Pib ua hauj lwm. (Get to work)
Hnub no peb hais txog kev tsuj xeeb nce mus saum Ntuj Ceeb Tsheej. Yog kev tsuj xeeb uas tseem ceeb kawg thiab muaj kev ntxim siab txog fab ntsuj plig. Ua ntej no kuv xav kom koj muab siab rau, vim nov yog thawj zaj nyeem nyob hauv cov Hauv Paus Xa Lus tej hauj lwm thiab yog qhov pib ntawm lo lus loj. Yes Xus sawv rov qab los thiab nws nrog cov Thwj Tim nyob saum roob.
Peb yuav mloog ua ke : Thaum lawv sib sau nyob ua ke lawm, lawv nug Yes Xus tias : “Huab Tais, koj puas yuav txhim ib lub tsheej rau cov His Xas Lais ?” Qhov no yog qhov lawv pom, lawv pom Yes Xus sawv rov los. Lawv paub tias tus txiv neej uas tab tom piav txog Ntuj lub Ceeb Tsheej tuaj txog ze lawm, nws yog leej twg.
Tej zaum lub caij ntawd Yes Xus teb lawv tias : “Tsis yog nej hauj lwm uas yuav paub lub caij los yog paub tias Leej Txiv yog tus teeb tseg. Tab sis nej yuav tau txais lub zog thaum Leej Ntuj Plig Ntshiab nqes los nyob hauv nej, thiab nej yuav ua tim khawv txog kuv nyob Yes Lus Xas Les thiab ntawm ib zeej tsoom neeg xub ntiag.”
Nov kuj yog qhov tseem ceeb rau peb ib yam li cov Thwj Tim. Peb kheev kheev nug Tswv Ntuj tias :
“Huab Tais, thaum twg tej yam no mam li ua tiav ? Peb ua lub neej nyob nrog kev txom nyem thiab peb muab siab rau ua lub neej raws qhov ncaj hauv sab ntsuj plig. Tswv Ntuj hais rau peb tias ; nws yuav ua kom lub Ceeb Tsheej tshwm sim. Nws puas yuav tshwm sim ne ? Txhua yam no yog hais txog dab tsi ? Hnub twg txhua yam no thiaj yuav tiav?” Kuv xav tias yog lo lus nug tseeb kawg thiab peb kuj tau hnov lo lus teb. Qhov ntawd yog qhov Tswv Ntuj tsis ntxhov siab. Ntawd tsis yog lo lus nug uas koj yuav daws kho. Ntawd yog ib qhov teeb meem ntawm Tswv Ntuj lub hom phiaj.
Li ntawd, thov xav txog lub Koom Txoos cov liv xwm nyob hauv ntau pua xyoo dhau los. Tib neeg ntau txheej ntau tiam kuj nug tib lo lus ntawd thiab peb kuj nug. Ces lo lus teb uas peb tau txais, yog lo lus tias : “Tsis yog qhov Tswv Ntuj ntxhov siab.”
Tab sis dab tsi uas Leej Ntuj Plig Ntshiab lub zog yuav tuaj nrhiav koj, thiab tam sim no koj yuav ua tim khawv nyob ntawm ib tsoom neeg xub ntiag.
Hais ib qho ntxiv tias : txhob ntxhov siab txog kev daws txhua yam teeb meem zaum kawg, tab sis yuav nqis tes ua kiag. Kuv kheev kheev xav tias kev nce mus saum ntuj, yog kev yug mov hauv kev pib hauj lwm. Vim Tswv Ntuj txav mus nyob qhov chaw siab thiab nws xa Leej Ntuj Plig Ntshiab nqes los. Qhov ntawd yog lwm lub lis piam nyob hauv lub caij Pentecost uas peb yuav tsuj xeeb.
Tswv Ntuj tso Leej Ntuj Plig Ntshiab nqes los, kom peb tau txais lub zog ua nws cov hauj lwm nyob hauv lub ntiaj teb no.
Lo lus nug kawg, yog thaum twg txhua yam mam li ua tiav ? Tsis txhob ntxhov siab thiab pib nqis tes ua kiag. Tam sim no kuv hais txog Yes Xus tus uas nce mus saum qhov chaw siab. Kuv xav tuav qhov ntawd cia, vim kuv xav tias nws pab kom zaj no tseeb tuaj. Txhob xav tias kev nce mus saum ntuj yog qhov Yes Xus maj mam ploj mus saum ntuj. Tab txawm Yes Xus ploj ntais ntawm qhov pom kev, kuj zoo li nws tawm ntawm lub hnub mus. Txhob xav tias kev nce mus saum ntuj yog Yes Xus hloov mus nyob qhov chaw siab. Peb hu ua Ntuj Ceeb Tsheej. Ntuj Ceeb Tsheej yog lub cim ntawm lub ntuj, cov huab thiab cua. Yog lub cim qhia txog yam nyob siab dua peb.
