Kav Tos Liv lub pwm tsav tshiab nyob As Xias, xav txhawb nqa kev tshaj lub Moo Zoo rau cov neeg lag ntseg.
Lub pwm tsav no pib qhib nyob hauv lub caij muaj lub rooj sab laj Kav Tos Liv As Xias rau cov neeg lag ntseg zaum tim 4, uas npaj nyob Xes Us teb chaws Kos Lim hnub tim 15-21 lub 10 hli no.
Kev sab laj zuam no yog npaj nrog lub Cheeb Koom Txoos nyob Xes Us thiab pab tub tshaj Ntuj Lus Kav Tos Liv Xes Us rau cov neeg lag ntseg. Muaj cov neeg tuaj sib koom li ntawm 230 leej nrog rau cov Txiv Plig, cov sawv cev, cov neeg ntseeg thiab cov txhais lus hauv ntau lub teb chaws nyob As Xias teb. Cov sawv cev ntawm Tis Mos thiab Moos Nkos Lias, yog cov tuaj koom thawj zaug. Lub pwm tsav tshiab no yuav muab kev yooj yim hauv kev koom tes ntawm cov neeg Kav Tos Liv As Xias pub rau cov neeg lag ntseg. Kom tau sib faib tej kev paub hauv kev tshaj lub Moo Zoo, qhia ntawv piav tes, thiab pub lub caij hauv kev qhuab qhia. Kev tsa lub pwm tsav no tshwm sim los ntawm lub Koom Haum Kav Tos Liv neeg lag ntseg nyob Fis Lis Pees, hauv lub rooj sab laj zaum tim 3 nyob Ntsas Kas Tas xyoo 2023. Lub rooj sab laj loj yog qhib nyob hauv lub thaj txi Ntuj nyob hauv lub tuam tsev teev Ntuj Myeongdong, nyob Xes Us hnub tim 16 lub 10 hli no. Muaj Tswv Qhia Chung Soon-taick ua tus coj lub Txoos. Hauv nws cov lus nthuav ntawv Moo Zoo, Tswv Qhia Chung hais tias kev sib koom siab txhua yam tsis tas yuav zoo ib yam tas mus li. Nws hais tias : “Leej Ntuj Plig Ntshiab tsis tau rub sawv daws los ua ke hauv ib xeem lus. Tab sis nws hwm txhua tus neeg xeem lus thaum peb sib koom siab ua ib tug.” Tswv Qhia Giovanni Gaspari tus sawv Vaj Qhia cev nyob Kos Lim Naj, tau hais txog Vaj Qhia Leo 14 cov lus thiab txhawb nqa kom cov Kav Tos Liv lag ntseg hais tawm yam lawv xav tau hauv kev ntseeg. Nws hais tias : “Lub Koom Txoos nyob As Xias xav tau nej.” Cov hais lus xws li, Txiv Plig Thermadom uas nws yog thawj tus Txiv Plig Kav Tos Liv lag ntseg nyob Is Ntias teb. Thiab tus kws kev ntseeg Carmen Nanko-Fernández thov kom cov Kav Tos Liv lag ntseg lees txais tias; lawv yog cov neeg muaj feem cuam nyob hauv lub Koom Txoos.
Cov tuaj sib koom tseem tau koom sab laj hauv lub ntsiab lus ‘kev tshaj xo rau cov neeg lag ntseg, Ntawv Ntshiab, cov kab ke, kev teev Ntuj thiab kev nqua hu hauv kev ntseeg. Nrog rau kev sib pauv tej kab lis kev cai thiab thov Ntuj rau kev thaj yeeb nyob Kos Lim.’ Lub pwm tsav tsa tshiab no, lub hom phiaj yog xav hloov kev sab laj hauv xeev Ntuj los ua kev sib koom tes thiab cov hauj lwm pib muaj qab muaj quag. Uas tsim kev muaj feem cuam thiab kev ua tus coj ntawm cov Kav Tos Liv lag ntseg nyob thoob As Xias teb.
