Thaum koj txoj kev ntseeg raug sim.
Peb tab tom nyob hauv qhov chaw uas kuv hu ua txaus ntshai thiab ntshiab huv, vim lub Koom Txoos tab tom qhia txog ntawv Hauv Paus zaj 22 rau peb.
Cov His Xas Lais thaum ub lawv hu yam no ua “Akedah”, txhais tias pav. Nws yog hais txog His Xas Has raug pav. Li ntawd, nws thiaj tsis raug hlawv txi ntuj, tab sis Has Nplas Has zoo siab muab nws tus tub tua txi rau ntuj. Yog ib txoj kev xav tsis yooj yim nyob hauv ntawv Cog Lus Qub uas muaj kev sib cav heev zuj zus. Ua rau muaj kev ua xyem xyav thiab sib tiv heev kawg.
Yog tias koj tsis ntshai thiab tshee thaum koj nyeem cov lus no, txhais tias koj tsis tau muab siab rau txog. Yog koj muab siab rau nyeem cov lus no yam yooj yim thiab koj ntsia ib muag xwb dhau mus, vim koj hnov los ntau pua zaus lawm, koj yuav tsis muaj hnub nkag siab txog zaj no li. Koj yuav mloog thiab nco tias Tswv Ntuj sim Has Nplas Has li cas. Tswv Ntuj hu tias : “Has Nplas Has.”
Has Nplas Has teb tias : “Kuv nyob ntawm no.”
Tswv Ntuj hais tias : “Coj koj leej tub twm zeej His Xas Has uas koj hlub kawg, nrog koj mus kom txog lub teb chaws Mos Lis Yas. Nyob ntawd koj yuav muab nws txi rau kuv saum ib lub roob uas kuv yuav qhia rau koj.”
Tam sim no yog koj, mas kuv xav tias koj yuav ntshai thiab tshee vim dab tsi ?
Tswv Ntuj xaiv Has Nplas Has, nws tau hnov Tswv Ntuj lub suab raws nws mus hauv lub teb chaws cog lus thiab Tswv Ntuj nrog Has Nplas Has cog lus. Tas txhua yam no Tswv Ntuj cog lus rau Has Nplas Has tias :
“Koj yuav ua tas cov neeg hauv lub teb chaws leej txiv, koj cov xeeb leej xeeb ntxwv yuav coob npaum cov hnub qub nyob saum ntuj los ntawm koj tus tub.”
Thaum Has Nplas Has laus thiab nws hnub nyoog muaj 99 xyoos, nws hais rau Tswv Ntuj tias : “Tswv Ntuj, qhov no yuav tshwm sim tau li cas ?”
Tab sis Tswv Ntuj ua kom nws cov lus cog tsheej xeeb tiag. Ces Has Nplas Has thiab Xas Las nkawd thiaj yug tau ib tug tub, nkawd tis nws npe hu ua His Xas Has. Kuv hais txog qhov tias : ib tug txiv twg kuj xij, nws kuj txawj hlub nws tus tub.
Has Nplas Has laus lawm nws mam muaj tub, yog ib qho uas xav tias nws yuav tshwm sim tsis tau. Tus me nyuam no tseem ceeb rau Has Nplas Has npaum li cas ?
Tus Tswv Ntuj uas hu Has Nplas Has thiab tus nrog Has Nplas Has cog lus yog tib tug, nws kuj yog tus Tswv Ntuj uas ua kom His Xas Has yug los.
Koj sim xav txog lo lus uas Tswv Ntuj hais rau Has Nplas Has tias :
“Coj koj leej tub twm zeej uas koj hlub nrog koj mus.”
Thiab Tswv Ntuj tseem hais li cas ntxiv ne ? Yog koj muaj ib tug tub xwb, koj yuav paub tias koj tus tub tseem ceeb rau koj npaum cas. Thaum Has Nplas Has hnov Tswv Ntuj hais li ntawd, nws xav li cas ne ? Tswv Ntuj xav kom Has Nplas Has muab nws tus tub coj mus tua txi rau ntuj, vim li cas Tswv Ntuj thiaj ua li ntawd ? Li cas los Has Nplas Has zoo siab mloog Tswv Ntuj cov Lus, nws thiaj coj nws tus tub nrog nws mus. Yog ib qho txaus tu siab kawg puas yog ? Nws tus tub ris ib co taws nrog nws mus saum lub roob. Koj sim xav seb koj yog leej txiv ntawm ib tug me nyuam me me, koj cia nws ris ib co taws nrog koj mus txog ntawm qhov chaw txi ntuj, koj xav li cas ?
