais tub rog, nws muaj ib pab tub txib, tiam sis, nws muaj ib tug tib txib raug mob, tuag tes tuag taw, sawv tsis taus lawm. Tus xab txheeb thiaj tuaj cuag Huab Tais Yes Xus thiab thov kom Huab Tais pab kho nws tus tub txib kom zoo.
Thaum nws tuaj cuag Huab Tais Yes Xus, nws piav rau Huab Tais Yes Xus tias mloog tas, ces Yes Xus zoo siab mus kho nws tus tub txib tom tsev.
Tus xab txheeb kuj xav tsis txog tiag Huab Tais Yes Xus yuav kam mus kho nws tus tub txib tom tsev, vim nws yog ib tug pej kum neeg. Nws tsis yog Huab Tais Yes Xus haiv neeg.
Kwv tij sawv daws, nyob rau hau nqe lus no peb yuav pom tias, Huab Tais Yes Xus tsis yog ib tug neeg siab nqaim, uas yuav cais haiv. Huab Tais Yes Xus yog ib tug sia dawb siab zoo, nws ua lub siab loj siab dav los hlub thiab pab txhua txhia haiv neeg.
Yes Xus hais tias, cia kuv mus kho nws. Tab sis, tus xab txheeb ntawd hais rau Yes Xus tias “Huab Tais kuv tsis tsim nyog koj chaws los hauv kuv tsev, tsuav koj hais ib los lus xwb ces kuv tus tub txib yuav zoo hlo.”
Huab Tais Yes Xus thiaj qhuas tus xab txheeb ntawd tias, Huab Tais Yes Xus ncig thoob His Xas Lais teb, tab sis nws tsis tau pom ib tug neeg twg muaj txoj kev ntseeg zoo xws li tus xab txheeb no. Ces Huab Tais Yes Xus thiaj hais rau nws tias “Koj mus! Xav kom koj tau raws li koj lub siab ntseeg!”
Lo lus no yog ib lo lus uas qhia tau tias tus xab txheeb ntawd nws muaj kev tso siab rau Huab Tais Yes Xus, nws ntseeg hais tias, Huab Tais Yes Xus muaj hwj huam kho tau nws tus tub txib kom zoo xwb. Tsuav yog Huab Tais Yes Xus hais ib lo xwb ces nws tus tub txib yuav zoo hlo.
Tom qab ntawd tus xab txheeb rov los txog tsev nws pom tias nws tus tub txib zoo lawm tiag. Nws thiaj nug cov uas zos tus mob tias, nws zoo lub sij hawm twg. Lawv qhia rau nws, ces yog tib lub sib hawm thaum Yes Xus hais rau nws tiag.
Kwv tij sawv daws, tus xab txheeb muab txoj kev ntseeg qhov twg los. Kuj yog vim tus tus xab txheeb ntawd nws yog ib tug thawj tub rog, nws ntseeg tias tus coj lo lus tseem ceeb heev thiab muaj hwj huaj. Vim muaj ib pab tub rog, nws hais lo twg, ces cov tub txib yuav mloog nws thiab ua raws li nws hais, hos kuj muaj cov nyob siab dua nws, yog lawv hais li cas ces nws yuav ua li ntawd. Li ntawd, nws ntseeg tias, Huab Tais Yes Xus lo lus yog ib lo lus muaj kuab tshuaj, tsuas yog Huab Tais Yes Xus hais ib lo xwb ces nws tus tub txib yeej zoo lawm. Tsis tas li ntawd, nws paub tias nws yog ib tug neeg muaj txhaum, nws thiaj hais rau Huab Tais Yes Xus tias, Huab Tais kuv tsis tsim nyog cia koj chaws los hauv kuv tsev tsuas yog koj hais ib lo xwb ces kuv tus tub txib yeej zoo lawm.
Lo lus no peb thiaj muab los siv nyob rau hauv thaj txi Ntuj thaum ua ntej peb yuav txais lub Cim Yug los yog lub ncuav mov, peb hais tias ; ‘Huab Tais kuv tsis tsim nyog txais koj tuaj hauv kuv vaj tsev thov koj hais ib lo mas kuv lub siab yuav zoo hlo.’
Kwv tij sawv daws, txoj kev ntseeg tsis yog tias, yus lees txais Huab Tais Yes Xus cov lus qhia thiab ua raws xwb, tiam sis, yus yuav tsum muaj lub siab ntseeg tiag tiag hais tias, Huab Tais Yes Xus cov lus qhia yog ib co lus muaj kuab tshuaj uas yuav kho tau yus lub neej thiab txoj sia tiag tiag.
Nyob zoo sawv daws.
