GPH Hnub 3: Tus coj lub Koom Txoos nyob As Xias muab kev pab saib xyuas cov Leej Choj nruab siab cia ua qhov tseem ceeb tshaj
Nyob hauv lub rooj xov xwm hauv Rooj Sau Siab Kev Tawm Rooj Fiv Ntuj Loj nyob Pis Naas, muaj ib lo lus sawv daws ntsig nug yog lo lus hais txog kev saib xyuas cov Leej Choj thiab cov Tswv Qhia nruab siab, mas cov thawj coj lub Koom Txoos pom tias yog qhov tseem ceeb rau cov Leej Choj.
Hnub tim 29 lub 11 hlis, nyob hauv lub tsev txais qhua the Light Hotel nyob Pis Naas, yawg Das Nias Laws, lub Ceeb Koom Txoos Pis Naas tus hau saib xyuas xov xwm ua tus ntsig nug Tswv Qhia Liab Kis Kus Tshis tus Tuam Tswv Qhia nyob Tos Kis Yaus thiab Tswv Qhia Liab Fas Ntshis Kus tus Tswv Qhia nyob Pis Naas.
Txiv Plig Fes Mas Fis Es, SVD, tus Kav Xwm lub rooj xov xwm Radio Veritas Asia kuj muab ib lo lus nug zoo li no “Nyob thoob qab ntuj, sawv daws txhawj txog kev saib xyuas cov Leej Choj nruab siab. Tsis paub tias cov Tswv Qhia nyob As Xias puav tau tuav tswv yim txog qhov no li cas?”
Lub Ceeb Koom Txoos cov Leej Choj raug tso nyob twm zeej thiab lawv raug tau yam kev ntxhov siab
Tswv Qhia Liab Kis Kus Tshis lees tias muaj ib yam tsis zoo tswh xeeb rau lub Koom Txoos cov Leej Choj, yog qhov tias lawv nyob twm zeej thiab kev pab txhawb lawv muaj tsis xwm yeem. Nws hais li no “Muaj ntau tus Leej Choj lawv nyob ib leeg, tsis muaj tus nrog lawv tham. Yog lawv tham txog koj kev txom nyem rau luag tej mloog, mas luag yuav xav tias ua cas txawm siv qaug zog los ntog lawm. Lawv ntshai qhia tawm yam lawv tab tom ntsib rau lwm tus paub.” Tswv Qhia Liab Kis Kus Tshis pom tias yog ntawm cov Leej Choj hauv npoj Leej Qee, mas tab txawm lawv muaj kev tsis sib haum, los lawv tseem saib zoo li lawv yog ib feem hauv lawv pab pawg, tsis zoo li cov Leej Choj hauv lub Ceeb Koom Txoos uas tsis muaj ib qhov chaw cia rau pab txhawb lawv lub zog, ces ua rau lawv pheej hmoo rau kev xav ntau thiab lawv qaug zog li lub cub tawg uas tsis ciaj lawm.
Tsis tas li ntawd, cov Leej Choj tseem raug zeej tsoom tshuaj xyuas thiab thuam li ub li no thiab, qhov no ua ib lub zog tuaj nias lawv, Tswv Qhia Liab Kis Kus Tshis hais li. Cov Leej Choj raug cov pej xeem ntseeg thiab luag lwm tus sab nraud tsawm hnyav, tshwj xeeb rau tej yam cuam tshuam rau neeg lub siab kev xav. “Lawv yuav thaiv tus kheej tsis tau, thaum lawv raug cov lus thuam ntawm tsoom sid. Tej no yog tej yam txov lawv nruab siab.”
Kev qhia hauv cov tsev kawm ua Leej Choj thiab kev txhawb ntawm cov koom haum.
Tseev kom cov Leej Choj muaj peev xwm tiv tau tej li hais los no, ziag no cov Tswv Qhia tab tom tuav xam tias yuav muaj kev qhia hais txog kev saib xyuas nruab siab thiab kev fim nrog luag lwm tus rau cov tub kawm ua Leej Choj. Chav ntawv yuav tsis qhia cov txuj hais txog Ntuj lawm xwb, tsum qhia txog tej yam kev txawj kev paub coj mus siv nyob hauv lub neej thiab, yam li kev sib txuas lus, kev mloog, thiab kev paub tiv thaiv yus tus kheej; tej no yuav pab tau kom cov Leej Choj yuav tuaj tom qab no, lawv muaj rab peev xwm txais tau tej yam tuaj raug lawv tsis hais sab ntsuj plig thiab sab sawm fem. Teeb meem kev hais xeem lus kuj yuav ua ib yam ceeb laj thiab, tshwj xeeb rau cov nyob As Xias Toob Fab xws li Zis Pees, Kos Lim, Thais Vas uas lawv tsis siv xeem lus Aas Kiv, vim tias cov txuj hais txog kev saib xyas nruab siab qhia ua lus Aas Kiv.