Yes Xus lub cev tau mus thoob Nkas Lis Lais thiab Yus Das nyob hauv thawj tim neeg. Tam sim no Yes Xus tau mus saum ntuj Ceeb Tsheej uas nyob siab, thiab tej zaum kuj yog peb txhua tus. Peb uas yog cov tim xyoob ntawm Yes Xus lub Cev Ntshiab.
Hais txog kev nce mus saum ntuj ntawm Yes Xus, tsis yog tias Yes Xus nce mus siab zuj zus, nws txawv qhov peb xav ntawd. Yes Xus nce mus saum ntuj, yog qhov nws nyob ze peb tshaj qhov uas nws tau mus saum lub roob Nkas Lis Lais.
Thaum Xas Ws tab tom mus Das Mas, Yes Xus yees tawm tuaj rau nws pom.
Xas Ws hiam lub Koom Txoos.
Yes Xus hais rau Xas Ws tias : “Xas Ws ! Xas Ws ! Vim li cas koj hiam kuv ?”
Kev hiam lub Koom Txoos, lub Koom Txoos yog Yes Xus lub cev. Xas Ws hiam lub Koom Txoos, ces yog nws tab tom hiam Yes Xus. Qhov ntawd yog Yes Xus kev nce mus saum ntuj uas nyob ze peb.
Tam sim no kuv coj peb los nyeem zaj nyeem 2 uas yog tsab ntawv Paj Lug sau mus rau cov ntseeg nyob Es Fes Xos. Koj yuav muab koj phau Ntawv Ntshiab los thiab koj saib nyob hauv zaj ib. Yog cov Nkauj Paj Nruag cav lus zoo txog Yes Xus uas peb tab tom nyeem.
Peb yuav mloog ua ke : “Tsa Yes Xus sawv hauv qhov tuag los, thiab zaum nyob ntawm Leej Txiv phab xis nyob saum ntuj.” Peb txhob maj xav tias Yes Xus nyob saum ntuj, ces nws nyob siab dua lub hli. Thov peb xav tias Yes Xus nyob rau ib qho chaw uas siab tshaj. Siab tshaj lub Ceeb Tsheej, lub meej mom thiab lwm lub ceeb tsheej, lwm lub npe. Tsis hais tiam no thiab tiam tom ntej, Yes Xus tso txhua yam nyob ntawm nws ko taw. Li ntawd, qhov no yog daim duab hais txog Yes Xus nce mus saum ntuj thiab ua vaj nyob mus li. Peb tig rov mus saib cov lus nthuav ntawv Moo Zoo, peb txhob saib saum ntuj thiab txhob xav tias Yes Xus yuav los hnub twg. Peb nqis tes ua kiag, ces Tswv Ntuj yuav xa Leej Ntuj Plig Ntshiab tuaj nrog lub zog, Tswv Ntuj yuav ua tus coj koj kev. Tus sau tsab ntawv pom meej tseeb tias : Yes Xus los ntshav nyob saum ntoo cuam thiab nws yog tus tseem yaj saub tiag. Yes Xus cov Ntshav yog cov ntshav them peb cov txim txhaum. Yes Xus tus Ntoo Cuam yog lub cim ntawm Tswv Ntuj thiab ntiaj teb neeg rov sib haum xeeb. Qhov no yog qhov sib txuas ntawm kev nce mus saum ntuj, vim Yes Xus tsis yog ib tug neeg dog dig zoo li peb. Yes Xus yog Tswv Ntuj ntawm Tswv Ntuj. Yog qhov pom kev ntawm qhov pom kev. Yog tus Tswv Ntuj tseeb tiag ntawm tus Tswv Ntuj tseeb tiag. Yam Yes Xus ua nyob saum Ntoo Cuam, yog qhov nyob mus li. Tsis yog tshwm sim nyob hauv ib qho chaw twg thiab 2000 xyoo dhau los xwb.
Li ntawd, tsa muag saib saum ntuj thiab koj yuav hais tias : “Yes Xus yuav rov tuaj thaum twg ? Tswv Ntuj puas yuav txhim tsa ib tsheej tshiab ? Tas txhua yam no yog dab tsi ? Thaum twg peb mam nkag siab ?” Thov koj txhob ntxhov siab txog tej yam ntawd, vim Leej Ntuj Plig Ntshiab yuav nqis los nyob hauv koj. Koj nqis tes ua kiag thiab ua raws li nws cov lus hais. Ua raws li Leej Ntuj Plig Ntshiab lub zog txhib kom koj ua. Tab txawm koj tsis to taub tias koj tab tom ua dab tsi, kuv qhia koj tias :
“Sib koom teev Ntuj thiab koom cev cov txim hauv lub thaj txi Ntuj. Ob yam no yog qhov tseem ceeb ntawm hnub ua hmoov nco txog Yes Xus nce mus saum ntuj.”
Thov Tswv Ntuj foom hmoov zoo pub rau nej
