Koj puas tau khiav tawm ntawm Tswv Ntuj mus (Away from God)
Peb pib los rau lub lis piam ob hauv lub Caij Tos Huab Tais thiab hais txog tsim ntau txoj tuam kev. Tam sim no nws muaj dab tsi tshwm sim nyob ntawd ? Thiab vim li cas thiaj siv yam no los ua lub Cim ntawm fab ntsuj plig ?
Ua ntej no peb yuav nco ntsoov qhov tseem ceeb ntawm lub ntsiab lus hais txog kev ntiab nyob hauv Ntawv Ntshiab. Tsis hais ntawv Cog Lus Qub los yog ntawv Cog Lus Tshiab. Ntau zaus cov His Xas Lais pom tias lawv nyob hauv kev raug ntiab tawm. Sim xav txog thaum lawv raug yuam ua qhev nyob Hais Nkws Tos teb. Sim xav txog cov haiv neeg nyob Xis Lias qaum teb raug ntiab tawm. Sim xav txog cov haiv neeg nyob Lis Npaas qab teb raug ntiab tawm. Cov His Xas Lais tab tom raug ntiab tawm mus ntawm thaj av lawv cog lus. Li ntawd, kev cia siab loj uas koj ib txwm hnov nyob hauv Ntawv Ntshiab yog qhov tias : ib hnub twg cov raug ntiab thiab cov ua qhev yuav rov qab los. Lawv yuav rov los nyob hauv lawv tej qub chaw. Kev raug ntiab tawm thiab kev rov los yog lub zog txhawb siab loj kawg.
Thawj zaj nyeem yog nyob hauv ntawv Npas Lws. Npas Lws yog Yes Les Mias tus phooj ywg, nws yog zoo li tus pab Yes Les Mias. Thov nej mloog zaj no !
“Thov sawv ! Yes Lus Xas Les, koj sawv nyob saum qhov chaw siab. Tig ntsia mus rau sab hnub tuaj, ces koj yuav pom koj cov me nyuam uas sau tas sab hnub tuaj thiab sab hnub poob los ua ke raws li tus ntshiab hais.” Qhov muab los hais ntawm no yog qhov hais taw ntsees txog lub ntsiab. Lawv raug ntiab tawm ntawm Npas Npis Los teb mus, tus uas raug thau tawm ntawm Yes Lus Xas Les thiab Yus Das teb raug xa rov qab mus Npas Npis Los. Tam sim no lawv tab tom taug kev rov qab thiab Npas Lws kuj qhuas tias : “Sawv daws saib seb ! Lawv rov qab los lawm. Muaj txoj tuam kev coj cov raug ntiab mus rov qab los.” Rov mloog dua ib zaug ntxiv ! “Lawv raug cov yeeb ncuab txhais taw cab mus, lawv tso koj pov tseg. Koj yog leej twg ? Koj yog lub nroog Yes Lus Xas Les. Tswv Ntuj yuav coj lawv rov qab los cuag koj. Lawv yuav yug los nyob qhov chaw siab muaj hwj chim ib yam li zaum nyob ntawm tus vaj lub kim txwv.”
Yam uas lawv tab tom hais txog yog qhov tias : “Kuv paub tias lawv raug coj mus xws li cov neeg raug txim uas txaus khuv leej nyob hauv kev puas tsuaj thiab kev txaj muag. Tab sis tam sim no lawv rov los ntawm txoj tuam kev uas Tswv Ntuj txhim rau lawv. Lawv yuav zoo li tus vaj thiab vaj tus tub nyob ntawm tus vaj lub kim txwv.”
Tus qauv yog li no : Tswv Ntuj yuav txhim txoj tuam kev rau Tswv Ntuj haiv neeg raug ntiab kom tau rov qab los. Qhov ntawd yog ib qho liv xwm txheej thaud uas ntxim siab kawg hais txog Npas Npis Los, His Xas Lais thiab cov raug ntiab uas rov los ntev heev lawm. Tab sis vim li cas peb thiaj nyeem cov lus no thiab vim li cas kuv thiaj nthuav txog zaj no nyob hauv lub Caij Tos Huab Tais ? Vim kev raug ntiab yog qhov zoo nyob hauv Ntawv Ntshiab thiab yog lub Cim ntawm kev raug ntiab fab ntsuj plig.
