Cov tub ua hauj lwm npaj txhij ntu kawg, yog thaum cov thawj coj FABC tuaj txog Jakarta.
Pab neeg ua hauj lwm tos txais cov sawv cev nyob hauv lub tshav dav hlau Soekarno-Hatta nyob Jakarta, thiab coj cov qhua mus txog lub tsev txais qhua Mulia nyob Jakarta. Dua li lwm pab neeg, mas saib xyuas kev nce npe, tos txais qhua, npaj tej ntaub ntawv yuav sab laj, kos npe thiab taw qhia. Cov tub xov xwm, npaj cov kab ke, sib xa xov, kho mob, tos txais thiab cov tub Technical kuj npaj cov hauj lwm kawg ua ntej yuav qhib lub rooj sab laj.
Txiv Plig Kristi tus lwm thawj tswj pab kav xwm npaj lub rooj sab laj hais tias :
“Kev tuaj txog ntawm cov qhua yog qhov maj dua tej kev npaj logistical. Ua ntej cov sawv cev yuav chaws mus hauv chav sab laj, kom tau tuav xam txog tej kev txhawj xeeb uas lub Koom Txoos As Xias ntsib, mas peb xav kom lawv xub paub qhov tseeb tias; lawv raug tos txais zoo ib yam tib co kwv tij.”
Nws hais ntxiv tias : “Txhua yam hauv kev tos txais yog qhia txog fab ntsuj plig ntawm lub Koom Txoos raws Synodal uas yog lub Koom Txoos sib koom mus ua ke.”
Kev sib txuas lus ntau lub hlis ntawm lub Koom Txoos cov neeg ua hauj lwm, cov ua hauj lwm hauv tshav dav hlau, cov tub ceev xwm soj ntsuam neeg nkag teb chaws, cov xa neeg mus los, cov ua hauj lwm hauv tsev txais qhua thiab tseem hwv cov neeg. Sawv daws muaj kev sib koom tes, ces kev ua hauj lwm thiaj mus tau zoo.
Txiv Plig Kristi hais tias : “Tej kev sib koom tes no ua kom pom txog lub ntsiab hauv lub rooj sab laj. Qhov ntawd yog kev sib koom ua ib tug, uas txhais tias ‘tas nrho Tswv Ntuj haiv neeg’ sib koom tes ua lub Koom Txoos As Xias tub txib.”
Hilary Aristotel ib tug hauv pab neeg sib txuas lus uas nrog nraim cov sawv cev, tau piav txog nws cov hauj lwm tias ‘yog qhov tshwj xeeb’.
Nws hais tias : “Tej hauj lwm no ua kom pom tias ; txhua pab kav xwm ua hauj lwm li cas rau tej kev xav tau ntawm 150 tus qhua tuaj koom lub rooj sab laj, thiab ua kom lub rooj sab laj mus tau zoo.”
FABC lub rooj sab laj loj zaum tim 12, uas yog lub Koom Txoos Kav Tos Liv nyob Is Ntos Nes Xias ua tus npaj. Yog sau tas cov Tswv Qhia nyob As Xias tuaj sib koom ua ke ib lub lis piam hauv kev thov Ntuj, kev sib tham thiab kev rov xav txog, hauv lub ntsiab lus ‘kev pauv ntxeev hauv lub pwm tsav los yog Synodal thiab kev tuam choj txuas nrog lwm cov kev teev hawm.
