Tswv Qhia Liab Tas Nkes yuav yog tus coj lub Txoos Txi Ntuj nyob hauv Kev Tso Siab Tawm Rooj Fiv Ntuj Loj

Raws li tau tso tawm lawm tias lub 11 hlis no tim 27-30 yuav muaj rooj sau siab Kev Tso Siab Tawm Rooj Fiv Ntuj Loj nyob rau Pis Naas, Mas Les Xias teb, tus yuav coj lub Txoos Txi Ntuj nyob hauv hnub tim 29 lub 11 hlis hauv lub Tuam Tsev Teev Ntuj Me Leej Ntshiab As Nas nyob Npus Kis Maws Tas Ntsas mas yog Tswv Qhia Liab Lus Is Tuam Tas Nkes, Vas Tis Kas tus Tuam Tswj fab kev tshaj lub Moo Zoo hauv lub Pwm Tsav tshaj Ntuj Lus rau haiv neeg. Hnub ntawd, tom qab lub Txoos Txi Ntuj tas, Txiv Plig Nros Nkas Les As nyob Aus Thas Lias yuav nce sam thiaj hu nkauj rau sawv daws tau koom cav txog Tswv Ntuj ua ke. Ob yam no, lub rooj sau siab qhib dav rau sawv daws tuaj koom tau.

Tswv Qhia Liab Tas Nkes yog ib tug nto moo nyob hauv lub Koom Txoos Kav Tos Liv, yog li mas nyaj yuav muaj cov neeg tawm rooj fiv Ntuj nyob thoob Mas Les Xias thiab thaj tsam ib ncig tuaj koom lub Txoos Txi Ntuj coob hauj sim.

Hais txog Leej Ntshiab As Nas lub Tsev Teev Ntuj nyob Npus Kis Maws Tas Ntsas, mas tau lub npe tias ‘Tuam Tsev Teev Ntuj Me’ (Minor Basilica), yog ib lub chaw hauv paus tshwj cia rau tsoom ntseeg tau tawm rooj fiv Ntuj qub kawg nkaus thiab tseem ceeb tshaj nyob Mas Les Xias teb.

Lub tsev teev Ntuj no lub keeb, mas yog xyoo 1840 cov tub tshaj Ntuj Lus hauv lub koom haum tshaj Ntuj Lus nyob Pas Lis (MEP) txhim tsa kom tau ua chaw tsob hwb cov neeg ua liaj ua teb nyob raws taw roob ntawm ntug nroog. Lawv cov no yog haiv neeg Suav thiab Is Ntias tsiv teb chaws, lawv muab siab rau npuab Leej Ntshiab As Nas uas yog nkauj ntshiab Mab Liab niam, lawv vam txog Leej Ntshiab As Nas pab thov Ntuj kho lawv tej txiab mob, cawm lawv tsev neeg, pab kom liaj teb huab cua zoo ua noj ua hnav, pab txuag lawv nyob hauv lub caij txom nyem.

Txhua xyoo, muaj neeg tsis hais nyob Mas Les Xias, Xees Cas Pos, Thaib, Is Ntos Nes Xias  thiab lwm thaj tsam, tawm rooj tuaj fiv Ntuj nyob Npus Kis Maws Tas Ntsas li ntawm ntau pua txhiaj leej, lawv tuaj ua hmoov txog Leej Ntshiab As Nas hauv hnub tim 26 lub 7 hli. Cov neeg nyiam tawm rooj fiv Ntuj tsis tseg, mas lub nroog no thiaj li rais ua lub hauv paus ntawm sab ntsuj plig uas muaj zog tuaj. Thaum cov tuaj fiv Ntuj ua kab ke teev Ntuj 9 hnub sib law, lawv yuav taws tswm ciab zov hmo, tsob hwb cov neeg mob, ua kab ke nquam Leej Ntshiab As Nas tus duab mlom.

Ntau tus lawv tuaj vim lawv tau fiv tseg, los lawv tau nco txog Tswv Ntuj lub txiaj ntsig pab lawv, los lawv tuaj ntxiv zog kom rov muaj peev xwm nyiaj kev txom nyem. Nyob hauv lub Tuam Tsev Teev Ntuj, lub tsev teev Ntuj qub thiab lub me nyuam tsev teev Ntuj txhim puag tiam 19 ntawd, tsuas pom qhov zoo nkauj nplua mias, tsis hais xeem lus, kab lis kev cai, thiab cov neeg tuaj tom qab sawv daws koom siab thov Ntuj.

Thawj lub tsev teev Ntuj txhim taw ruaj nyob ntawm thaj tsam no lawv txhim hauv xyoo 1888, tom qab ntawd yog lub tsev teev Ntuj qub ua txhim tsa tiav hauv xyoo 1958. Hos lub Tuam Tsev Teev Ntuj tshiab no lawv txhim hauv xyoo 2000 kom tau txais tsoom neeg coob coob tuaj koom ua hmoov. Xyoo 2019 Vas Tis Kas pom zoo tsa Leej Ntshiab As Nas lub tsev teev Ntuj nyob Npus Kis Maws Tas Ntsas no ua Tuam Tsev Teev Ntuj Me, kom tau ua puav pheej txog Koom Txoos liv xwm, ua kev tshaj Ntuj Lus tus cag, thiab ua yam muaj nuj nqis sab ntsuj plig nyob ruaj khov rau cov neeg Mas Les Xias npuab lub Koom Txoos Kav Tos Liv.

Kev Tso Siab Tawm Rooj Fiv Ntuj zaum no sawv nyob hauv lub sij hawm tseem ceeb rau lub Koom Txoos nyob As Xias. Kev sau siab zaum no nqua hu cov Tswv Qhia, tsoom Leej Choj, Leej Qee, Leej Tsob Hwb, thiab Leej Nrog cov thawj coj thoob As Xias teb tuaj txoos ua ke nyob Pis Naas plaub hnub sij law, kom sawv daws tau tuav xam, sib tham, thiab ua hmoov ua ke.

Lub rooj sau siab zaum no muaj lub Rooj Tswv Qhia nyob As Xias fab tshaj lub Moo Zoo (FABE-OE) ua tswv cuab, kom cov neeg tawm rooj fiv Ntuj nrhiav tau txoj kev tshiab tshiab coj sawv daws rhais ruam mus lawm tom ntej, kom sawv daws pheej xeeb rau Kav Tos Liv lub hom thawj nyob hauv As Xias teb cov txuj txoog nplua mias thiab tswv yim ntsuj plig sib txawv. Sawv daws yuav tau kev sib sab laj thiab sib faib kev thoob tsib, tej yam hauj lwm pab ceev lub zeem muag rau lub Koom Txoos nyob As Xias lawm yav tom ntej.

Tswv Qhia Liab Tas Nkes lub Thaj Txi Ntuj nyob hauv Leej Ntshiab As Nas lub tsev teev Ntuj zoo tam li yog lub yeem nyob hauv kev sau siab zaum no, txuas nrog lub Koom Txoos nyob Mas Les Xias tus taw ntsa thiab lub Tuam Teb kev tso siab sawv tuaj kom tau plhis dua tshiab thiab koom ib lub siab.

Nej koom lub Txoos Txi Ntuj thiab kev hu nkauj cav txog Tswv Ntuj tau nyob hauv Radio Veritas Asia tus Facebook thiab Youtube (@VeritasAsia). Yog hnub tim 29 lub 11 hlis, sij hawm 5.30 yav tsaus ntuj.