Tswv Ntuj thiab neeg nyob ua ke. (God and Humanity come together)
Peb twb dhau lub Caij Tos Huab Tais thiab lub Caij Yes Xus Yug Los lawm, tam sim no lub Koom Txoos coj peb rov los pib lub Caij Nyob Nruab Xyoos, yog lub caij xwm yeem thiab tsis muaj dab tsi. Lub Koom Txoos tau muab lub caij no rau peb, kom peb tau nyeem zaj tseem ceeb nyob hauv Zam ntawv Moo Zoo, yog zaj hais txog rooj tshoob nyob Kas Nas. Zoo li thaum peb pib lub xyoo cov kab ke xwm yeem, peb yuav saib txhua yam los ntawm lub zeem muag hauv zaj no. Vim nyob hauv zaj no nws hais txog ntau yam thiab Yes Xus ua hwj huam yees ntxwv thawj zaug.
Tab sis kuv xav tias nws tseem ceeb heev rau kev nkag siab kev ntseeg thiab lwm cov Ntawv Ntshiab. Nws yog qhov tshwj xeeb tshaj uas lub Koom Txoos npaj yam no tseg rau peb. Lub Koom Txoos npaj yam no rau peb, kom tau paub txog tus yaj saub His Xais thiab hais txog Tswv Ntuj lub hom phiaj uas yuav ua tshoob nrog nws cov neeg. Nov yog thawj yam uas peb yuav saib.
Merton hu yam no ua teeb meem ntawm Promethean hauv kev teev hawm. Nws hais txog Promethean lub keeb uas nce mus saum lub roob Olympus thiab nyiag hluav taws ntawm saub. Ua rau cov saub chim rau nws kawg, ces lawv thiaj ntes nws mus xuas saw hlau khi rau
ntawm pob zeb thiab muab nws rau txim mus tas ib sim neej. Nov yog qhov uas Merton hais tias yog Promethean li teeb meem uas nws hem cov neeg coj kev cai nruj nruj los ntev. Yog qhov tias cov saub los yog Tswv Ntuj yog tus muaj hwj chim thiab muaj zog. Cov saub los yog Tswv Ntuj zoo li cov neeg sib twv nrog lawv. Li ntawd, yog peb nyiag dab tsi ntawm lawv, mas lawv yuav chim siab heev thiab muab txim rau peb.
Qhov uas kuv xav tias yuav ua txhua yam kom Tswv Ntuj nyiam kuv. Tswv Ntuj tsis tau nyiam thiab hlub kuv tiag tiag, tab sis kuv ua kom txaus kuv siab, ces tej zaum Tswv Ntuj yuav nyiam kuv me me. Tas txhua yam kev xav ntawd yog qhov tsis haum rau Ntawv Ntshiab. Thov peb los mloog cov lus nyob hauv ntawv His Xais hnub no :
“Vim Xis Yoos, kuv thiaj nyob ntsiag to tsis tau. Vim Yes Lus Xas Les, kuv thiaj nyob twj ywm tsis tau mus txog thaum nws qhov dawb huv ci tawm los li ntuj kaj thiab nws txoj kev yeej zoo li hluav taws cig.”
Nov yog Tswv Ntuj tab tom hais rau nws haiv neeg His Xas Lais. Tswv Ntuj yuav tsis so mus txog thaum lawv yeej. Txog thaum lawv muaj txoj sia puv npo. Txhais tias Tswv Ntuj yuav tsis so mus txog thaum peb muaj txoj sia puv npo thiab zoo txhij zoo txhua. Tswv Ntuj lub hwj chim ci ntsa iab, yog tus neeg uas muaj txoj sia thiab zoo txhij zoo txhua. Tswv Ntuj nyiam thiab hlub nws cov neeg, Tswv Ntuj xav kom lawv muaj txoj sia nyob thiab qhov hais no yog hais txog kev sib yuav. “Vim Tswv Ntuj nyiam koj, thiab nws ua kom daim av uas koj nyob yog nws tus txij nkawm. Xws li ib tug tub hluas yuav ib tug nkauj xwb. Zoo li koj tus neeg txhim tsev rov yuav koj.”
Txhua yam no yog ib qho tshwj xeeb kawg nyob hauv txhua txoj kev teev hawm nyob ntiaj teb. Kuv tsis paub txog lwm txoj kev teev hawm uas Tswv Ntuj hais tias nws yuav sib yuav nrog nws haiv neeg. Txhais tias Tswv Ntuj xav faib nws txoj sia rau koj nyob hauv kev zoo txhij zoo txhua. Peb puas ntseeg tias muaj li ntawd ?
Tas cov lus no yog xaus txog yam zoo nyob hauv kev ntseeg thiab Ntawv Ntshiab. Tam sim no lub Koom Txoos kom peb nyeem ntawv His Xais, kom peb txawj npaj peb tus kheej tos txais lub Moo Zoo. Kuv xav tias peb tau nyeem zaj hais txog rooj tshoob nyob hauv lub nroog Kas Nas. Yes Xus kuj nyob hauv rooj tshoob thiab. Thaum lawv noj tshoob txog tog, mas lawv tsis muaj cawv lawm. Yog qhov lawv txaj muag kawg. Tab sis Yes Xus pab lawv, nws ua kom lawv muaj kev sov siab nyob hauv rooj tshoob. Ces Yes Xus thiaj ua kom dej txia ua cawv.
