Kev Tso Siab Tawm Rooj Fiv Ntuj Loj txoj hauj lwm yog sau As Xias lub laj lij los ua ke

Nyob hauv lub zim txwv lub Koom Txoos nyob As Xias teb tuav xam hais txog rooj sau siab Kev Tso Siab Tawm Rooj Fiv Ntuj Loj nyob Pis Naas, Mas Les Xias teb txij hnub tim 27-30 lub 11 hlis xyoo 2025, peb tsis yog raug hu kom rov los xav txog peb kev koom tib lub siab ntseeg xwb, peb tseem raug hu los xav txog daim teb uas lub siab ntseeg nrhau cag cog ruag nyob rau thiab.

Nyob hauv lub rooj sau siab no, yuav muaj tshaj ntau pua txhiab leej neeg tuaj koom, tsis hais cov Tswv Qhia, Leej Choj, Leej Qee, Tub Tsob Hwb, cov txwj laus Leej Nrog. Lawv ib leeg ris ib lub nras tuaj; yog lub nra hais txog lub Koom Txoos nyob As Xias tias peb yuav ua lub neej raws li peb txoj kev kom haum peb lub Tuam Teb cov cuab tam txuj txoog nplua mias thiab peb lub Tuam Teb cov kab lis kev cai ntau tsav sib txawv tau li cas?

Lo lus teb tsis yog qog los ua raws lub tswv yim npaj tseg sab nraud, tab sis yog nyob hauv kev pom zoo thau yam tob tob raws li ntuj tsawb teb tsim hauv lub Koom Txoos nyob As Xias los siv.

As Xias teb yog lub paj tshab muaj ntau tsos

As Xias teb yog lub hauv paus loj chiv cov kab lis kev cai sab ntsuj plig tseem ceeb nyob hauv qab ntuj; yam li kev cai Phus Thas, kev cai His Ntus, kev cai Is Xas Las, thiab kev cai dab qhuas raws haiv raws xeem. Raws li cov neeg Xib Fab lub tswv yim, lawv hais tias kev muaj ntau tsav ntau tsos li no yog teeb meem, tej teb chaws tawg ua sab ua sua li no yuav tsum muaj kev tawm tsam los kev pauv ntxeev. Tab sis yog raws li peb pab pawg ntseeg Kav Tos Liv nyob As Xias, peb xav tias kev muab txuj txoog thiab kev teev hawm los sib nruab sib dhos kom tsa tau ua ib tug qauv, yog thawj lub paj tshab tseem ceeb tshaj txhua yam.

Kom qhov tseeb tiag no tsheej xeeb, mas tsum muaj ib txog kab xwm tshwj xeeb; yog lees tias Tswv Ntuj lub txiaj ntsim thiab Tswv Ntuj qhov tseeb yeej nrhau cag nyob hauv peb cov txuj txoog lawm. Kev ua Yes Xus Pleev thwj tim nyob As Xias thiaj li yog kev ua lub neej sib ntsib tsis tu ncua; txhais tias yog ua tim khawv txog Leej Pleev tsis yog nyob hauv kev ua tus tswv tswj, tab sis yog nyob hauv kev nyiam kev hlub, thiab kev koom ua leej tib neeg.

Tswv Ntuj hu peb tsis yog kom tau rhuav cov txuj txoog tus qauv uas txheem cov nyob ze peb, tab sis Tswv Ntuj hu peb kom tau cev Leej Pleev lub txiaj ntsim cawm neeg rau lawv nyob hauv qhov tob tshaj plaws hauv lawv cov txuj txoog uas coj lawv mus ntsib kev thaj yeeb, kev haum xeeb, thiab kev nyob koom pab koom pawg.

Lub neej kev sib tham yog Ntuj kev cai txoj kev

Lub hauv paus ntawm kev sib tham no tus hom thawj muaj tus cag nyob hauv lub Moo Zoo lub plawv, lub plawv ntawd yog zaj txuj tob hais txog Tswv Ntuj Leej Tub xeeb los ua neeg. Tswv Ntuj tsis xaiv nyob deb deb tim ntsej tim muag nrog ntiaj teb neeg tab sis Tswv Ntuj xaiv los nyob hauv tib neeg kom tau tim ntsej tim muag nrog ntiaj teb neeg.

Txoj ke haum tshaj plaws rau lub Koom Txooos nyob As Xias, mas yog lub neej kev sib tham, uas yog cov Kav Tos Liv coj lub neej mus raws kev tsim txiaj nyob nruab nrab hauv cov neeg coj lwm txoj kev teev hawm; qhov no yog kev ua tim khawv ntsiag ntsiag. Kev sib tham no tsis yog kev sab cav txog Ntuj kev cai, tab sis yog zoo li sawv daws nyob hauv tib luab kiab khw, sawv daws ua phooj ywg, koom kev zoo siab thiab sib pab sib nres.

Yam tshwm nyob hauv lub neej niaj hnub

- Koom ua hauj lwm pab zej zog: Yam li nrog cov coj kev teev hawm Phus Thas, Mawv Xim Lim, los cov His Ntuas nyob ib puag ncig koom tes tus yus lub zos kom huv xis nyob, los sib koom siab pab cov neeg raug dej nyab. Thaum sawv daws koom ua hauj wm tsob hwb yus zej zog li no, txawm peb tsis hais tawm ua lo lus, los Leej Pleev kev nyiam tsis muaj nrim yuav ci ntsa tawm tuaj rau sawv daws pom.

