Xov xwm tshaj tias : Tseem hwv Suav rhuav tshem Tis Npes tsev kawm ntawv ua ntu zus.
Tsab ntawv xov xwm RFA tshaj tias : cov duab hnub qub cuav thau tseg hnub tim 14 lub 8 hli no, ua kom pom tias tab tom muaj kev rhuav tshem Tis Npes cov tsev kawm ntawv nyob thoob qhov txhia chaw. Xov xwm tshaj tias yam tsawg cov hauj sam 1,060 lub tsev yog lub hom phiaj hauv kev rhuav tshem. Muaj ze ntawm 250 txhiab acres tej vaj tse raug rhuav tshem tas txij thaum pib muaj kev rhuav zaum kawg nyob hauv hnub tim 13 lub 7 hli no. Larung Gar txhim tsa nyob hauv xyoo 1980 thiab yog qhov chaw kawm Tis Npes kev cai uas loj tshaj thiab yog ib qho chaw muaj zog nyob ntiaj teb. Lub tsev kawm ntawv tau rub tas cov neeg kawm Tis Npes kev cai thiab cov neeg Suav ntau txhiab leej uas tseem ceeb hauv kev kawm xeem lus, kab lis kev cai thiab Tis Npes kev cai. Cov tseem hwv Tis Npes uas nyob Is Ntias teb hais tias : kev rhuav tshem Larung Gar yog pib txij li xyoo 2001 los. Yog kev rhuav tshem loj kawg nyob hauv xyoo 2016 thiab 2017. Ua rau cov hauj sam Tis Npes thiab cov poj hauj sam 5,000 leej raug ntiab tawm mus, thiab lawv tej vaj tse ntau txhiab lub raug rhuav piam sij tas. Ua ntej no tseem hwv Suav tau hais txog chaw nyob sib ti thiab teeb meem kev nyab xeeb yog lub hom phiaj hauv kev rhuav tshem. Txawm li cas kuj xij, pab neeg txuag tib neeg kev ncaj ncees thiab cov sawv cev Tis Npes hais tias ; tej kev ua li no yog ib feem ntawm Pej Ceeb kev txhob txwm ua kom dav zuj zus hauv kev txwv kev kawm ntawm Tis Npes. Tenzin Pema ntawm International Tis Npes hais tias : “Kev rhuav tshem zaum kawg, ua kom muaj kev ntxhov siab txog kev rhuav lub neej hauv kev teev hawm, kab lis kev cai thiab cov neeg Tis Npes kev kawm ntawv.” Tenzin Lekshay uas yog Tis Npes tus tshaj lus hais tias :
“Cov teeb meem no phem kawg thiab nws thov kom muaj kev sib tham ntawm cov teb chaws, kom muab siab rau txog yam uas lawv hu ua tsis muaj kev thaj yeeb hauv kev teev hawm nyob Tis Npes.” Tenzin Lekshay kev tshaj tawm zaum kawg no yog thaum tseem hwv Suav tab tom txhawb nqa txoj cai tsim kev sib koom siab nrog cov haiv neeg tsawg thiab txhab tseem hwv kev saib xyuas rau Tis Npes cov tsev kawm nyob hauv cov thaj tsam uas muaj cov Tis Npes nyob.
