Hnub chiv tim 22 lub 9 hli ntuj 2024
Mas Kos. 9:30-37
Lub lis piam 25th
Lub Caij Nyob Nruab Xyoo
“Leej twg txais ib tug me nyuam yaus zoo li tus no, vim kuv lub npe, yog nws txais kuv. Thiab leej twg txias kuv, mas tsis yog nws txais kuv, yog txais Tus xa kuv tuaj.”
Cov kwv tij zoo nyiam sawv daws, hauv Ntawv Moo Zoo hnub no, mas peb hnov tias Pab Kaum Ob sib cav tias leej twg yog tus loj dua cov. “Leej twg yog tus loj dua cov?” Kuv xav tias lo lus nug no tseem ceeb kawg. Leej twg leej twg kuj xav ua tus loj thiab. Txawm tias peb lub qhov ncauj hais tias “kuv tsis xav ua tus loj, kuv xav ua tus me xwb,” tab sis mas yog luag qhuas txog peb tias peb yog tus loj, peb suab muaj npe, leej twg leej twg kuj qhuas txog, kuv xav tias peb yeej nyiam kawg, puas yog? Luag qhuas txog yeej zoo dua luag thuam yus los hais lus phem rau yus puas yog?
Cov thwj tim tsis to taub tias tus loj ntawm Huab Tais Yes Xus txoj kev xav yog zoo li cas. Lawv nrog Huab Tais Yes Xus nyob, lawv raws Yes Xus qab ntev me ntsis lawm tab sis, tseem tsis to taub Huab Tais Yes Xus lub siab nyiam. Thaum Huab Tais Yes Xus piav txog nws txoj kev txom nyem, txoj kev tuag thiab kev sawv rov los, cov thwj tim kuj tsis to taub thiab. Kwv tij sawv daws, nej puas paub tias, Huab Tais Yes Xus yuav tsum ua siab ntev ntev tos kom cov thwj tim to taub nws txoj kev xav. Tej zaus, cov thwj tim puas zoo xws li peb sawv daws thiab uas ntau zaus peb kuj tsis nkag siab Tswv Ntuj lub siab nyiam, peb tsis xav ua raws li Tswv Ntuj lub siab, tab sis peb xav ua raws li pe blub siab. Tej zaus mas, peb ua siab tawv, peb tsis xav to taub, peb tsis xav ua raws li Tswv Ntuj lub siab nyiam. Zoo xws li cov thwj tim hauv Ntawv Moo Zoo hnub no, Huab Tais Yes Xus ib txwm qhia lawv ntau zaus lawm tias tus thawj los tus loj ntawm Tswv Ntuj lub siab nyiam yog “tus yuav ua tus tuaj tom sawv daws qab, thiab yuav ua sawv daws tus tub txib.” Tab sis mas, lawv tseem tsis to taub. Li ntawd, Huab Tais Yes Xus thiaj hu ib tug me nyuam los sawv hauv nruab nrab lawv. Huab Tais Yes Xus qhia lawv kom to taub meej meej tias tus coj hauv lawv txoj kev xav yog yuam kev. Lawv tsis xav zoo li Tswv Ntuj xav. Tus coj ntawm Tswv Ntuj tsis yog tus muaj lub siab ntshaw nhriav nyiaj nhriav txiag, nhriav suab npe, xav kom sawv daws qhuas txog, los nhriav hwj chim thiab lwm yam. Tab sis tus coj ntawm Tswv Ntuj mas yog zoo li ib tug me nyuam yaus xwb. “Leej twg txais ib tug me nyuam yaus zoo li tus no, vim kuv lub npe, yog nws txais kuv. Thiab leej twg txias kuv, mas tsis yog nws txais kuv, yog txais Tus xa kuv tuaj.” Tus me nyuam yaus no, tsis muaj leej twg paub tias nws yog leej twg, nws yog leej twg tus tub los tus ntxhais. Nws tsis yog leej twg rau cov thwj tim. Nws tsis muaj suab npe, tsis yog tus vaj tus tub. Nws tsis muaj qhov tseem ceeb dab tsi hauv zej zos. Nws yog tus me xwb. Vim li ntawd, mas Huab Tais Yes Xus xav kom cov thwj tim txais tus neeg zoo li no. Tus me tsis yog tus muaj suab npe nto moo lug los tus muaj hauj lwm tseem ceeb hauv zej zos mas peb txais peb qhuas txog heev. Tus nyiam cov neeg me, cov neeg tsis muaj leej twg xav txais lawv, cov neeg uas luag saib tsis tau lawv, tus ntawd yog tus loj ntawm Huab Tais Yes Xus.
Kwv tij zoo nyiam sawv daws, peb paub lawm tias Tswv Ntuj xav kom peb ua neej zoo li cas thiaj phim Tswv Ntuj cov lus qhia, thiaj tsim nyog ua Tswv Ntuj cov tub cov ntxhais, thiaj yog Huab Tais Yes Xus tseem thwj tim.
Thov Tswv Ntuj pab peb kom niaj hnub peb ua neej raws li Huab Tais Yes Xus cov lus qhia, kom peb ua neej raws li Tswv Ntuj lub siab nyiam.
Nyob zoo sawv daws!
