Kev tuag puas yog qhov xaus ? (Is Death the End ?)
Kwv tij Hmoob sawv daws ! Hnub no peb yuav los tham txog kev sawv rov qab los ntawm Las Ntxas Los, raws li kuv twb xub tau hais ua ntej txog ib tug poj niam nyob ntawm lub qhov dej, tus txiv neej uas nws dig muag nruab thiab thiab lwm tus ntxiv. Lub neej hauv fab ntsuj plig puav leej yog xaus rau tus yam ntxwv zoo nyob hauv cov zaj no. Ua ntej peb yuav mus tham txog Las Ntxas Los, lub Koom Txoos thov kom peb rov xav txog ib nqe lus me me nyob hauv Es Xes Kias zaj 37. Nws yog ib zaj nto npe hais txog cov pob txha qhuav. Thov nej nco tias : tus yaj saub tau txais kev pom ntawm cov pob txha qhuav uas hais txog kev sib ntaus sib tua thiab lub cev tuag uas lwj tag tshuav cov pob txha. Tab sis peb hnov tias Tswv Ntuj Leej Ntuj Plig Ntshiab tshuab pa los rau lawv zoo li cas. Thawj yam yog leeg thiab cev nqaij daim tawv, dhau ntawd lawv sawv tsheej ua ib pab tub rog uas muaj zog. Tswv Ntuj faib nws txoj sia nkag mus rau hauv lawv, nws yog cov His Xas Lais tus Tswv Ntuj pub txoj sia. Thaum peb hnov lo lus no “Kuv yuav qhib koj lub qhov ntxa thiab tsa koj sawv hauv lub qhov ntxa ntawd los.”
Kuv tsis paub txog koj, tab sis qhov tseeb tiag hauv kuv lub siab tsis muaj dab tsi tshaj qhov no. Los sib ntsib tim ntsej tim muag mas ! Peb txhua leej txhua tus raug kev tuag ntxias. Li ntawd, koj yuav ua dab tsi tiav nyob hauv lub neej. Koj yuav ua tiav ntau los tsawg, koj yuav tsim tau dab tsi tawm los kuj xij. Peb sawv daws yeej paub tias nws raug peb txoj kev tuag nqos mus lawm puas yog ? Qhov no thiaj ua rau coob leej xav tias : peb lub neej tsis muaj qab hau li puas yog ? Lub cev tuag yog tus hais ua zaum kawg tias : “Kuv yuav qhib koj lub qhov ntxa thiab tsa koj sawv hauv lub qhov ntxa ntawd los.” Nod yog His Xas Lais tus Tswv Ntuj tab tom hais rau peb. Tus Tswv Ntuj hauv Ntawv Ntshiab, tus Tswv Ntuj tseeb tiag thiab yog tus tsis xav tias kev tuag yog lo lus teb kawg. Tus tshaj Tswv Ntuj cov lus hais meej tias :
“Kuv yuav qhib koj lub qhov ntxa thiab tsa koj sawv hauv lub qhov ntxa ntawd los.” Tswv Ntuj yog tus Tswv Ntuj ntawm kev muaj sia, tsis yog tus Tswv Ntuj ntawm txoj kev tuag. Tswv Ntuj xav txhab txoj sia rau peb, kom tau tsa cov pob txha qhuav no sawv thiab thov xav txog ib daim duab ntawm Es Xes Kias. Kuv hais txog tias cov pob txha qhuav yog los ntawm kev sib ntaus sib tua, kuv xav txog ib qho ntawm kev tuag, yog kev ntshai tuag thiab kev ua kom tuag. Muaj cov vaj thiab cov nom noj nyiaj uas ntshai tuag. Li ntawd koj thiaj pom tias nyob hauv cov pob txha qhuav ntawd, kev tuag yog kev xav nyob hauv lub neej tas mus li. Tab sis His Xas Lais tus Tswv Ntuj muaj hwj chim loj dua kev tuag. Tswv Ntuj yog hais txog kev coj peb dim ntawm peb lub qhov ntxa. Ntawd yog hais txog Es Xes Kias tus ua Yes Xus ntej. Peb yuav tig los saib ntawv Moo Zoo thiab peb yuav pom Es Xes Kias lub hwj chim.
Tam sim no peb yuav los saib txog qhov peb xub hais ua ntej no lawm, peb yuav mloog qhov zoo zoo nyob hauv zaj no. Leej Ntshiab Zam piav tau zoo kawg nkaus. Yes Xus hais tias : “Las Ntxas Los uas yog kuv tus phooj ywg, nws tsaug zog lawm. Tab sis kuv yuav mus saib nws thiab tsa nws sawv.” Qhov tiag mas Las Ntxas Los twb tuag lawm thiab tsis muaj ib lo lus nug txog qhov ntawd. Las Ntxas Los tuag lawm, qhov txaus ntshai no los txog nws lawm. Qhov hais tias Las Ntxas Los tsaug zog puas yog tsis muaj qab hau, Yes Xus tab tom ua dab tsi ? Zoo ib yam li Yes Xus tau ua rau Yais Los tus ntxhais. Thaum cov neeg quaj ntsuag qees, vim tus me nyuam ntxhais no tuag lawm. Tab sis Yes Xus hais tias : “Tsis yog ! Tus me ntxhais no nws pw tsaug zog xwb.” Yes Xus hais li ntawd, mas lawv luag thiab thuam Yes Xus. Thaum peb tuag, peb kuj xav tias yog peb tsaug zog thiab yuav rov sawv. Kev pw tsaug zog tsis muaj hwj chim loj dua peb. Kev pw tsaug zog tsis yog qhov xaus.