Thaum nkawd mus txog chaw lawm, tus tub nug Has Nplas Has tias :
“Txiv, tus yaj yuav coj los hlawv txi ntuj nyob qhov twg ?”
Thaum ntawd hauv Has Nplas Has lub siab xav tias dab tsi yuav tshwm sim ?
Has Nplas Has teb nws tus tub tias :
“Me tub, Tswv Ntuj mam li muab tus yaj yuav hlawv txi ntuj rau wb.”
Akedah txhais tias pav : yog hais txog His Xas Has raug pav. Has Nplas Has thiaj muab His Xas Has pav tso rau saum cov taws saum lub thaj txi Ntuj. Nws tsa tes mus nthos rab riam yuav coj los tua nws tus tub. Tiam sis Tswv Ntuj tus Tshiab hu saum ntuj tuaj cheem thiab Tswv Ntuj hais tias : “Koj txhob ua dab tsi phem rau nws !
Zaum no kuv paub hais tias koj nyiam thiab hwm kuv tiag.”
Kuv hais li no yog hais txog kev sim thiab koj yuav nco ntsoov tias : ntawd yog qhov pib ntawm kev sim. Tswv Ntuj tau sim Has Nplas Has, kev sim nws yog dab tsi ne ? Koj nyiam Tswv Ntuj, koj hwm Tswv Ntuj thiab koj txais txiaj ntsim ntawm Tswv Ntuj. Tswv Ntuj tau pub txiaj ntsim rau koj txhua txhua lub sij hawm, yog qhov koj tab tom ua thiab txoj sia txoj pa. Tas txhua yam no puav leej yog paj tshab tuaj ntawm Tswv Ntuj tuaj. Tsis hais kuv yuav ntsib dab tsi thiab muaj tej yam zoo zoo tshwm sim rau kuv, nws yog qhov paj tshab Tswv Ntuj muab rau kuv, thiab yog qhov zoo tshaj plaws. Tab sis kuv yuav nyiam Tswv Ntuj tau li cas ? Puas yog kuv nyiam Tswv Ntuj, vim tej yam zoo zoo uas Tswv Ntuj pub rau kuv ? Puas yog kuv nyiam nws, vim nws yog nws ?
Kuv nyiam cov txiaj ntsim tuaj ntawm Tswv Ntuj tuaj, los yog kuv nyiam Tswv Ntuj ? Koj puas nco zaj hais txog Yob lawm ? Nws kuj yog zoo tib yam li ntawd. Tswv Ntuj hais rau Xas Tas tias : “Koj puas pom kuv tus tub txib Yob ?
Tas ib tsoom neeg feem coob yog neeg phem, tab sis kuj tseem tshuav Yob. Nws yog ib tug neeg ncaj, nws thoob tsib thiab nws yog neeg siab zoo.”
Xas Tas teb Tswv Ntuj tias : “Yog kawg ! Vim koj tau pub txhua yam zoo zoo rau nws. Nws thiaj ua txhua yam tiav thiab nws tsev neeg huam vam. Nws tsis muaj dab tsi dhau ntawm nws txoj kev nplua nuj, kev muaj suab muaj npe, thiab yog tus sawv daws nyiam. Koj yog tus pub tas txhua yam txiaj ntsim no rau nws lawm.”
Kev sim siab thiaj tshwm sim tuaj. Tswv Ntuj cia Xas Tas tuaj txeeb txhua yam mus. Lub ntsiab nyob hauv phau ntawv Yob, yog qhov Yob hais tias : “Tswv Ntuj pub thiab Tswv Ntuj rov thau mus lawm. Thov qhuas txog Tswv Ntuj lub npe.”
