Tswv Qhia Liab Npos nqua hu lub Koom Txoos nyob As Xias kom taug lub rooj tuav xam cov Leej Choj tus lw

Tim 28 lub 11 hlis 2025 yog hnub ob hauv lub Rooj Sau Siab Kev Tso Siab Tawm Rooj Fiv Ntuj Loj nyob Pis Naas, Mas Les Xias teb, qhov ua ntej tshaj mas yog tsoom neeg li 900 leej ntawm 32 lub teb chaws koom ua Thaj Txi Ntuj ua ke. Lub Txoos Txi Ntuj muaj nyob hauv lub tsev txais qhua the Light Hotel chav tsev lom zem. Hnub no tus coj lub Txoos yog Tswv Qhia Liab Npos, tus Tuam Tswv Qhia nyob Yab Nkoos, Mias Mas teb. Tus tshaj lub Moo Zoo yog Tub Tsob Hwb Paj Lug Kaas hauv Ceeb Koom Txoos Pis Naas.

1. Tsib Txoj Kab Ci Coj Kev.

Nyob hauv Tswv Qhia Liab Npos cov lus nthuav Tswv Ntuj Lo Lus, nws hais txog Das Nias zaj npau suav (DN 7: 2-14) tias muaj 5 txoj kab ci coj cov neeg ntseeg kev.

- Txoj kab ci tim Ib, muab lub siab mloog.

Tswv Qhia Liab Npos pib nws cov lus, mas nws hais txog ‘kev mloog’ tias yog qhov tseem ceeb. Nws hais tias “Nyob hauv ib pawg neeg twg, peb mloog ua ntej mam hais puas tau?” Tos nws hais li ntawd, vim nyob hauv As Xias ntau cov txuj txoog, mas lawv rau nqe rau kev hais lus, tab sis nyob hauv kev rhais ruam sab ntsuj plig hauv lub rooj tuav xam cov Leej Choj lawv yuav xub mloog ua ntej, tsis yog muab pob ntseg mloog, tab sis yog lawv muab lub siab mloog.

Das Nias tus piv txwv thaum nws raug pov rau hauv lub nkuaj tsov qhia peb txog qhov no, Das Nias nyob ntsiag ntsiag mloog Tswv Ntuj lub suab hais lus rau nws. Tswv Qhia Liab Npos taw kom pom tias lub Koom Txoos thiab pawg neeg ntseeg xav tau lub sij hawm ntsiag muaj qab hau, tsis yog ntsiag vim ntshai, tab sis yog ntsiag vim kev tswm seeb. Kev muab lub siab mloog hloov cov suab sab puag ncig peb ua kev tso siab lub suab saub.”

Kev rau siab mloog ua kom pawg neeg rais ua cheeb tsam cia tau kho cawm, kev rau siab mloog pub kev nplij rau lub qab ntuj uas tsuas muaj kev nrhiav rau yus ntiag tug los muaj kev ntxhov siab thiab kev ntshai ntau dhau. Peb sim xav txog kev sab laj nyob hauv peb lub Cheeb Tsam thiab peb lub Ceeb Koom Txoos, yog sawv daws siv sij hawm kom luv tab sis tau raws lub hom phiaj thiab tau lub ntsiab, mas yuav zoo dua. Peb ua tau li ntawd, yog peb xyaum rau siab mloog.

- Txoj kab ci tim Ob, tus thawj coj tsum ua txoj hauj lwm tsob hwb.

Txoj kab ci tim ob no yog taw mus rau kev ua tus coj. Tswv Qhia Liab Npos ntuas cov tuaj koom lub Rooj Sau Siab tias zoo ib yam li Das Nias, nws soj ntsuam cov vaj thiab lawv cov teb chaws kev sawv thiab qaug, mas Das Nias pom tias lub hwj chim tseeb tiag tsis yog tuaj ntawm neeg lub zog loj tuaj tab sis yog tuaj ntawm kev tsis muab hlob thiab ua tub txib.

