Lub ntsiab lus hauv lub rooj sab laj yog “kev tig los yuav lub siab tshiab raws tus qauv ntawm lub rooj ncauj lus thiab cov hauj lwm hauv kev tuam choj, thiab ua tus tuam choj nyob As Xias.” Yog qhov tsim nyog rau lub sij hawm no.
Xeem lus hauv kev tuam choj yog qhov ze Vaj Qhia Fas Ntshis Kus, nws txhib kom cov neeg ntseeg tuam choj zoo dua ua phab ntsa thaiv. Hais txog ntawm Vaj Qhia, mas kev ntshai thiab kev sib cais tsis yog tus cag ntawm cov neeg ntseeg kev ua pov thawj tiag. Kev mus tsham Is Ntos Nes Xias teb xyoo 2024 ntawm Vaj Qhia yog qhov meej tseeb. Vaj Qhia Fas Ntshis Kus qhua txog Is Ntos Nes Xias teb zaj hais txog “Gotong royong”, tus ntsuj plig ntawm kev sib koom tes uas yug tsoom pej xeem hauv lub teb chaws txoj sia los ntev. Nws tseem hais txog txoj kev tho tshab hauv kev phooj ywg, uas txuas nrog lub tsev teev Ntuj Istiqlal thiab lub tuam tsev teev Ntuj Leej Niam Assumption nyob Jakarta tias ; yog lub Cim muaj zog ua kom pom tias cov neeg muaj kev ntseeg sib txawv tuaj yeem coj ncaj ncees rau nyias txoj kev ntseeg tau. Nws xaiv kev sib tham thiab kev sib koom tes ntau dua qhov ua xyem xyav.
Txawm li cas kuj xij, yav tom ntej no tsis yog pib ntawm Vaj Qhia Fas Ntshis Kus.
Hauv phau ntawv Ecclesia in Asia (1999), Vaj Qhia Zam Paj Lug Ob tau piav txog kev sib tham nrog kab lis kev cai thiab txhua txoj kev teev hawm tias : “Yog ib feem ntawm lub Koom Txoos cov hauj lwm tshaj lub Moo Zoo.” Nws thov kom cov neeg ntseeg muaj feem cuam nrog cov kab ke fab ntsuj plig nyob As Xias hauv kev cia siab thiab kev sib hwm. Vaj Qhia Npes Nes Dis 16 kuj hais txog ib yam tias : “Kev ntseeg loj hlob los ntawm kev sib tham muaj qab hau ntau dua raug quab yuam.” Muab los sib ntxiv ua ke lawm, tas 3 tug Vaj Qhia no puav leej hais txog kev tuam choj txuas nrog kev sib raug zoo, tsis yog hauv kev ua tiam lis los yog kev tshaj tawm, tab sis yog kev ua tawm txog lub Moo Zoo.
A Tradition of Dialogue
Tej kev cai hauv kev sib tham.
Suav txij thaum teeb tsa lub pwm tsav Tswv Qhia As Xias (FABC) xyoo 1970 los, tau txhawb nqa yam uas hu ua ‘kev sib tham peb yam’. Xws li kev sib tham nrog txhua yam kab lis kev cai nyob As Xias, kev sib tsham nrog txhua txoj kev teev hawm thiab kev sib tham nrog cov neeg pluag txom nyem. Yav tom ntej no xav tias kev tshaj lub Moo Zoo nyob hauv xeev ntuj no, yog nyob hauv kev sib raug zoo uas tsim los ntawm kev tso siab, kev sib hwm thiab kev sib koom tes ntau dua lub Koom Txoos lub zog.
Cov thawj coj lub Koom Txoos nyob thoob As Xias teb tau ua lub neej mus raws yav tom ntej hauv tus qauv uas sib txawv. Nyob Thaib teb Tswv Qhia Michai Kitbunchu tau txhawb nqa kev sib raug zoo nrog cov teev hawm Phus Thas. Nyob Is Ntias teb Tswv Qhia Oswald Gracias tau txhawb nqa kev sib tham ntau dua kev ntseeg ua ntu zus. Nyob Is Ntos Nes Xias teb Tswv Qhia Ignatius Suharyo tau ua hauj lwm nrog cov thawj coj lwm txoj kev teev hawm. Ua kom pom txog kev sib koom tes thiab kev ncaj ncees hauv nyias txoj kev ntseeg ntawd, tsis yog qhov tsis sib haum xeeb. Nyob Kos Lim Naj teb Tswv Qhia Kim Sou-hwan yog lub zog hauv kev ncaj ncees, uas tau txais kev hwm hauv lub caij hloov mus rau kev muaj vaj huam sib luag hauv lub teb chaws. Nws pub lub Koom Txoos tej chaw rau cov neeg tawm tsam taij thov kev muaj vaj huam sib luag, thiab txhawb nqa kev daws kho ywj pheej. Nyob Fis Lis Pees teb Tswv Qhia Jaime Sin yog lub zog coj tsoom pej xeem hauv kev tawm tsam xyoo 1986, mus rau kev pauv ntxeev hauv kev ywj pheej uas yog siv lub Koom Txoos lub hwj chim hauv kev ncaj ncees, kom tau txo kev pheej hmoo nqaij ntuag ntshav nrog.
