ZAJ NYEEM HNUB TIM 28 LUB 9 HLI 2025
HNUB CHIV LIS PIAM 26 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 16: 19-31)
Kwv tij hmoob sawv daws, hnub no, Huab Tais Yes Xus hais ib zaj paj lug uas peb tau hnov lawm. Huab Tais Yes Xus hais zaj paj lug txog tus nplua nuj thiab Las Ntxas Los. Kuv xav tias zaj paj lug no nkag siab yooj yim kawg. Peb hnov zaj paj lug no tas lawm ces kuv ntseeg tias peb sawv daws to taub meej kawg tias Huab Tais Yes Xus xav qhia lo lus qhia tseem ceeb rau peb.
Thaum yus tseem muaj txoj sia nyob ntiaj teb no, yus yuav tsum nyiam thiab hlub yus cov kwv tij neeg tsa, cov pluag txom nyem kom tshaj. Txhob ua zoo xws li tus nplua nuj txhaum nws tseem muaj txoj sia nyob, nws tsis khuv leej luag tej, nws tsis khuv leej cov pluag txom nyem ib yam li Las Ntxas Los. Thaum nws tas sim neeg lawm, nws xav rov los ua zoo rau luag, nws kuj tsis muaj sij hawm lawm. Thaum nws paub tias muaj Tswv Ntuj tiag, nws xav rov qab los ua neeg zoo, ua neeg nyiam thiab hlub luag tej, nws kuj rov qab tsis tau lawm. Li ntawd, peb cov tseem nyob, peb tseem muaj sij hawm ua zoo rau luag, peb tseem muaj sij hawm ua raws li Huab Tais Yes Xus cov lus qhia thiab tus piv txwv, kuj thov kom peb ua raws nws xwb. Thov kom peb ntseeg txog Yes Xus cov lus qhia, npuab siab rau nws mog.
Hauv lub Moo Zoo, tus nplua nuj xav rov qab los qhia rau nws cov kwv tij neeg tsa sawv daws kom ua zoo rau luag, lawv thiaj tsis poob rau hauv ntuj txias teb tsaus zoo li nws. Tiam sis, Has Nplas Has hais tias, “yog lawv tsis mloog Mais Xes thiab cov yaj saub, mas tab yog ib tug sawv hauv cov tuag mus qhia lawv, lawv kuj yuav tsis ntseeg nws thiab.” Yog peb tsis mloog lub Koom Txoos txoj kev cai nyob niaj teb no, peb kuj yuav ntseeg txog lwm yam tsis tau. Vim tias lub Koom Txoos sawv Huab Tais Yes Xus chaw nyob niaj teb no. li ntawd, peb yuav tsum koom siab koom tsws, koom tes nrog lub Koom Txoos ua ib pab ib pawg. Nrog cov kwv tij neeg tsa ua ib pab ib pawg hauv lub tsev teev ntuj, nrog cov txiv plig cov leej phauj cov xib hwb ua Tswv Ntuj txoj kev nyiam kev hlub. Mas peb thiaj hu peb tus kheej tau tias peb yog Tswv Ntuj cov thwj tim, peb tau pab cov kwv tij txom nyem zoo li Las Ntxas Los lawm.
Kwv tij zoo nyiam sawv daws, zaj paj lug peb mloog hnub no phim peb coj los xav txog peb tus kheej thiab. Peb saib ntawm tus nplua nuj, peb saib ntawm Las Ntxas Los, peb pom dab tsi? Peb puas pom yus tus kheej thiab? Thaum tseem muaj sia nyob ntawm lub niaj teb no, peb ua lub neej zoo li cas. Peb nyiam thiab hlub lwm tus tau li cas. Peb pab thiab txhawb lub zog txhawb lub siab rau luag zoo li cas. Peb taug hauv Tswv Ntuj txoj kev nyiam kev hlub zoo li cas. Qhov peb ua nyob niaj teb no, yuav tawg paj txi txiv nyob saum ntuj tiag, nej puas ntseeg li ntawd cov kwv tij? Huab Tais Yes Xus hais meej tias muaj li ntawd tiag.
Zoo xws li nws hais zaj paj lug txog Las Ntxas Los thiab tus nplua nuj peb tau mloog hnub no. Peb yuav tsum ntseeg txog nws lo lus qhia. Thov Tswv Ntuj foom koob foom hmoov rau peb, pab peb kom nyiam thiab hlub luag tej zoo xws li Huab Tais Yes Xus qhia peb.
Nyob zoo sawv daws.