Li ntawd, cov raug ntiab tawm yog tawm hauv kev tseev tsim tiag tiag, tab sis nyem no thov xav tias lawv yog lub Cim ntawm txhua txoj kev uas peb kheev kheev yuam kev ntawm Tswv Ntuj. Thaj av cog lus los thaj av ntshiab yog qhov sawv cev ntawm kev ua phooj ywg nrog Tswv Ntuj, hais tias peb muaj kev sib raug zoo nrog Tswv Ntuj. Peb tab tom ua raws Tswv Ntuj cov lus, peb tab tom ua lub neej phooj ywg nyob hauv Tswv Ntuj. Kev raug ntiab, kev ua qhev thiab txhua lub tswv yim uas peb yuam kev ntawm Tswv Ntuj. Peb pom tias peb tus kheej nyob hauv thaj av uas deb fab ntsuj plig.
Leej Ntshiab Aus Nkus Tis Nus hais txog thaj av uas tsis zoo ib yam. Li ntawd, peb raug tsim los raws li Tswv Ntuj tus duab thiab peb raug teeb tseg kom haum rau yam ntawd. Tab sis peb yuam kev hauv thaj av uas tsis zoo ib yam no.
Tswv Ntuj hais tias : “Thaj av ntawm qhov tsis zoo ib yam.” Peb txhua tus puav leej yog cov raug ntiab, peb sawv daws nyob hauv txoj kev txhaum. Peb yog kev txhaum cov qhev, ces pom tias peb tus kheej nyob ntawm thaj av deb deb, peb nyob ib leeg twm zeej. Nej nco puas tau zaj hu nkauj loj hauv lub Caij Tos Huab Tais ?
“Los mas Es Mas Nus Es, los txhiv His Xas Lais cov txhaum. Tus nyob ntsoos ntsoos thiab raug ntiab tawm.” Qhov ntawd yog lub ntsiab ntawm zaj nkauj. Li ntawd, thaum koj tau hnov zaj nkauj cav txog lawm. Kuv ntseeg tias koj yeej tau hnov dua los lawm nyob hauv lub Caij Tos Huab Tais, nws yog ib zaj nkauj zoo heev. Cov suab paj nruag thiab cov ntsiab lus zoo heev. Ntawd yog zaj hu nkauj uas kuv tab tom hais txog.
“Los mas Es Mas Nus Es, los txhiv His Xas Lais cov txhaum. Tus nyob ntsoos ntsoos thiab raug ntiab tawm.”
Lawv tab tom thov dab tsi ? Lawv tab tom thov tias :
“Tswv Ntuj ! Thaum twg koj thiaj mam txhim txoj tuam kev rau peb los cuag koj ?” Ntawd yog qhov Npas Lws tab tom hais txog. Ntawd yog qhov peb tab tom nyeem zim txwv no. Kev ntiab tawm fab ntsuj plig yog zoo li cas ? Sim xav txog tus neeg quav yeeb, nws nyob nws ib leeg, nws tsis quav ntsej txog lwm yam hais txog Tswv Ntuj. Yam nws xav tias zoo, yog kev tsis ncaj ncees thiab tsis muaj kev zam txim. Sim xav txog tej yam no seb puas yog teeb meem ? Los yog sim xav txog tej daim duab nyob hauv Ntawv Ntshiab, xws li cov roob siab uas tav peb kev mus rau thaj av cog lus, los sis cov roob loj uas tav peb kev thiab ua rau peb rov qab nyuab heev. Peb tau hnov dab tsi los ntawm tus yaj saub His Xais ? Tswv Ntuj yuav ncaws cov hauv roob kom tiaj, Tswv Ntuj yuav txhub cov hauv roob kom ua txoj tuam kev tus tus thiab ncaj qha mus txog Tswv Ntuj. Qhov ntawd yog qhov peb tshaib nqhis txog, yog yam peb tab tom tsa tes thov. Tam sim no peb xav paub tias Yes Xus yog leej twg ? Puas yog tus yaj saub ntxim nyiam, tsis yog. Puas yog tus xib hwb ntxim nyiam ntev los lawm, tsis yog. Yes Xus hais txog nws tus kheej li cas ?
Nws hais tias : “Kuv yog txoj kev, yog qhov tseeb thiab yog txoj sia.”
Peb hais txog thawj nqe lus, kuv yog txoj kev. Yog txoj tuam kev thiab yog txoj kev. Vim li cas Tswv Ntuj thiaj tso Yes Xus nqes los hauv ntiaj teb ? Tswv Ntuj xa Yes Xus tuaj kom tau ua txoj kev rov qab mus cuag Tswv Ntuj. Li ntawd, yog koj paub tias koj nyob Npas Npis Los, koj paub tias koj raug quab yuam nyob Hais Nkws Tos teb, koj twm zeej fab ntsuj plig, koj xav rov mus tsev. Txoj kev ntawd nyob ntawm koj xub ntiag lawm. Kev tsim txoj tuam kev ntawd nws tiav lawm, vim Yes Xus yog txoj tuam kev ntawd. Koj puas xav rov mus tsev ?
