ZAJ NYEEM HNUB TIM 14 LUB 6 HLI 2026
HNUB CHIV LIS PIAM 11 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 9: 36-10: 8)
Kwv tij hmoob sawv daws, Huab Tais Yes Xus lo lus hais tias “Qoo loo ntau kawg, tab sis cov tub zog tsawg. Nej thov tus Tswv qoob kom nws xa ib co tub zog tuaj sau nws cov qoob.” Nws hais cov lus no tas ces nws hu kaum ob leeg thwj tim thiab xa lawv mus tshaj Ntuj lus. Yes Xus muab hwj huam kom lawv ntiab tau dab tawm, thiab kho tau tej txiab xeeb thiab tej mob nkeeg kom thim. Ntiab dab, kho tej txiab xeeb thiab tej mob nkeeg yog Tswv Ntuj txoj hauj lwm tshaj Ntuj Lus los yog qhov zoo uas cov neeg ntseeg yuav tsum sib ua.
Ntau zaus peb xav tias Tswv Ntuj cov tub zog uas sau Tswv Ntuj cov qoob yog cov txiv plig, cov tswv qhia xwb los cov xib hwb xwb. Qhov tiag mas tsis yog li ntawd. Cov tub zog yog peb cov ntseeg sawv daws. Peb sawv daws yog Tswv Ntuj cov tub zog. Yog peb sawv daws muab siab ua Tswv Ntuj txoj hauj lwm, sib pab ua hauj tshaj Ntuj Lus, Tswv Ntuj cov tub zog kuj tsis tsawg ntxiv mus. Huab Tais Yes Xus hu peb sawv daws zoo li nws hu kaum ob leeg thwj tim hnub no los ua tim khawv txog kev zoo, kev nyiam, kev hlub uas yog Tswv Ntuj.
Ntawm kuv mas, kuv zoo siab kawg uas kuv pom peb cov kwv tij cov ntseeg Hmoob sib pab ua hauj lwm hauv tsev teev ntuj pab cov txiv plig, cov leej phauj, cov xib hwb ua hauj lwm ntau yam, tsis hais pab hu nkauj, pab tu tsev teev ntuj, pab teev Ntuj rau cov laus thiab cov muaj mob muaj nkeeg. Cov no yog txoj hauj lwm zoo uas Huab Tais Yes Xus hu peb cov ntseeg sawv daws kom ua. Tsis yog txiv plig hauj lwm xwb. Txiv plig ua txiv plig ib leeg xwb ua tsis ua nawb. Cov ntseeg sawv daws yuav tsum sib pab. Tswv Ntuj txoj hauj lwm muaj ntau yam thiab peb sawv daws yog Tswv Ntuj cov tub zog. Qhov kawg mas, nyob ntawm peb xwb, peb yuav kom siab koom ntsw ua Tswv Ntuj tub zog los tsis ua. Thov peb sawv daws kom siab thov Ntuj kom tshoj cov neeg ntseeg lub siab kom muaj tub zog ua hauj lwm coob coob.
Qoo loom ntau kawg, tab sis cov tub zog tsawg.