- Kev ntaus phooj ywg ntawm cov txoj kev teev hawm sib txawv: Kev phooj kev ywg thiab kev sib hwm ntawm cov Kav Tos Liv thiab cov tsis yog Kav Tos Liv, kev tsa koob tsheej los koom ua hmoov ua ke, kev nplij tus neeg raug txom nyem siab. Tej yam zoo li no ua pov thawj txog ob tog kev sib hwm tias yog qhov chaw ntshiab, vim nkawd ib tug saib taus ib tug, nkawd hwm neeg lub tsim.

-  Kev muaj nyob rau ntawd yog qhov loj dua kev tshaj txog kev ntseeg: kev coj neej nyob yooj yim yam li thov Ntuj rau luag pom, ua neeg tsim txiaj tsheej haj, ua siab dav hlub sawv daws; tej no ua pov thawj tau zoo tshaj plaws. Qhov no yog lub siab ntseeg nrhiav kev haum xeeb, tsis yog nrhiav kev tswj.

As Xias lub laj lim yog txoj kev coj mus cuag lub Moo Zoo.

As Xias teb lub cuab tam txuj txoog, yog hais txog kev tsim txiaj thiab pab pawg tus ntsa tob heev, uas yog txoj kev ntuj tsawb teb tsim cia mus cuag lub Moo Zoo qhov muag nqes. Kom tsheej tau ib tug tseem neeg As Xias thiab neeg nKav Tos Liv, peb tsum kawm kom paub cov kev cai kab kes no:

- Cov Fis Lis Pees zaj tswv yim Pas Kis Kis Kas Nkas Vas: Yog lub tswv yim qhia ntsia kom pom yus nyob hauv luag lwm tus, ces yus yuav txawj ua zoo rau luag. Qhov no tsom kom pom txog Yes Xus cov lus qhia kom nyiam tus nyob ze yus yam tsis muaj chaw xyeej, thiab hwm Tswv Ntuj tus duab nyob hauv sawv daws.

-  Cov Is Ntos Nes Xias zaj tswv yim Nkos Toos Nros Nyoos: Yog zaj tswv yim qhia kom sib koom tes thiab sib faib nra ris. Lub tswv yim no yog tus qauv muaj zog rau lub Koom Txoos cov lus qhia hais txog lub sawm fem, vim tias Leej Pleev lub Cev sib pab tsim kev zoo nrog lawv zej zos ua huam vam loj zuj zus mus.

- Cov Zis Pees zaj tswv yim Vas: Lo lus ‘Vas’ txhais tias haum xeeb thiab sib koom nyob thaj yeeb. Vas taw kev rau sawv daws kom nyob nyab xeeb thiab tsis txhob sib tawm tsam. Ntawm lub Koom Txoos, Vas txhib peb kom thaum tim ntsej tim muag nrog kev sib txawv, tsis hais kev cai, kev tswj teb chaws, sawm fem, mas peb tsum paub sib hwm thiab nrhiav kev sib nkag siab thiab kom rov tau haum xeeb.

- Cov Is Ntias zaj tswv yim Xas Tas Yas Nkas Has: Zaj tswv yim no ntxim rau txhais tias ‘qhov tseeb lub zog’ los yog ‘khaj cai tsis ua kom ntxhov quav niab’. Lub hauv paus mas yog ncau los ntawm ua tim khawv txog kev tsim txiaj, lub tswv yim no haum rau cov ntseeg txog Yes Xus Pleev kev nkag siab txog kev ncaj ncees, kev thaj yeeb, thiab kev ua zoo los tiv kev ua phem.

Yog peb puag los qaws cov txuj txoog tsim txiaj no, mas yog peb ntuav kom pom txog Leej Pleev cov xov tias yog cov xov vas tas lub sim ceeb. Peb ua kom pom tias Tswv Ntuj kev nyiam sib hiab sib ntos ua ib daim nyob hauv cov neeg As Xias lub neej, Tswv Ntuj kev nyiam tos rhw kom sawv daws pom zoo thiab coj mus siv kom zoo txhij.

Nqua hu kom rhais ruam mus ua ke nyob hauv kev tso siab

Kev Tso Siab Tawm Rooj Fiv Ntuj Loj nyob Pis Naas yog lo lus nqua hu sawv daws los ua txoj hauj lwm no kom zoo dua tuaj. Hu peb cov yog neeg ntseeg uas yog nyob hauv tib lub Koom Txoos Tuam Teb, kom ua pov thawj tias peb lub neej lawm pem suab mas peb muab faib pub rau cov nyob ze peb tsis hais lawv coj kev teev hawm dab tsi.

Tej teeb meem peb ntsib, tsis hais kev pluag, kev tswj teb kav chaw, huab cua, kev raug cais vim txoj kev teev hawm, cov teeb meem no peb ib leeg xwb daws tsis tau. Li ntawd, peb thiaj yuav tau rhais ruam mus uke nyob hauv kev tso siab, mas peb thiaj yuav hla dhau kev teev hawm thiab txuj txoog tus ciam tau.

Lub Koom Txoos raws li As Xias txoj kev: yam li yog lub Koom Txoos tsis muab hlob, sib nkag siab, thiab nyob nrog nraim; yog lub Koom Txoos pub thiab tsob hwb lub Tuam Teb.

Peb npaj tos ua rooj sau siab, mas thov kom peb muab siab rau ua cov thwj tim lis qav num uas paub tias kev ua tim khawv muaj zog loj tshaj plaws, mas yog ua tus neeg tsis muaj chaw xyeej, muaj lub siab hlub mos nyoos, tsom kom luag pom txog Tswv Ntuj kev nyiam tsis muaj nrim.

Nyob hauv As Xias kev sib dhos ua ib lub Tuam Teb no, Kav Tos Liv lub siab ntseeg yuav ci ntsa iab thaum sawv daws nyob sib haum xeeb nrog yam zoo nkauj ntau tsav ib ncig sawv daws.