Tus Tswv Qhia nyob Pis Naas nqua hu cov ntseeg nyob As Xias kom ua neeg muaj zeem muag thiab txawj piav dab neeg
Hnub tim 27 lub 11 hlis no, ua ntej yuav ua lub rooj Kev Tso Siab Tawm Rooj Fiv Ntuj Loj nyob Pis Naas, Mas Les Xias teb, cov sawv cev tsoom ntseeg tau koom ua Thaj Txi Ntuj ua ke, muaj Tswv Qhia Liab Fas Ntshis Kus Xes Npas Tis Nus ua tus coj lub Txoos.
Nws hais lus rau cov sawv cev ntawm 32 lub teb chaws thoob As Xias Tuam Teb, kom lawv ua ‘kws piav dab neeg, kws npau suav, thiab ua neeg muaj zeem muag’, mas lawv thiaj li ua lub suab ntxhe txog lub hau lus tias “Tsoom pej xeem nyob As Xias lawv ntoj kev mus ua ke… thiab lawv taug dua ib txog kev rov mus lawv teb chaws.”
Tswv Qhia Liab Fas Ntshis Kus hais ntxiv tias nyob hauv xyoo 2006 lub Koom Txoos nyob As Xias tau tsa lub rooj sau siab nyob Thaib teb, thaum ntawd, lub Koom Txoos txhib sawv daws kom txuag thiab ua neej raws li Huab Tais Yes Xus Pleev zaj dab neeg.
Tswv Qhia Liab muab Huab Tais Yes Xus lo lus hauv Zam Ntawv Moo Zoo, zaj 14 qib 26 saib rau nqi, vim lo lus no tseem nyob los txog niaj hnub no. Huab Tais Yes Xus lo lus yog hais tias “Leej Nplij Neeg uas yog Leej Ntuj Plig Ntshiab, nws yuav qhia tas ib puas tsav yam rau nej, thiab nws yuav pab nej rov nco txog tas txhua yam uas kuv tau hais rau nej.”
Lo lus no, yog lo lus ntuas cov ntseeg sawv daws tias Leej Ntuj Plig Ntshiab hliv lub zeem muag thiab kev npau suav los rau saum sawv daws, tsis hais tus hluas los tus laus. Li ntawd, Tswv Qhia Liab thiaj li nqua hu lub Koom Txoos xav kom pom txog lub neej tshiab yav tom ntej uas muaj kev thooj siab koom ntsws thiab kev tsob hwb ua tus taw ntsa.
Dhau ntawd, Tswv Qhia Liab Fas Ntshis Kus tseem hais tsis tseg txog qhov tseem ceeb hauv kev yoog luag txuj (inculturation) tias lub siab ntseeg tsis muaj peev xwm yoog tau luag txuj tsis yog lub siab ntseeg tseeb. Nws tseem txhib cov sawv cev tuaj koom lub rooj zaum no sib pab nrhiav txoj hau kev ua neej thiab nthuav tawn Kav Tos Liv lub siab ntseeg kom tsom txog lub teb chaws cov txuj txoog.
Tswv Qhia Liab Fas Ntshis Kus qhuas txog cov Leej Ntshiab thiab Tim Khawv nyob As Xias xeev ntuj, tsis hais nyob Nyab Laj teb, Kos Lim teb, Is Ntias teb, thiab Khas Phus Tshas teb, los lwm lub teb chaws, vim lawv cov no yog cov neeg muaj lub zeem muag, mas lawv thiaj li coj lub Moo Zoo tuaj txog lub qab ntuj tshiab.
Nyob rau lub caij lub Koom Txoos rhais ruam nyob hauv lub Xyoo Ntshiab muaj kev Tso Siab, cov Hluas Thoob Qab Ntuj Hnub 2027 thiab theem kawg nkaus hauv tsoom Leej Choj lub Rooj Sab Laj, mas Tswv Qhia Liab Fas Ntshis Kus thov caw tsoom ntseeg npuab lub Koom Txoos Kav Tos Liv txhua tus kom cia siab rau Leej Ntuj Plig ua tus coj thiab rhais ruam lawv tom ntej, sawv daws yuav thov Ntuj raws li lo lus hauv Ntawv Ntshiab tias “Mas Las Nas Tas! Los mas, Huab Tais Yes Xus.”
