Myanmar teb tab tom sau tub rog, Thaib teb kuj yuav ncua Visa ua hauj lwm.
Cov tseem hwv Thaib xav txuag kev sib tawg ntawm tus tiam lis Myanmar thiab Thaib teb, ces tsis ntev los no tus thawj pwm tsav Thaib Srettha Thavisin thiaj ceeb toom tias : cov tub zog hla teb chaws txhaum cai yuav raug ua raws txoj cai, yam li yuav ntiab cov tub zog Myanmar tawm teb chaws, yog tias tseem muaj cov neeg thoj nam khiav nkag Thaib teb ntxiv.
Tseem hwv Thaib ntxhov siab txog kev nyiag nkag teb chaws ntawm cov neeg Myanmar, tom qab cov tseem hwv Myanmar yuav pib sau tub rog hauv lub teb chaws. Yuav sau cov tub hluas uas muaj hnub nyoog 18 xyoo txog 35 xyoos, thiab cov ntxhais hluas hnub nyoog 18 xyoo txog 27 xyoo mus ua tub rog. Kev sau tub rog yuav pib txij hnub tim 1 lub 4 hlis xyoo no.
Lub caij sau tub rog ze zuj zus, ces muaj cov neeg khiav ua thoj nam nkag Thaib teb coob dua qub, thiab Thaib teb kuj tab tom raug teeb meem loj los ntawm cov neeg thoj nam khiav tsov rog nyob Myanmar teb, ces xav tias yuav muaj tshaj 2 plhom tus neeg nyiag kev hla ciam teb nyob ntawm Myanmar teb sab hnub tuaj npuas Thaib teb. Vim cov teeb meem uas cov tub ntxhais hluas raug sau ua tub rog nyob Myanmar teb, ces tseem hwv Thaib thiaj yuav tsum ua raws txoj cai xaiv cov neeg thov Visa ua hauj lwm kom nruj dua qub. Vim ntshai tsam cov neeg nce npe ua tub zog yuav rais ua neeg thoj nam nyob Thaib teb.