Nyob hauv Zam ntawv Moo Zoo, qhov no yog Yes Xus ua hwj huam yees ntxwv thawj zaug. Zam hais tias yog Yes Xus thawj lub Cim uas nws ua. Muaj 7 yam nyob hauv ntawv Moo Zoo uas yog hais txog Yes Xus tsa Las Ntxas Los. Yog vim li cas rooj tshoob nyob Kas Nas thiaj yog thawj lub Cim ntawm Yes Xus ? Peb yuav nyeem zaj no thiab xav txog His Xais cov lus nyob hauv Ntawv Cog Lus Qub uas hais tias Tswv Ntuj yuav nrog nws haiv neeg sib yuav. Ntawm Yes Xus, mas yog kev sib yuav ntawm lub ntiaj teb thiab Tswv Ntuj. Yes Xus yog qhov sib sau ntawm txhua yam los ua ib tug, xws li kev ntshiab huv thiab tib neeg.
Dab tsi ua kom Tswv Ntuj thiab tib neeg los ua ke ? Yog kev sib yuav ntawm Tswv Ntuj thiab tib neeg. Thaum cawv tas lawm, mas yog qhov txaj muag kawg ntawm nraug vauv thiab tus nkauj nyab. Vim txheej thaud lawv ua tshoob mas noj haus ntau hnub thiab cawv yog qhov tseem ceeb nyob hauv rooj tshoob.
Nyob hauv zaj no, Niam Mab Liab yog tus tseem ceeb tshaj. Thaum cawv tas lawm, Niam Mab Liab hais rau Yes Xus tias : “Lawv tsis muaj cawv lawm, koj ua txhua yam raws li Tswv Ntuj qhia koj”. Qhov ntawd kuj yog ib yam li qhov uas cov yaj saub kom cov His Xas Lais ua raws li Tswv Ntuj qhia. Yes Xus thiaj hais rau cov kav xwm tias :
“Nej hliv dej kom puv cov hub no, nej ce cov dej no nqa mus rau txiv thiaj com.”
Cov hub zeb ntim cawv muaj tas nrho 6 lub. Yes Xus thiaj ua hwj huam yees ntxwv los yog ua nws thawj lub Cim, muab dej txia ua cawv.
Nov yog dab tsi ? Nov yog Ntuj lub txiaj ntsim ntws tawm los, ces muaj cawv nyob puv nkaus cov hub zeb. Qhov tiag mas lawv yuav xub muab cov cawv qab coj los haus ua ntej, tab sis lawv ho muab cov cawv qab los haus tom qab. Yes Xus yog qhov tom qab kawg thiab yog qhov puv npo muaj txhij txhua.
Nyob hauv lub thaj txi Ntuj, muaj dab tsi txawv txav ?
Lub thaj txi Ntuj yog zoo li rooj tshoob tsis yog lod ? Vim hauv lub thaj txi Ntuj, muaj Tswv Ntuj thiab neeg los sib sau ua ke. Yog yam uas sau los ua ke thiab zoo txhij zoo txhua nyob hauv lub thaj txi Ntuj. Yes Xus cov Ntshav yog zoo li cov cawv tshiab uas muab los txi Ntuj, yog cov Ntshav yuav ntws los daws ntiaj teb neeg cov txhaum.
Lub thaj txi Ntuj yog qhov chaw cev cov txim txi Ntuj xws li lub rooj noj mov. Tas ob yam no puav leej yog qhia txog qhov tseeb. Cov cawv yog lub Cim zeem tseeb txog Yes Xus cov Ntshav. Cov cawv txi Ntuj hauv txhua tiam neeg txij lub hauv paus los, yog zeem tseeb txog Yes Xus cov Ntshav. Tus tswv tsim koj xav nrog koj sib yuav, peb puas ntseeg tau ? Qhov ntawd yog Tswv Ntuj xav nrog peb sib yuav. Lo lus sib yuav yog nyob ua ke. Qhov ntawd nws twb tshwm sim nyob hauv Yes Xus lawm. Yog hais txog Tswv Ntuj thiab ntiaj teb neeg los nyob ua ke. Rooj tshoob ntawm Yes Xus thiab peb, yog qhov peb tau haus cov cawv tshiab uas yog Yes Xus cov Ntshav.
Qhov tshwj xeeb tshaj tam sim no, yog qhov peb yuav nyeem mus tas ib xyoos hauv lub Caij Nyob Nruab Xyoos.
Kwv tij Hmoob sawv daws ! Peb yuav nco ntsoov tias thaum peb sib koom ua thaj txi Ntuj ua ke, mas yog zoo li rooj tshoob uas Tswv Ntuj thiab neeg sib yuav ntag.
Hnub no kuv ntsib nej li no xwb ! Lwm zaus peb mam rov sib ntsib dua !