Qhov ntawd puas yog Yob yws yws ne ? Yog kawg ! Yuav tsum raug kev tsim txom. Yog, qhov ntawd yog tas txhua yam nyob hauv phau ntawv Yob.
Tab sis qhov kawg Yob ua tim khawv txog qhov tseeb tias ; nws tsis yog nyiam Tswv Ntuj cov txiaj ntsim, nws nyiam yog Tswv Ntuj. Koj yuav nyeem nyob hauv Leej Ntshiab Zam ntawm tus ntoo cuam, thaum nws hais txog hmo ntuj tsaus dub nciab ntawm fab ntsuj plig. Nws tsis tau hais txog kev tu siab, nws tab tom hais txog qhov rhuav tshem txhua yam txiaj ntsim nyob hauv peb lub cev thiab tus ntsuj plig. Yog kuv ntiab txhua yam ntawd tawm mus, kuv yuav tshuav dab tsi, kuv tsuas tshuav Tswv Ntuj xwb.
Kuv nyiam Tswv Ntuj cov txiaj ntsim los nyiam Tswv Ntuj ? Yog ib lo lus nug uas tseem ceeb nyob hauv fab ntsuj plig. Nyob hauv lub ntiaj teb no, txoj kev no puas yooj yim taug ? Yog zoo li qhov Yob hais thiab Has Nplas Has hais. Tswv Ntuj yog tus pub thiab qee zaus Tswv Ntuj rov muab thau mus lawm. Tswv Ntuj lub hom phiaj uas loj tshaj, puas yog lub hom phiaj ntawm kev nyiam kev hlub mus li ? Yog kawg ! Tswv Ntuj yog kev nyiam kev hlub. Peb puas yuav ntsia pom meej tseeb nyob hauv peb mus li raws cov lus hais ? Tsis pom ! Vim ntawd yog kev sim uas Has Nplas Has ntsib nyob saum lub roob Mos Lis Yas, thiab Yob ntsib nyob hauv pawg quav chiv. Nws raug tub sab lwg tag txhua yam.
Ib qhov ntxiv : peb nco txog thaum Yes Xus dai saum Ntoo Cuam, nws ris dab tsi nyob saum Ntoo Cuam ? Nws nyob hauv kev tsim txom, nws cov phooj ywg tso nws tseg, lawv khiav tas. Cov tub rog puas hwm nws ? Lawv tsis hwm, lawv nto qaub ncaug rau nws. Hais txog lub cev ntaj ntsug, puas noj qab nyob zoo ? Nyob tsis zoo, vim nws tab tom yuav tuag. Nws zoo li Has Nplas Has nyob saum lub roob Mos Lis Yas, nws zoo li Yob nyob hauv pawg quav chiv.
Yes Xus raug ntsia nyob saum Ntoo Cuam thiab nws hais dab tsi ?
Yes Xus hais tias : “Txiv, thov koj zam rau lawv, vim lawv tsis paub tias lawv tab tom ua dab tsi. Kuv thov tso kuv txoj sia rau hauv koj txhais tes.”
Dab tsi tshwm sim nyob saum lub roob Tas Npos, lub roob ntawm kev pauv ntxeev ?
Nyob ntawd muaj Pob Zeb, Yas Kos thiab Zam. Lawv pom tas cov hauj lwm Yes Xus ua, lawv pom tas txhua yam kev pauv ntxeev. Tswv Ntuj lub hwj chim raug nthuav tawm, hloov ci ntsa iab. Qhov ntawd yog qhov Tswv Ntuj nyiam peb, tab txawm peb ntsia tsis pom kuj xij. Peb ntsia tsis pom Tswv Ntuj lub hwj chim, peb cov txiaj ntsim raug txeeb mus lawm, tsis kav peb nyiam thiab hwm Tswv Ntuj.
Lub Caij Plaub Caug thiaj yog lub caij peb rov sim peb tus kheej. Peb yuav rov nug peb tus kheej tias : “Peb nyiam Tswv Ntuj cov txiaj ntsim los peb nyiam Tswv Ntuj ?”
Nyob hauv lub caij no, peb yuav xav txog peb cov txhaum ntau dua. Thov Tswv Ntuj foom hmoov zoo rau koj !