Li ntawd, kev tuag zoo li yog kev pw tsaug zog, thiab tsis ntev peb yuav rov sawv.
Thaum Yes Xus tuaj txog Npes Tas Nias uas nyob nrug deb ntawm Yes Lus Xas Les tsis deb pes tsawg. Yes Xus pom lawv twb muab Las Ntxas Los zwm ntxa tau 4 hnub lawm. Leej Ntshiab Zam zeem tseeb txog dab tsi hauv zaj no ? Las Ntxas Los tuag lawm tiag tiag, tsis muaj qhov ua xyem xyav, tsis muaj lo lus nug txog. Peb yuav tsis tuaj yeem hais tias : tej zaum yog nws hnov qab lawm xwb, tab sis lawv tsis paub txog qhov no. Los sis hnov luag tej tshaj tias nws nyuam qhuav tuag li 2-3 teev ua ntej, tab sis cov neeg txheej thaud lawv tsis paub. Qhov tiag Las Ntxas Los twb tuag thiab lawv muab nws zwm ntxa tau 4 hnub lawm.
Yam uas Vaj Qhia Fas Ntshis Kus ua, yog ua kom hnub no yog hmoov tsuj xeeb. Tsis yog ua rau Mas Tas xwb, nws yog ua rau peb nus muag huv si. Xws li Mas Tas, Mab Liab thiab Las Ntxas Los. Mas Tas tawm tuaj tos txais Yes Xus, ces lawv los hauv tsev. Mas Tas hais tias : “Huab Tais, yog koj ntxov tuaj txog ntawm no, mas kuv tus nus yuav tsis tuag.” Zoo ib yam li peb, muaj qee zaus peb kuj hais tias :
“Tswv Ntuj, vim li cas tej yam no thiaj tshwm sim ? Vim li cas koj tsis pov hwm kuv ?” Tab txawm Las Ntxas Los nyob hauv qhov ntxav 4 hnub lawm, tsis kav Yes Xus hais rau Mas Tas tias : “Koj tus nus yuav rov sawv thiab muaj txoj sia ib zaug ntxiv.”
Mas Tas teb tias : “Yog lawm ! Kuv paub tias thaum txog hnub kawg, lub caij leej tib neeg lub cev ciaj rov los, mas nws yuav sawv rov los.”
Yes Xus hais tias : “Kuv yog txoj kev sawv rov los thiab yog txoj sia.”
Peb yuav nco ntsoov txog Leej Ntshiab Pob Zeb lo lus tias : “Nws yog Yes Xus, yog Tswv Ntuj Leej Tub tus muaj txoj sia.” Thiab peb yuav nco txog thaum Leej Ntshiab Tos Mas xuas ntiv tes kov Yes Xus cov qhov txhab thiab nws hais tias : “Kuv tus Tswv Ntuj.” Mas Tas ntseeg tias Yes Xus yog Tswv Ntuj Leej Tub nqes los ua neeg nyob ntiaj teb no. Mas Tas tawm mus tos Yes Xus, hos Mab Liab zaum nyob hauv tsev. Mas Tas yws yws thiab Yes Xus hais rau Mas Tas tias : “Mas Tas ! Mas Tas ! Mab Liab tau xaiv qhov yog lawm.” Yes Xus nyob hauv Mas Tas tsev thiab nws tus phooj ywg Las Ntxas Los tuag lawm. Yes Xus ntsia pom cov neeg sawv nyob ib ncig thiab lawv quaj. Yes Xus tu siab thiab nws kua muag poob nthav, Yes Xus lub kua muag yog Tswv Ntuj lub kua muag. Txhais tias Yes Xus nyiam Las Ntxas Los kawg. Thaum Yes Xus tuaj txog ntawm Las Ntxas Los lub ntxa, Yes Xus hais tias : “Nej tshem daim txiag zeb.” Nws hu ib suab nrov nrov tias : “Las Ntxas Los, koj tawm los nraum no !”
Tus tuag tawm los, cov saw tseem pav nws tej tes taw thiab daim ntaub npog ncauj tseem vov nws ntsej muag. Yes Xus hais tias : “Nej daws cov saw, nej cia nws mus.”
“Kuv yuav qhib koj lub qhov ntxa thiab tsa koj sawv hauv lub qhov ntxa ntawd los.” Lo lus no yog ib lo lus ntxim siab kawg. Daws thiab tso nws mus, yog lub zog tuaj ntawm Yes Xus txoj kev daws tso. Peb nyob xyaw ntau tsav ntau yam, yam uas ua rau peb ntshai, yam ua kom peb txawj ua phem. Qhov tseem ceeb yog khi peb nyob nrog txoj kev ntshai tuag. Tab sis muaj ib hnub peb yuav tau hnov lub suab hu kom peb tawm ntawm peb lub qhov ntxa los, vim Yes Xus tuaj nyob ntiaj teb no kom tau cawm peb.
Thov Tswv Ntuj foom hmoov zoo rau koj !
