Prevost yog tus Vaj Qhia tshaj Ntuj Lus nyob Peru, hauv lub Koom Haum Leej Ntshiab Aus Nkus Tis Nus
Tus Vaj Qhia tshiab Leo 14 uas yog Prevost. Nws yug hnub tim 14 lub 9 hlis xyoo 1955 nyob Chicago. Hauv ib haiv neeg uas muaj tus cag los ntawm Aws Los Pas. Nws kawm ntawv nyob hauv cov tsev kawm ntawv uas yog lub Koom Haum Aus Nkus Tis Nus yog tus tswv. Lub Koom Haum Aus Nkus Tis Nus yog lub Koom Haum uas muaj cov Txiv Plig coob tshaj nyob As Xias. Nws pib ua Leej Tij thaum nws muaj 22 xyoos, thiab tom qab nws tau txais daim ntawv pov thawj txheej siab hauv Villanova nyob Philadelphia.
Nws raug xa mus kawm lub Koom Txoos txoj cai nyob hauv lub tsev kawm txheej siab Angelicum. Nws tau txais lub Cim Tiag Tes ua Txiv Plig nyob Los Mas xyoo 1982. 3 xyoo tom qab nws tau mus tshaj lub Moo Zoo nyob Peru. Chiv thawj nws tshaj lub Moo Zoo nyob hauv lub nroog Chulucanas. Xyoo 1988, nws raug tshais chaw mus nyob hauv lub nroog Trujillo. Nws pib saib xyuas cov kawm ua Txiv Plig tshiab nyob Peru. Xyoo 1999, nws raug xaiv ua tus thawj tswj lub Koom Haum Aus Nkus Tis Nus nyob hauv lub xeev Chicago. 2 xyoo tom qab cov Txiv Plig tau xaiv nws ua tus thawj coj saib tas nrho cov Txiv Plig Aus Nkus Tis Nus nyob thoob ntiaj teb.
Xyoo tom qab Vaj Qhia Fas Ntshis Kus xa nws rov mus nyob Peru thiab tsa nws ua tus Tswv Qhia saib lub Cheeb Koom Txoos Chiclayo uas nyob Peru xib fab pej. Nws hais tias cov hauj lwm no tias yog kev paub ntau yam tseem ceeb ntawm nws lub neej. Nws nrog cov neeg ntseeg hauv lub Cheeb Koom Txoos qub uas nws rau saib xyuas nyob Peru sib tham ua lus Xyis Pas Yas. Xyoo 2015, nws tau txiav txim siab ua neeg Peru muaj ntaub ntawv nyob lub teb chaws ntawd. Lub 1 hlis xyoo 2023, Vaj Qhia Fas Ntshis Kus hu nws rov mus Los Mas thiab ua tus thawj coj saib xyuas thaj tsam tseem ceeb ntawm cov Tswv Qhia, thiab tsa nws ua tus thawj tswj Vaj Qhia cov kav xwm nyob Latin America. Nws raug tsa ua Tswv Qhia Liab lub 9 hlis xyoo 2023. Nws ua tus Tswv Qhia Liab txheej 2 yau zog Vaj Qhia Fas Ntshis Kus uas yog tus thawj coj lub Koom Txoos Kav Tos Liv xwb.