Tej zaum qee zaus, qee leej tab tom mloog kuv hais zim txwv no. Koj yuav pom tias : “Kuv nyob nrug deb ntawm Tswv Ntuj kawg. Kuv yuam kev mus deb ntawm kev ua lub neej nyob hauv lub Koom Txoos. Kuv tsis tau mus txais cov Cim Ntshiab los ntau tiam neeg thiab tsis tau mus daws txhaum los yog txais lub Cim Yug. Kuv poob nyob hauv kuv txoj kev txhaum, nws tsis yog li ntawd. Advent yog koj lub caij nyoog thiab nyob ntawm koj tes. Yes Xus cia koj ua txoj kev. Yes Xus yog tus kho cov hauv roob. Yes Xus yog tus txhub cov hauv roob kom tiaj, thov koj raws Yes Xus qab mog !
Peb tau hnov zaj no nyob hauv Ntawv Ntshiab pes tsawg zaus tias :
“Los raws kuv, kuv yog lub qhov rooj. Chaws los ntawm kuv.” Nws yog tib lub tswv yim uas hais tias Yes Xus yog txoj tuam kev. Hnub no koj tau hnov nyob hauv ntawv Moo Zoo, yog hais txog Zam Ntxuav Plig. Zam yog tus neeg tseem ceeb nyob hauv lub Caij Tos Huab Tais.
Li ntawd, nws thiaj tab tom piav txog nws txoj hauj lwm puas yog ? Zam yog leej twg ? Zam hais tias : “Kuv yog lub suab hu hauv teb chaws suab puam. Nej npaj Tswv Ntuj txoj kev kom txhij thiab txhub nws txoj kev kom tiaj, kho kom ncaj.”
“Txhua lub roob yuav puv, txhua lub roob yuav qis, txhua tus neeg yuav pom Tswv Ntuj txoj kev cawm.” Tswv Ntuj tau npaj txoj tuam kev nyob hauv Yes Xus lub npe. Tab sis nws muaj hauj lwm rau peb ua thiab puas yog ? Kuv thov muab Kav Tos Liv tus qauv tso rau ntawm koj puas tau ? Tswv Ntuj tsim peb los ntawm qhov tsis tau txais peb kev koom tes. Qhov ntawd yog qhov tseeb tiag, vim peb tsis tau nyob ntawd koom tes nrog Tswv Ntuj puas yog ? Qhov ntawd yog Tswv Ntuj lub txiaj ntsim. Tswv Ntuj pab peb tsis tau, yog tsis tau txais kev koom tes ntawm peb. Txhob xav tias : “Tswv Ntuj yog tus neeg ua nyuab.” Ntawd yog kev xav hauv fab ntsuj plig xwb. Koj puas pom tias kev cawm yog dab tsi ? Kev nyiam kev hlub uas muaj rau Tswv Ntuj xwb thiaj yog qhov tsa kom kev nyiam kev hlub sawv. Yes Xus yog txoj kev, ces koj yuav raws nws. Koj yuav koom tes nrog nws, koj yuav taug txoj kev ntawd.
Ib qho nyob hauv lub Caij Tos Huab Tais, yog qhov peb yuav tsum txhim txoj tuam kev. Peb yuav khawb cov hauv roob thiab txhub av rau, peb yuav rov npaj dua Tswv Ntuj txoj kev. Kuv thov nug koj puas tau ? Koj puas tau npaj siab li cas ?
Thawj lo lus yog thov Ntuj : txhais tias qhib koj lub siab rau Tswv Ntuj. Tig mus nrog Tswv Ntuj sib tham ib yam li koj ua rau koj cov phooj ywg. Nrog Tswv Ntuj sib tham thiab hais tias : “Tswv Qhia, kuv tsis tau mus tsev teev Ntuj ntev heev los lawm. Kuv tsis tau txais cov Cim Ntshiab thiab kuv tsis tau teev Ntuj los ntev lawm.”
Yog tias koj tsis paub teev Ntuj, mas koj yuav hais tias : “Tswv Ntuj, kuv tsis paub teev Ntuj.” Ntawd yog koj teev Ntuj lawm, puas yog ? Nws yooj yooj yim li ntawd xwb.