Tus tseem thawj coj yog tus ntxuav lwm tus txhais taw, tsis yog tus taw tes kom luag ua raws li nws hais, ces Tswv Qhia Npos muab zaj lus nws tau hnov ib tug Tswv Qhia piav coj los tham tias “Yog koj lub nplhaib ua rau koj xav tias koj zoo li ib tug vaj, mas koj txhob muab hle pov tseg. Tab sis yog koj saib zoo li koj yog ib tug vaj tsis yog tus tswv zov yaj lawm, mas txhais tias txog lub caij koj yuav tau muab lub nplhaib hle thiab ntxuav luag txhais ko taw.”

Nws hais ntxiv tias kev ua thawj coj tsum pab tsa lwm tus kom siab thiab tawm tsam kev nyiam khawm lub hwj chim uas txhawv nyob hauv lub sawm fem thiab Koom Txoos tus txhooj. Nyob As Xias teb, kev hwm cov neeg muaj hwj chim cog cag tob thiab ruaj nyob hauv neeg nruab siab, peb tsum nco ntsoov tias kev ua thawj coj tiag yog kev tsob hwb, tsis yog qauv cim qhia tias koj nyob rau txheej qib twg. Tus ua tim khawv txog lub Koom Txoos, nws tsum ua neeg me tsis muab hlob, hlub sawv daws, thiab muaj tus cwj pwm ua thawj coj nyiam tsob hwb txhua txheej neeg.

- Txoj kab ci tim Peb, kev sib txawv ntau yog paj tshab, tsis yog qhov hem thawj.

Tswv Qhia Liab Npos tig los hais txog As Xias teb kev sib txawv nplua mias, mas nws rau nqi hais txog qhov sib txawv hauv neeg xeem lus, txuj txoog, thiab kab lis kev cai tias yog txoj koob hmoov, tsis yog tej yam tawm tuaj twv lub Koom Txoos. Lub Koom Txoos raug hu los ua tus txhim tus choj coj txhua haiv neeg txhua xeem lus mus tsob hwb Tswv Ntuj raws li Das Nias lub zeem muag pom tias tsoom pej xeem hauv tas txhua haiv neeg thiab txhua xeem lus lawv tsob hwb Tswv Ntuj.

Tswv Qhia Liab Npos txhawb siab sawv daws kom ntsia tej kev sib txawv ntau tsav yam tias yog Tswv Ntuj qhov zoo nkauj, yog lub qhov txhawv lub tswv yim tsim tawm, tsis yog lub laj thawj ua rau muaj kev sib tawg. Nws hais li no “As Xias xeev ntuj muaj ntau tsav neeg, ntau txheej neeg, thiab ntau cov txuj txoog, lub Koom Txoos tsum hla kom dhau tej qhov sib txawv li no thiab tsum yuav raws li Leej Ntuj Plig lo lus hais tuaj rau peb ib tug rau ib tug.”

- Txoj kab ci tim Plaub, muab cov neeg pluag tso cia nruab nrab.

Txoj kab ci tim plaub yog muab cov neeg pluag saib ua qhov tseem ceeb nyob hauv lub Koom Txoos lub suab hu. Tswv Qhia Liab Npos rov ntuas tsoom ntseeg kom ras tias Huab Tais Yes Xus lub moo yog tuaj thiab cov neeg me thiab cov raug cais tawm rau ib cag kom sawv taus.

Yog Huab Tais Yes Xus nqes los hnub no, nws yuav mus nyob rau qhov twg? Nyaj tsis yog nyob hauv vaj lub tsev, tab sis nyaj yog nyob nruab nrab cov neeg pluag, cov thoj nam, cov tsiv teb. Li ntawd, qhov cov neeg ntseeg nrog cov neeg pluag taug kev mus ua ke, thiaj yog qhov pab kom tus neeg ntseeg tau ntsib Huab Tais Pleev nyob hauv nws lub neej tiag. Qhov peb tsis hnov qab cov neeg raug cais tawm rau ib cag, pheej hmoo rau peb tsis nco qab txog lub Moo Zoo lub plawv. Qhov peb muab cov neeg pluag ua nruab nrab yuav txhawb lub siab ntseeg thiab Koom Txoos lub suab hu kom phlis dua tshiab, ces lub Koom Txoos yuav txia ua kev tso siab lub tsev teeb tsom qhia kev rau cov nkoj tau chaw theem.

