Yam uas cov Thwj Tim xav tau. (The demand of discipleship)
Zaj nyeem ntawm peb hnub no yog nyob hauv Lus Kas zaj 14, thiab yog zaj hauv fab ntsuj plig tiag tiag. Peb tab tom hais txog fab ntsuj plig uas tob heev. Nej nco puas tau zaj hais txog tus nom nplua nuj ? Tus nom uas muaj lub siab kub lug hauv fab ntsuj pliag tuaj cuag Yes Xus. Nws nug Yes Xus tias : “Xib Hwb siab zoo, kuv yuav ua li cas thiaj tau txoj sia nyob mus li los ua kuv tug ?” Yes Xus xub hais thawj nqe lus thiab Yes Xus hais rau nws tias : “Vim li cas koj hu kuv ua siab zoo ? Tsis muaj leej twg siab zoo, tsuas kawg Tswv Ntuj tib leeg xwb. Koj paub cov lus kuv qhia : koj tsis txhob deev luag txij luag nkawm, txhob tua neeg, txhob ua tub sab, txhob ua tim khawv cuav, koj yuav hwm koj niam koj txiv.”
Tus nom nplua nuj hais tias : “Tej ntawd, kuv yeej coj rawv txij thaum kuv tseem hluas los lawm.” Yes Xus hnov li ntawd, nws hais rau tus nom tias : “Tseem tshuav ib yam uas koj tsis tau ua : muab ib puas tsav yam uas yog koj tug muag, muab tus nqi faib rau cov pluag. Ces koj yuav tau lub cuab tam muaj nqis nyob saum Ntuj. Ua li ntawd tas, koj los raws kuv.” Tus nom hnov li ntawd, nws tu siab kawg, vim nws nplua nuj tas nrho. Nws ua lub neej hauv fab ntsuj plig mus rau kev nplua nuj, tab sis nws tseem tsis tau npaj siab rau qhov tseeb tiag. Sim xav txog ib tug tub ncaws pob seb, tus thawj coj pom tias nws ncaws pob tau zoo. Ces tus thawj coj xav rub nws mus rau kev ncaws pob tiag tiag. Qhov no yog kev xav tau ntawm lub cev ntaj ntsug, vim txhua yam ntawm lub cev ntaj ntsug yog kev sib tw. Los yog xav txog ib tug me nyuam tub uas txawj ntaus Nkauj Nog Ncas, ces tus xib hwb hais tias yog nws npaj txhij rau cov suab nkauj. Muaj qee yam uas zoo sib xws hauv fab ntsuj plig, thiab teeb meem ntawm peb yog peb muaj txhaum ntau nyob hauv fab ntsuj plig. Qhov kuv hais yog hais txog peb zoo li tus nom nplua nuj. Ces peb yuav hais tias : kuv yog neeg zoo, kuv tsis tau tua neeg, kuv tsis tau ua tub sab thiab tsis tau deev luag txij luag nkawm. Kuv tsis nyiam dag thiab kuv ib txwm coj raws txoj cai. Kuv mus teev Ntuj txhua hnub. Yog qhov zoo kawg, tsis muaj dab tsi txhaum. Vim cov lus cog tsuas yog lub hauv paus uas koj xav tau, kom koj nce ib theem hauv fab ntsuj plig. Tab sis peb feem coob tseem tsis tau mus txog qhov ntawd, vim qhov ntawd nws tob los yog nyob siab dua.
Thaum peb xav txog zaj no lawm, peb yuav los nyeem cov lus nyob hauv zaj no. Peb yuav mloog Yes Xus cov lus. Yog leej twg los raws kuv uas nws tsis tau ntxub nws niam nws txiv, nws poj niam thiab me nyuam, kwv tij los yog tus kheej. Tus ntawd yuav ua kuv thwj tim tsis tau. Raws li Bonhoffer's hais tseg tias :
“Leej twg kuj xij uas nws tuaj cuag kuv thiab xav ua kuv thwj tim, tab sis nws tsis tau ntxub nws niam nws txiv, poj niam me nyuam, kwv tij los yog nws txoj sia, mas nws yuav ua kuv thwj tim tsis tau.” Kuv tau nyeem zaj no los 100 zaus lawm, thiab kuv tau nyeem cov lus hais txog Yes Xus. Thawj lo lus cog yog dab tsi ? Thawj lo lus yog koj yuav teev Tswv Ntuj tib leeg xwb, thiab koj yuav nyiam Tswv Ntuj tas siab tas ntsws, tas tswv yim tas zog. Leej twg yog tus xub hais txog, nws tsis yog kuv niam, tsis yog kuv txiv. Tsis yog kuv cov kwv tij, los yog kuv txoj sia. Tswv Ntuj yog qhov ua ntej tshaj. Yog Tswv Ntuj taij yam uas tsis haum rau yam kuv niam kuv txiv xav tau ne, Tswv Ntuj puas yog yam zoo tshaj ? Yog Tswv Ntuj taij thov ib yam hauv kuv lub neej, mas puas yog kuv yuav tsum tso kuv cov kwv tij tseg ?