Mas Les Xias teb muaj lwm tus piv txwv, yog Tswv Qhia Soter Fernandez tus uas tuag mus lawm. Nws tau txais kev hwm los ntawm cov neeg ntseeg thiab cov haiv neeg tsawg. Nws ntseeg tias kev sib tham tsis yog kev txo qis hauv kev ntseeg, tab sis yog kev ua tawm txog kev ntseeg. Nws muaj qhov tseem ceeb hauv lub pwm tsav kev tuav xam txog Phus Thas, kev ntseeg, His Ntus, Jain thiab Tao nyob Mas Les Xias teb (MCCBCHST), uas teeb tsa nyob hauv xyoo 1983. Kom tau txhawb nqa kev sib nkag siab thiab kev sib koom tes ntawm cov neeg ntseeg, uas tsis yog Mawv Xis Lim nyob hauv lub teb chaws.
Zim txwv no Tswv Qhia Bo nyob Mias Mas teb, tseem ua cov hauj lwm no uas yog thov kom muaj kev sib haum xeeb hauv kev sib tawg. Yog lub sij hawm uas Tswv Qhia Tagle raug lees txais dav kawg hais txog kev saib xyuas cov neeg ntseeg, hauv kev mloog, kev ua neeg me thiab kev txhawb nqa.
Cov thawj coj no lawv cov hauj lwm sib txawv, tab sis lawv muaj tib txoj kev ntseeg thiab kev cia siab. Qhov ntawd yog lub Koom Txoos yuav muaj zog thaum ua cov hauj lwm tuam choj ntau dua ua phab ntsa thaiv.
Bridges Built Every Day
Tus choj uas niaj hnub tuam.
Kev tuam choj tsis yog kev sib tham ntawm cov kev teev hawm xwb, nws tseem yog lub Cim tseem ceeb ntawm lub Koom Txoos As Xias thiab. Li ntawd lub Koom Txoos lub zog yog qhov muaj zog dua ib tsoom neeg. Hauv ntau lub teb chaws uas cov neeg ntseeg yog cov haiv neeg tsawg, lub Koom Txoos raug hwm nyob hauv cov tsev kawm ntawv, tsev kho mob, kev ua hauj lwm rau zej zog thiab cov hauj lwm ua pub sawv daws uas tsis xaiv ua. Cov hauj lwm no ua kom pom tias qhov txaus ntseeg tsis yog los ntawm lub zog hauv kev tseev tsim, tab sis yog los ntawm kev ua hauj lwm ncaj ncees thiab kev ncaj ncees. Cov choj uas tseem ceeb tshaj ntau tus raug txhim ntsiag to los ntawm cov neeg ntseeg Kav Tos Liv, xws li kev ua tus pab cov hauj lwm hauv tsev teev Ntuj thiab ua cov hauj lwm ntawm cov kev teev hawm. Cov Leej Phauj saib xyuas cov neeg pluag txom nyem. Cov xib hwb pub kev txawj ntse rau cov me nyuam. Los ntawm ntau yam sib txawv thiab cov neeg zej zog ua hauj lwm ua ke tom qab raug xwv txheej.
Hauv txheej neeg uas muaj kev sib tawg thiab tsis muaj kev tso siab, lub Koom Txoos cov hauj lwm tsis yog ntxuav qhov sib txawv, tab sis yog ua kom ntseeg tias tej kev sib txawv no tsis yog teeb meem ntawm lub meej mom kev ua neeg, kev sib hwm los yog kev nyob ua ke yam kaj siab lug.
Vim li no rov hais txog kev tuam choj ntawm FABC thiaj yog qhov tseem ceeb dua kev tshaj lub Moo Zoo. Tej kev xav no ua kom pom txog lub Koom Txoos yog qhov mloog ua ntej yuav txiav txim siab. Txhawb nqa ua ntej yuav qhuab qhia thiab nrhiav kev sib ntsib ua ntej kev tim ntsej tim muag. Yog cov Tswv Qhia uas tuaj sib koom nyob Jakarta txhawb nqa tus qauv yav tom ntej ntawd, lawv yuav ua cov lus thov txuas ntxiv kom muaj kev sib tham raws li Vaj Qhia Zam Paj Lug Ob cov lus. Kev muab siab rau ntawm Vaj Qhia Npes Nes Dis 16 hauv kev muaj feem cuam. Kev nqua hu kom muaj kev ua kwv ua tij ntawm Vaj Qhia Fas Ntshis Kus. Thiab tus qauv ntawm cov thawj coj lub Koom Txoos nyob As Xias. Xws li Tswv Qhia Kim Sou-hwan, Tswv Qhia Jaime Sin, Tswv Qhia Bo, Tswv Qhia Tagle thiab Tswv Qhia Ignatius Suharyo.
Cov uas yog tus piv txwv ntawm tej kev xav ntawd nyob hauv lawv lub neej thiab lawv cov hauj lwm. Hauv xeev ntuj uas muaj ntau yam yog qhov tseeb hauv lub neej niaj hnub. Cov hauj lwm uas tseem ceeb tshaj ntawm lub Koom Txoos, tsis yog kev sawv nyob ntawm ib sab twg hauv kev sib tawg, los yog thov kom lwm tus hla mus ib leeg. Tab sis yog kev tuam choj uas coj ib tsoom neeg los sib sau ua ke hauv kev sib tham, kev ua neeg me thiab kev ua tub txib.
