Lo lus pub txoj sia lub 11 hlis 2024. (Word of Life)
“Tus poj niam no nws pluag txom nyem, tab sis nws muab tas nws lub cuab tam uas nres nws txoj sia los tso rau hauv.”
Nyob hauv Mas Kos ntawv Moo Zoo zaj 12 ntu kawg, yog hais txog Yes Xus nyob hauv lub tuam tsev teev Ntuj nyob Yes Lus Xas Les. Yes Xus ntsia ntsoov thiab nws qhuab qhia tsoom pej xeem. Nws pom cov neeg coob coob mus mus los los. Muaj ib txhia tab tom chaws mus hauv tsev teev Ntuj, hos muaj ib txhia tawm hauv tsev teev Ntuj mus. Muaj ib txhia chaws mus kom tau teev Tswv Ntuj, muaj ib txhia hnav tej lub tsho tshaj sab ntev ntev. Cov neeg nplua nuj lawv tso nyiaj rau hauv lub xab ceev nyiaj. Lub caij ntawd, muaj ib tug poj ntsuam pluag pluag chaws los. Tsis muaj leej twg quav ntsej txog nws. Tus poj ntsuam ntawd tso 2 lub txiaj toog me me tsis muaj nqis dab tsi rau hauv lub xab nyiaj. Yes Xus pom tus poj ntsuam ua li ntawd, nws hu cov Thwj Tim los, nws hais tias : “Tus poj niam no nws pluag txom nyem, tab sis nws rho tas nws lub cuab tam uas nres nws txoj sia los tso rau hauv.”
Qhov tiag tiag lo lus no yog lo lus tseem ceeb uas Yes Xus siv los qhia tias : Yes Xus lub ntsiab muag ntsia pom txog tus poj ntsuam pluag txom nyem, ua kom peb yuav tsum ntsia pom luag tej ib yam li Yes Xus. Tus poj ntsuam ntawd yog tus piv txwv zoo rau Yes Xus cov Thwj Tim. Tus poj ntsuam ntawd ntseeg thiab cia siab rau Tswv Ntuj txoj kev nyiam kev hlub, nws lub txhab nyiaj yog Tswv Ntuj. Nws zoo siab muab nws tus kheej cev rau Tswv Ntuj. Nws xav muab tas txhua yam uas nws muaj pub rau cov neeg pluag dua nws. Kev muab tus kheej cev rau Leej Txiv nyob hauv txoj kev cia siab, yog zoo li tus piv txwv qhia ua ntej txog Yes Xus txoj kev raug txom nyem thiab txoj kev tuag.
Qhov no yog lub siab txom nyem thiab lub siab dawb huv uas Yes Xus qhia thiab yog txoj sia. Qhov no yog lub ntsiab ntawm Tswv Ntuj cov lus hais tias : “Txhob cia siab rau koj lub cuab tam, koj yuav cia siab rau Tswv Ntuj txoj kev nyiam kev hlub.”
Peb muaj lub siab pluag txom nyem, yog thaum peb muab kev nyiam kev hlub rau lwm tus ua tus coj peb lub neej. Li ntawd, peb yuav faib thiab muab yam peb muaj pub rau cov neeg pluag txom nyem. Tsis hais lub suab luag, lub sij hawm, toob xib puaj yam thiab lub peev xwm. Thaum peb faib los pub yam peb muaj rau lwm tus nyob hauv kev nyiam kev hlub, mas peb yuav yog tus pluag txom nyem. Peb yog tus neeg tsis muaj dab tsi, peb nyob ywj siab, peb tsis xav txog dab tsi ntxiv, ces peb yuav muaj lub siab dawb huv. Yam uas Yes Xus qhia peb no, yuav hloov peb lub tswv yim qab tes ua qaum tes, vim qhov tob ntawm Yes Xus txoj kev xav yog cov ua neeg me, cov pluag txom nyem thiab cov neeg txheej qis hauv zej zog.
“Tus poj niam no nws pluag txom nyem, tab sis nws rho tas nws lub cuab tam uas nres nws txoj sia los tso rau hauv.”
Lo lus qhia no, ua ntej thov caw peb rov xav txog peb txoj kev cia siab uas peb muaj rau Tswv Ntuj thiab hloov peb lub ntsiab muag kom zoo li Yes Xus nyob hauv kev ntsia txhua yam uas peb pom nyob sab nraud. Txhob txiav txim, txhob mloog lwm tus thiab yuav saib lwm tus mus rau qhov zoo.
Kev muab tus kheej cev rau Tswv Ntuj raws li ntawv Ntshiab, pab txhim kho kom zej zog nyob thaj yeeb. Vim yam no pab kom peb txawj sib hlub, pab kom peb lub neej loj hlob nyob hauv ntawv Moo Zoo, txawj ua siab loj siab dav, txawj ua lub neej nco ntsoov, txawj sib faib thiab muab siab rau hlub cov neeg me.
Ves Nas yug thiab loj hlob nyob teb chaws Npus Lus Ntis, nws piav hais tias :
“Nyob hauv peb lub zos, peb yim neeg muaj liaj teb zoo ua noj thiab sau tau qoob loo ntau kawg. Kuv muab tas cov qoob loo uas peb sau thawj zaug thiab coj mus faib rau cov neeg pluag txom nyem tshaj nyob hauv peb lub zos. Ces kuv tsev neeg tshuav qoob loo tsis ntau pes tsawg lawm. Tab sis qhov no ua rau kuv paub txog kev pub rau luag tej thiab tsis vam txog kev pauj rov qab.
Kuv nkag siab tias : Tswv Ntuj hu kom kuv muab yam zoo ntawm kuv cev rau Tswv Ntuj. Qhov ntawd yog muab tas kuv lub neej txoj sia cev rau nws.”
Sau los ntawm Leticia Magri thiab pab neeg lo lus pub txoj sia.