Tswv Ntuj taij kom koj pub txoj sia, thiab cov Tim Khawv kuj puav leej ntsib kev pub li ntawd. Koj yuav ua li cas ? Kuv vam tias yuav tsis muaj hnub tshwm sim, tab sis yog koj txiav txim siab, koj yuav txiav txim siab li cas ? Yog tias koj tsis tuaj yeem cia koj niam koj txiv ua qhov tim ob ntawm Tswv Ntuj, mas koj kuj yuav ua thwj tim tsis tau. Yog koj tsis tuaj yeem cia koj txoj kev nyiam kev hlub uas hlub kwv hlub tij ua tim ob ntawm Tswv Ntuj, mas koj kuj yuav ua tsis tau thwj tim. Koj yuav rov mus saib nyob hauv ntawv Hauv Paus dua. Thaum Tswv Ntuj hais rau Has Nplas Has tias :
“His Xas Has uas yog koj tus tub, kuv xav kom koj muab nws rau kuv.”
Qhov no puas yog Tswv Ntuj siab phem heev ? Tsis yog, nws yog tib zaj xwb. Yog tib yam kev xyaum tus ntsuj plig uas koj xav tau. Koj puas yog nyiam koj tus tub tshaj ? Nws yog li ntawd. Yog tias koj tsis npaj siab yuav ua tus raws Yes Xus, mas koj yuav xav tias nov yog qhov tseem ceeb ntawm fab ntsuj plig. Kuv hais tias qhov no nws muaj ob txheej, ces tam sim no peb yuav mus tham txog txheej ob uas phem tshaj no.
Qhov kuv tau hais rau nej lawm tias yog kev muab hlob. Thawj yam yog kuv xav muab Tswv Ntuj tso nyob qhov siab tshaj puas tau ? Tab sis kuv pom kev muab hlob no nws thaiv kev sib raug zoo, yog los ntawm kev muab tus kheej saib hlob. Kuv xav siv niam txiv rau kuv cov txiaj ntsim qab hau puas tau ? Kuv yuav ua kom lawv yog ib feem hauv kuv lub neej puas tau ? Sim xav txog cov niam cov txiv uas lawv nyob twj ywm thiab mloog me nyuam lus, kuv puas ua kom lawv muaj feem hauv kuv txoj kev muab hlob khav theeb thiab qia dub ? Tej yam no koj puas xav tias nws yog qhov ntxim ntxub ? Nws yog kev ua kom lawv rais ua tshuaj txhaum hauv fab ntsuj plig. Yog zoo li ntawd, mas tsim nyog koj yuav ntxub thiab tsis lees txais lawv. Ntau zaus hauv fab ntsuj plig, tib neeg tau muab siab rau raws Yes Xus qab, tab sis lawv tsis kam tso tej yam txawv hauv lawv lub neej tseg. Lawv tsis kam tso kev muab hlob uas siv kam tseg thiab nws tsis zoo rau cov neeg nyob ib ncig yus. Koj puas pom tias koj ntxub txoj kev sib raug zoo uas khav theeb thiab muab hlob, nws ua rau koj qaug zog hauv fab ntsuj plig ?
Yog koj tseem npaj tsis tau txhij yuav raws Yes Xus, koj kuj npaj tsis tau txhij hauv kev ua thwj tim tiag tiag.
Nov yog cov lus nyob hauv Ntawv Cog Lus Qub. Cov His Xas Lais lawv nrhiav lub lauj kaub nqaij nyob Hais Nkws Tos teb. Ces lawv hais tias yog tias peb rov qab mus Hais Nkws Tos teb dua, tab txawm peb raug ua qhev nyob Hais Nkws Tos teb, tsis kav peb muaj noj muaj haus txaus. Yog tias koj tseem xav li ntawd, mas txhais tias koj tsis tau npaj txhij nyob hauv daim av cog lus. Ces koj yuav rov mus nrhiav tus yam ntxwv qub qub uas ntxias dag thiab muaj kev khav theeb muab hlob ntawm cov neeg nyob ib ncig koj. Yog tias koj txaus siab raws Yes Xus qab, mas koj yuav ntxub tas txhua yam ntawd. Tam sim no peb yuav los saib seb Yes Xus xaus zaj no li cas.
