Hnub Chiv Tim 5 Lub 5 Hlis 2024
Lub Caij Hla Lub Lis Piam 6
Zam Ntawv Moo Zoo 15:9-17
“kuv lo lus qhia yog lo lus no: nej sis nyiam sis hlub zoo li kuv tau nyiam tau hlub nej.”
Nyob zoo…
Kwv tij hmoob sawv daws, Ntawv Moo Zoo hauv hnub no, caw peb kom xav tswv yim txog Huab Tais Yes Xus lo lus qhia tseem ceeb tshaj plaws yog lo lus qhia hais tias “nej sis nyiam sis hlub zoo li kuv tau nyiam tau hlub nej.” Hauv Yes Xus lub neej mas, lo lus qhia ntawm kev sis nyiam sis hlub yog lo lus qhia loj uas nws siv nws lub neej tag nrho tshaj tawm rau sawv daws paub. Nws tsis hais lus ntau ntau xwb, tab sis nws ua kom tshwm sim rau sawv daws pom tiag tiag. Nws zam txim rau tus poj niam ua txhaum uas sawv daws xav tias tsim nyog tus poj niam no yuav tuag. Yes Xus zam txim rau Pob Zeb tus tsis lees txais nws. Yes Xus kho mob rau cov neeg muaj mob muaj nkeeg, nws ntiab dab rau lawv, nws mus xyuas cov neeg mob ib yam li Pob Zeb niam tais. Nws zam txim rau cov muab nws tua. Kwv tij sawv daws, cov no yog cov cim ntawm kev sis nyiam sis hlub uas Huab Tais Yes Xus ua piv txwv rau cov thwj tim pom. Huab Tais Yes Xus hais kom meej rau nws cov thwj tim paub tias leej twg xav ua nws cov thwj tim, yuav tsum ua raws li nws qhia.
Leej twg yog Huab Tais Yes Xus cov thwj tim?
Qhov tiag mas thaum hais txog Yes Xus cov thwj tim, Yes Xus tsis hais txog Pob Zeb, Zam, cov Hauv Paus Xa Lus, los cov leej Ntshiab xwb, tab sis yog cov ntseeg txog Yes Xus, yog cov muab siab ntshaw xav raws Yes Xus qab. Huab Tais Yes Xus hais ntxiv mus tias nws tsis hu nws cov thwj tim los ua tus tub txib nws, los tsob hwb nws, tab sis nws hu lawv los ua nws phooj ywg. Nws hais tias “tsis muaj leej twg muaj txoj kev nyiam loj dua tus uas siv nws txoj sia rau nws cov phooj ywg.” “Yog nej ua qhov kuv qhia nej, mas nej yog kuv cov phooj ywg.” Peb puas ua raws qhov uas Yes Xus qhia peb? Peb puas ua raws li Huab Tais Yes Xus lo lus qhia, tshwj xeeb lo lus qhia ntawm kev sis nyiam sis hlub? Peb puas yog Yes Xus cov phooj ywg?
Kwv tij zoo nyiam sawv daws, hauv peb lub neej, tej zaus mas, yus xav ntawm yus tus kheej tias luag yuav tsum qhua txog tus, vim yus xaiv los ntseeg txog Yes Xus, yus los ntseeg txog Tswv Ntuj. Yus xaiv los ntseeg Tswv Ntuj, mas vim tias Tswv Tswv yuav tsum rov pauj qhov zoo rau yus thiab. Qhov no mas yuam kev nawj, tsis yog nawj. Qhov tiag mas tsis yog yus xaiv Yes Xus, tab sis mas yog Huab Tais Yes Xus yog tus xaiv peb los ua nws phooj ywg. Nws hais tias “Tsis yog nej xaiv kuv, yog kuv xaiv nej.”
Kwv tij zoo nyiam sawv daws, tiag tiag mas, peb sawv daws yog Huab Tais Yes Xus cov thwj tim, peb sawv daws yog Huab Tais Yes Xus cov phooj ywg. Huab Tais Yes Xus hu peb los ua nws cov thwj tim thiab cov phooj ywg uas nws nyiam thiab hlub kawg. Nws caw peb kom sis nyiam sis hlub xws li nws tau qhia kom ua raws. Peb puas yog Yes Xus cov thwj tim tiag tiag? Peb puas yog Yes Xus cov phooj ywg tiag tiag? Lub lis piam no, thov caw peb sawv daws saib ntawm yus tus kheej, saib ntawm yus lub neej, ces xav tswv yim txog Tswv Ntuj Lo Lus hais rau peb mog!
