Tswv Qhia Ferrao thov kom lub Koom Txoos nyob As Xias ua lub neej raws cov lus tseem ceeb ntawm lub pwm tsav (Synodal).

Tswv Qhia Ferrao hais rau cov
Tswv Qhia thiab cov sawv cev uas tuaj koom lub rooj sab laj nyob Jakarta tias :
“Kev sab laj zaum no tsis yog kev sib tham kom tau kho txoj cai, tab sis yog kev mus ua
ke hauv fab ntsuj plig hauv kev rov xav txog. Peb tsis yog tuaj sib sau kom tau tham
txog yav tom ntej ntawm lub Koom Txoos As Xias, tab sis peb tuaj sib sau kom tau
nrhiav Tswv Ntuj lub hom phiaj rau nws haiv neeg.”
Nws cov lus yog qhia txog lub ntsiab lus hauv lub rooj sab laj, ‘Kev nqua hu kom muaj
kev pauv ntxeev hauv Synodal thiab ua cov hauj lwm tus tuam choj nyob As Xias.’ Yog
qhia txog kev muab siab rau ntawm lub Koom Txoos hauv kev txhawb nqa tej kab lis
kev cai thiab kev sib mloog, kev muaj feem cuam thiab kev rov xav txog ua ke. Uas tau
txais lub zog txhawb siab los ntawm cov Tswv Qhia lub rooj sab laj Synodal.
Ntawm Tswv Qhia Ferrao, mas Synod yog hais txog Synodality, tsis yog kev sib
tham los yog kev daws kho kev ua hauj lwm. Nws hais tias : “Lo lus nug tseeb tiag
nyob ntawm peb xub ntiag, tsis yog tias Synodality puas tseem ceeb ? Tab sis yog
qhov tias yuav ua li cas kom nws cog ruaj khov nyob hauv cov Cheeb Koom Txoos, cov
tsev teev Ntuj, cov Koom Haum, cov Txiv Plig, cov neeg ntseeg thiab hauv peb cov tsev
neeg.” Hauv nws cov lus hais, mas Tswv Qhia tau txhib tias lub Koom Txoos txoj hauj
lwm yog pib nyob hauv kev sib tham, zoo li zaj nyob hauv ntawv Moo Zoo hais txog Fis
Lis Pos hais rau Nas Tas Nais tias “Tuaj saib mas !”. Nws hais tias kev tshaj lub Moo
Zoo tsis yog loj hlob los ntawm kev sib cav yeej, tab sis yog kev caw kom ib tsoom
neeg tuaj cuag Yes Xus.
Nws hais tias tus ntsuj plig no tsim nyog yuav tsum tsim nws lub rooj sab laj, yog qhov
uas cov Tswv Qhia nyob thoob As Xias tuaj sib sau kom tau teev Ntuj ua ke, mloog, xav
txog thiab sib faib qhov tseeb hauv kev tshaj lub Moo Zoo nyob hauv lawv cov tsev teev
Ntuj. Txhua yam no tsis yog tus txheej txheem hauv qhov program. Kev teev Ntuj, kev
sib tham thiab kev rov xav txog ua ke, yog kev ua tawm tseeb tiag nyob hauv Synod.

Nws xav txog cov hauj lwm nyob hauv lub Koom Txoos As Xias, uas yog xeev ntuj muaj
tej kab lis kev cai zo, muaj ntau yam kab lis kev cai thiab kev ntseeg uas tseem ceeb.
Tej yam tseeb no yog qhov qhia lub caij nyoog thiab kev txhawj xeeb ntawm lub Koom
Txoos. Lub Koom Txoos As Xias raug hu kom ua tus choj thiab ua tus tuam choj, hauv
kev txhawb nqa kev sib tham, kev sib haum xeeb thiab kev sib koom siab ntau dua tej
kev sib txawv hauv cov kab lis kev cai thiab kev ntseeg. Nws paub txog kev pauv
ntxeev nyob hauv xeev ntuj no, nrog rau AI lub tswv yim tsim tawm, kev tsiv teb tsaws
chaw, kev piam sij ntawm txhua yam nyob ib puag ncig, kev tsis sib luag thiab kev sib
tawg hauv tsov rog. Nws hais tias : “Qhov yuav ua rau cov neeg ntseeg tag kev cia
siab, tej kev tseeb tiag no ua kom lub Koom Txoos qhia txog cov pov thawj txaus
ntseeg nyob hauv kev sib koom tes, kev sib pom dej siab thiab kev muab siab rau tshaj
lub Moo Zoo hauv kev txhawb nqa.” Thaum xav txog yav tom ntej, mas Tswv Qhia
Ferrao hais rau cov tuaj koom lub rooj sab laj, kom sawv daws muab siab rau mloog
Leej Ntuj Plig Ntshiab tas ib lis piam hauv kev sab laj.
Nws vam tias tsab ntawv kawg hauv lub rooj sab laj no, yuav yog qhov tseem ceeb dua
qhov xaus tej lus sib tham, thiab tsim nyog qhia tej yam tseem ceeb rau cov tsev teev
Ntuj nyob thoob As Xias paub txog lub rooj sab laj Synodal hauv kev paub tseeb tiag.
Ua ntej yuav muaj kev sib tham thiab lees txais tej lus qhuab qhia nws hais tias :
“Thawj yam hauj lwm ntawm lub rooj sab laj, yog kev ua ke tuav xam tias zim txwv no
Tswv Ntuj xav tau dab tsi ntawm lub Koom Txoos As Xias.”
Tswv Qhia Ferrao xaus lus tias : “Qhov ua tiav ntawm FABC lub rooj sab laj loj zaum
tim 12, tsis yog yuav ntsuas tau nyob hauv tej ntaub ntawv, tab sis yog los ntawm cov
tawm hauv Jakarta rov mus rau lawv tej zej zog uas lawv muab siab rau mloog Leej
Ntuj Plig Ntshiab. Cov muab siab rau ua ke thiab npaj txhij, seb lawv puas yuav ua
tus tuam choj sib txuas thoob As Xias teb ?”