Hnub chiv tim 29 lub 9 hli ntuj 2024
Mas Kos. 9:38-43, 45, 47-48
Lub lis piam 26
Lub Caij Nyob Nruab Xyoo
“Leej twg tsis tiv peb, mas nws tuaj peb tog.”
Cov kwv tij hmoob sawv daws, hauv Ntawv Moo Zoo peb hnov hnub no, mas Huab Tais Yes Xus qhia kom meej kawg txog qhov tias leej twg leej twg kuj xij, yog tias lawv tsis tiv Huab Tais Yes Xus thiab lawv tsis tiv Huab Tais Yes Xus cov thwj tim, lawv kuj tuaj Huab Tais Yes Xus tog. Txawm tias lawv tsis yog cov neeg ntseeg txog Yes Xus, los sis lawv tsis tau txais lub Cim Ntxuav, tab sis mas, lawv ua lub neej nyob hauv kev nyiam kev hlub luag tej, lawv ua neej nyob hauv kev khuv leej neeg, lawv ua lub neej hauv kev zoo, mas lawv kuj ua Huab Tais Yes Xus sab, lawv kuj tuaj Huab Tais Yes Xus tog. Huab Tais Yes Xus hais tias “Leej twg muab ib khob dej rau nej haus, vim nej yog Leej Pleev tug, mas kuv hais tseeb rau nej, tus ntawd yuav txais koob haum.” Txawm tias lawv ua ib qho zoo me me xwb, xws li muab ib khob dej rau Yes Xus cov thwj tim haus vim lawv yog Huab Tais Yes Xus tug, mas tus ntawd yuav txais koob haum. Tswv Ntuj yuav pub paj tshab rau lawv vim lawv txais Huab Tais Yes Xus, lawv tsis tiv Huab Tais Yes Xus. Kwv tij zoo nyiam sawv daws, nej ne, nej puas ntseeg li ntawd tiag tiag?
Hnub no, Huab Tais Yes Xus qhia nws cov thwj tim thiab qhia peb sawv daws, cov ntseeg txog nws tias: qhov uas peb yuav tsum ntshai, peb yuav tsum ntxhov siab txog tsis yog qhov tias leej twg nyob ntawm Huab Tais Yes Xus tog, leej twg tsis nyob, leej twg nrog peb cov ntseeg, leej twg tsis nrog peb. Txhob ntxhov siab txog qhov no. Tab sis mas, qhov peb yuav tsum ntxhov siab txog yog kev coj tej yau ua txhaum, los sis kev coj luag tej ua txhaum. Huab Tais Yes Xus hais tias “leej twg coj ib tug neeg ntseeg me me kom ua txhaum, mas txhiaj khoov cia luag muab lub zebu as luj zom mus dai ntawm nws caj dab, thiab muab nws pov rau hauv dej ntuj.” Huab Tais Yes Xus hais li no, mas nws txhais tias peb ua neej nyob mas, peb yuav tsum txhob ua txhaum, peb yuav tsum ua lub neej kom ntshiab huv, tshwj xeeb mas yog kev coj lwm tus ua txhaum, coj luag tej ua qhov tsis zoo, tsis dawb tsis huv, ua qhov tsis xis Tswv Ntuj siab. Qhov no yog qhov uas peb yuav tsum ceev faj, peb yuav tsum ntxhov siab txog.
Cov kwv tij zoo nyiam sawv daws, hnub no Huab Tais Yes Xus caw peb kom qhib peb lub siab txais tej yam zoo uas luag tej ua hauv txoj kev zoo, Huab Tais Yes Xus caw peb kom ua siab dav txais qhov tseeb tias Tswv Ntuj nrog tib neeg nyob txhua txhia tus, tsis hais cov ntseeg los tsis ntseeg, Tswv Ntuj hais lus rau tib neeg hauv peb lub siab. Yog tib neeg ua neej nyob hauv txoj kev nyiam kev hlub luag thiab hauv txoj kev zoo, mas lawv tau nyob Huab Tais Yes Xus tog lawm.