- Txoj kab ci tim Tsib, cov hluas kev ciaj sia, xyiv fab luag ntxhi, thiab muaj feem xyuam.

Txoj kab ci kawg yog cov tub ntxhais hluas nyob As Xias. Lawv yog cov muaj tswv yim tsim tawm, muaj kev sib txuas, thiab txhawb nrhiav lub ntsiab hauv txoj sia, lawv theem nyob hauv kev xav tau rau lub neej zim txwv no thiab kev ntshaw sab ntsuj plig.

Tswv Qhia Liab Npos muab Vaj Qhia Fas Ntshis Kus lo lus los hais rau sawv daws mloog tias “Lub Koom Txoos tsum mus nrhiav cov hluas, tsis yog nyob tos cov hluas tuaj nrhiav.” Qhov no yog txhib pawg ntseeg kom tsim ib thaj tsam rau cov tub ntxhais hluas tau ua chaw hu nkauj, sib nug, coj kev, thiab ua chaw npau suav. Yog lub Koom Txoos nrog cov hluas mus ua ke, mas lub Koom Txoos yuav tsis muaj qhov laus. Li ntawd, kev nqes peev rau cov hluas pab kom lub Koom Txoos cia siab tau tias Leej Pleev lub Ceeb Tsheej yuav nyob nraim nrog As Xias xeev ntuj.

2. Leej Pleev Lo Lus nyob ruaj.

Nyob hauv Tswv Qhia Liab Npos cov lus nthuav Tswv Ntuj Lo Lus ntu tom qab, yog nws cov lus ntuas hais txog cov ceeb tsheej raws li ntiaj teb, suam ke, thiab cov txuj zim txwv tshiab. Nws hais tias tej ntawd nyob tsis ruaj, tuaj ib vuam cev dua mus; yam nyob ruaj thiab nyob mus li kawg yog Leej Pleev Lo Lus xwb.

“Tsuas yog kev nyiam tib yam xwb thiaj tsis yaj ntshis. Tsuas yog Leej Pleev Lo Lus xwb thiaj li nyob ruaj.” Tswv Qhia Liab Npos hais thiab txhib tsoom neeg ntseeg kom ua neej mus raws li 5 txoj kab ci no nyob hauv lawv pab pawg neeg ntseeg. Nws xav pom txog lub Koom Txoos saib kev mloog loj dua kev hais lus, lub Koom Txoos muaj cov thawj coj nyiam ua tus me tsob hwb sawv daws, lub Koom Txoos nthuav tes khawm rawv kev sib txawv ntau tsav, lub Koom Txoos muab cov neeg pluag saib ua chaw nruab nrab, thiab lub Koom Txoos cov hluas muaj feem xyuam koom nrog, mas nws hais li no “Tus Huab Tais Yes Xus thaud rov los rau As Xias teb lawm, nws lub moo hais txog kev nyiam thiab kev rov haum xeeb nrov txog sawv daws pob ntseg lawm.”

Thaum xaus, Tswv Qhia Liab Npos thov Ntuj tias “Huab Tais Yes Xus, thov kom los nrog koj tsom pej xeem nyob As Xias taug kev mus ua ke. Thov koj qhia peb kom txawj mloog, txawj ua tub txib, muaj kev zoo siab, thiab muaj lub siab nyiam mus kom txog hnub koj Lo Los txia ua nqaij nyob hauv sawv daws lub plawv thiab txhua lub tsev nyob As Xias.”

Lub Txoo Txi Ntuj no yog muaj nyob hauv lub tsev txais qhua the Light Hotel lub chav lom zem, tsom kom pom txog lub Koom Txoos nyob As Xias kev sib txawv thiab kev sib koom ua ib tug. Cov tuaj koom lub Txoos ua tsaug rau Tswv Qhia Liab Npos cov lus uas nws tau muab qhov tob hauv neeg sab ntsuj plig los txuas nrog cov lus qhia ua neej, kom tau ua lus txhawb siab rau cov ntseeg tau ntoj kev mus ua ke nyob hauv lub Tuam Teb no.