Tswv Qhia Liab Fas Ntshis Kus taw kom pom tias kev pab txhawb ntawm cov koom haum yog yam tseem ceeb thiab hais txog kev ua hauj lwm nyob As Xias tias “Muaj ntau lub koom haum, yam li nyob Fis Lis Pees thiab Is Ntias, uas lawv txhim tsa kom tau pab cov Leej Choj uas ntsib teeb meem hais txog fab nruab siab.” Cov laj txheej no muaj cov kws txawj ua tus tuav saib thiab muaj tus txhooj haum rau cov Leej Choj ntsib teeb meem kev xav ntau mob hlwb, kev ntxhov siab, thiab kev nyuaj siab.
Tsis tas li ntawd, Tswv Qhia Liab Fas Ntshis Kus tseem muab siab rau hais txog kev saib xyuas nruab siab rau cov Tswv Qhia thiab. Nws hais tias “Nag hmo, Tswv Qhia Liab Tas Nkes tau hais tias cov Tswv Qhia lawv kuj ntsib teeb meem nyuaj siab thiab qaug zog thiab. Vas Tis Kas tab tom tuav xam nrhiav saib puas yuav muaj ib qhov chaw tshwj cia tau pab cov Tswv Qhia uas xav tau kev pab sab nruab siab.”
Dhau ntawm cov koom haum txhim tsa, Tswv Qhia Liab Fas Ntshis Kus hais ntxiv, kev sib fim sib raug zoo ntawm cov Leej Choj thiab lawv tus hau kuj yog qhov tseem ceeb thiab. Nws hais li no “Kev sib raug zoo nrog lawv tus hau yog qhov tseem ceeb. Vim tias qhov no yog tus taw ntsa ntawm kev saib xyuas npj neeg ntseeg thiab kev nyob zoo tag nrho.” Nws ua pov thawj tias lub Koom Txoos yeej muaj kev pab cuam rau cov Leej Choj txhua txheej txhij thiab lub Koom Txoos muab siab rau kev saib xyuas no kom zoo tshaj raws li yuav ua tau.
Ntau txoj xub ke.
Ob tug Tswv Qhia Liab lees tias hais txog kev saib xyuas cov Leej Choj nruab siab mas yog ib yam tsis yooj yim. Tswv Qhia Liab Kis Kus Tshis taw txog kev cheem tsum kev hla kom dhau neeg cov txuj txogg thiab cov koom haum, ntawm Tswv Qhia Liab Fas Ntshis Kus mas nws taw txog txoj hau kev yuav pab cuam thiab kev sib fim sib raug zoo nyob hauv lub Koom Txoos.
Kev tuav xam nyob hauv Kev Tso Siab Tawm Rooj Fiv Ntuj loj no, rov ua kom ras tau tias lub Koom Txoos nyob As Xias ntsib teeb meem hais txog cov Leej Choj thiab cov Tswv Qhia raug kev ntxhov siab. Tsis hais kev xav tau tus Leej Choj raws li lub siab ntshaw, kev tshuaj xyuas ntawm tsoom sid thiab ntawm lub Koom Txoos, thiab kev nyob twm zeej. Li ntawd, cov coj lub Koom Txoos thiaj nqua hu kom muaj ntau txoj xu ke los sib pab daws qhov teeb meem no, tsis hais cov tsev kawm Leej Choj, cov kws txawj saib xyuas nruab siab, thiab kev pab txhawb ntawm pab pawg.
Lub rooj Kev Tso Siab Tawm Rooj Fiv Ntuj tseem muaj mus ntxiv, los kev saib xyuas cov Leej Choj nruab siab tseem yog yam ua kev ntxhov siab rau cov coj lub Koom Txoos. Qhov no tsom kom pom tias sawv daws muab siab rau saib xyuas cov qee lub neej los tsob hwb sawv daws.