Tig mus cuag Tswv Ntuj thiab thov Leej Niam tus tau txais koob hmoov. Tig mus cuag Tswv Ntuj thiab hais tias : “Tswv Ntuj, kuv tsis paub yuav teev Ntuj li cas. Tab sis Tswv Qhia yuav kom kuv teev Ntuj, ces kuv yuav teev Ntuj li cas ? Tej lus koj hais ntawd yog koj tab tom teev Ntuj ntag. Tej zaum koj muaj txoj Saw Mab Liab, tab sis nyob hauv ib qho twg lawm. Tej zaum koj niam tab tom teev Ntuj, thiab koj yeej muaj txoj Saw Mab Liab, tab sis koj tsis nco teev Ntuj. Tej zaum txoj Saw Mab Liab khuam nyob ntawm daim tsom iav, tiam sis koj tsis tau teev Ntuj tiag tiag. Ces thov koj teev Ntuj hauv lub Caij Tos Huab Tais no. Hais txog lub thaj txi Ntuj, yog koj tsis tau mus tsev teev Ntuj thiab muaj tseeb kawg uas cov neeg ntseeg feem coob tsis tau mus tsev teev Ntuj. Txog koj lub caij lawm, ces koj yuav hnov Tswv Ntuj lub suab hais tias : “Thov npaj koj txoj kev uas kuv twb tau npaj tseg lawm. Nws yog Yes Xus.”
Nov yog lo lus qhia tim 2 : yog hauv koj lub neej quav yeeb quav tshuaj qee yam, thiab koj paub tias tej yam ntawd yog teeb meem qub qub uas lawv hu ua kev nyiam ntawm txheej thaud. Tab sis kuv hais tias yog kev quav yeeb quav tshuaj zim txwv no. Nws hloov tau txhua yam tsis yog Tswv Ntuj kom yog Tswv Ntuj. Ces koj yuav to hau ntsoov nyob nrog nws, vim nws tsis tuaj yeem ua raws koj siab nyiam.
Cov neeg uas quav dej quav cawv, quav yeeb quav tshuaj thiab kev sib deev, yog teeb meem nthuav dav nyob hauv peb txheej neeg zim txwv no. Yog koj lub neej quav yeeb quav tshuaj thiab kuv paub tias koj yuav ntiab kom nws tawm mus tsis tau, ces koj yuav thum kom tas txhua yam ntawd nyob hauv lub Caij Tos Huab Tais no.
Ua qee yam mus tom ntej, muab koj lub neej cev rau Tswv Ntuj thiab hais tias :
“Tswv Ntuj ! Kuv nyob hauv yam kuv ua no thiab kuv rhuav tshem tsis tau. Kuv thov muab cev rau koj.” Thov tso tseg kev quav yeeb quav tshuaj nyob hauv lub Caij Tos Huab Tais no.
Lo lus qhia tim 3, yog tias muaj qee yam ntxhov nyob hauv koj lub neej, mas thov koj ua ib yam hais txog qhov ntawd nyob hauv lub Caij Tos Huab Tais no thiab. Ces koj yuav pom ib yam tseem ceeb nyob hauv koj lub neej uas yog kev khav theeb qhia koj tias : “Kuv ua tau yam no lawm.” Koj yuav ua rau luag tej pom tias koj yog neeg me, vim tias tej zaum kev xam khib yuav ua teeb meem rau koj. Koj yuav nrhiav tus neeg xam khib thiab qhuas tus neeg ntawd thiab hais zoo zoo rau nws txog koj. Tej zaum kev ntshaw ub ntshaw no yuav ua teeb meem rau koj, vim koj ntshaw yam ub yam no hauv lub ntiaj teb no dhau. Thov koj ua li tus neeg pluag txom nyem nyob hauv lub Caij Tos Huab Tais no, ces tej zaum koj yuav txawj faib yam koj muaj rau lwm tus. Thov ua siab loj siab dav, vim tam sim no muaj txog pua txhiab yam uas kuv yuav hais. Thov koj tig mus saib 7 yam kev txhaum, vim kuv nyuam qhuav nyeem tag 3 yam xwb. Thov koj nyeem kom tag 7 yam kev txhaum thiab hais tias :
“Tswv Ntuj ! 7 yam kev txhaum ntawd npog rawv kuv, kuv yuav ua li cas los rhuav tshem cov kev txhaum uas khaub zig kuv tau ? Thov koj rhuav tshem nyob hauv lub Caij Tos Huab Tais no. Vim lub caij no yog lub caij Tswv Ntuj txhim txoj tuam kev, Tswv Ntuj cia Yes Xus ua txoj tuam kev. Thov koj tuaj ntsib Yes Xus thiab rhuav tshem lub hauv roob uas tav koj kev, txhub cov hauv roob kom tiaj. Ces koj yuav ntsib Tswv Ntuj nyob hauv lub caij Yes Xus yug los no. Thov Tswv Ntuj foom hmoov zoo rau koj !