Yes Xus hais tias : “Tsis hais leej twg kuj xij, yog nws tsis kwv nws tus ntoo cuam lawv kuv qab, mas nws yuav ua kuv thwj tim tsis tau.” Kuv yog neeg txhaum thiab nej yog neeg txhaum. Li ntawd qhov no thiaj yog qhov nyuab heev rau peb. Peb paub zaj hais txog ntoo cuam, peb paub txog kev kwv ntoo cuam thiab paub txog ntoo cuam lub ntsiab. Peb tso ntoo cuam nyob ntawm peb hauv ntej tas mus li. Yes Xus tus Ntoo Cuam yog txhais li cas ? Txhais tias kuv raug lwg cuab tam, kuv raug lwg kev sov siab, kuv raug lwg lub hwj chim, kuv raug lwg lub meej mom. Tas txhua yam no yog qhov kuv tus kheej txoj kev muab hlob xav tau. Tab sis kuv raug lwg tas txhua yam, tas txhua yam no kuv tau muab siab rau ua kom nws yog kuv lub cuab tam.
Kuv lub neej yog dab tsi tiag ? Koj puas xav tau tus coj hauv fab ntsuj plig los yog tus daws txhaum tiag tiag uas yuav pab koj hais txog zaj no ? Kuv tsis tau hais txog tus neeg tuav ntsoov koj pob ntseg thiab hais yam koj xav mloog. Kuv yog hais txog tus neeg zoo thiab tus neeg tseeb tiag. Nws yuav nug tias : “Koj lub neej tiag tiag yog dab tsi ?” Nws yog hais txog kev ua Tswv Ntuj tub txib, puas yog tiag ? Kuv xav tau lo lus teb ncaj ncaj, kuv xav soj ntsuam txog kev ncaj ncees hauv koj lub neej. Nws yog hais txog dab tsi ? Koj sawv saum txaj ntxov ntxov, kom tau ua dab tsi ? Yog tias peb yog neeg txhaum ncaj ncees, tej zaum peb yuav hais txog kev nplua nuj, lub hwj chim, kev sov siab, lub meej mom los yog kev txuag tus kheej. Koj puas paub ne ? Koj coj tus yam ntxwv muab hlob xws li qub, tshwj zias yog koj txaus siab kwv koj tus ntoo cuam. Thiab koj tus ntoo cuam yog hais txog kev raug lwg ntawm tas txhua yam. Tas txhua yam ntawd tsis yog lub cuab tam loj tshaj ntawm koj. Tej yam txawv txav thiab kev muab hlob uas koj tus kheej siv los ua qhov chaw kav lwm tus, yog tias koj xav raws Yes Xus qab, mas koj yuav ntxub tas txhua yam ntawd. Nov yog qhov muaj nqis ntawm kev ua thwj tim. Cov neeg ib txheej li kuv muaj tus ntsuj plig xwm yeem. Tswv Ntuj yog kev nyiam kev hlub, ces koj yuav muab siab rau hauv kev khuv leej luag tej thiab ua neeg zoo. Kuv txhawb nqa txoj kev ua neeg zoo, tab sis ntawd tsuas yog qhov pib xwb. Ntawd yog qhov pib ntawm lub neej fab ntsuj plig. Qhov tseeb tiag yog nyob hauv Lus Kas zaj 14. Tshwj zias koj yuav ntxub tas txhua yam li hais no. Tshwj zias koj yuav daws txo qhov muaj nqis. Tshwj zias koj yuav zeem tseeb tias Tswv Ntuj yog yam zoo tshaj nyob hauv koj lub neej. Koj kuj tseem tsis tau npaj txhij uas yuav raws Yes Xus. Li ntawd, txhob ua kom txhua yam no rais ua qhov tseem ceeb raws li kuv xub tau hais lawm. Cia qhov kev nyuaj siab ntawm cov lus no nkag mus txog hauv koj tus ntsuj plig.
Kwv tij Hmoob sawv daws ! Hnub no peb tham txog yam uas cov thwj tim xav tau los xaus li no xwb. Thov nej khaws lo lus no tseg : “Kwv koj tus ntoo cuam raws Yes Xus qab.” Kev kwv ntoo cuam, yog kev ua neeg me tsis khav theeb thiab tsis muab hlob.
Thov Huab Tais Yes Xus Pleev lub txiaj ntsim nrog nej nyob, ua nej siab kaj lug !
Lwm zaus peb mam sib ntsib dua, nyob zoo nej sawv daws !
