Cov lus iab hiam nrog rau kev raug mob ntawm lub cev, tawm tsam txog Txiv Plig thiab nws lub tsev kawm ntawv

Lub tsev kawm ntawv hwm Leej Ntshiab Fas Ntshis Kus hauv lub nroog Khunta Kheda, lub xeev Uttar Pradesh, nyob Is Ntias teb. Poob nyob hauv kev sib tawm tsam los tau ntau hnub lawm. Tej no cuam tshuam txog cov tsev neeg, cov thawj coj zej zog thiab cov thawj coj ntawm lub Koom Txoos.

Txiv Plig Arisher uas nws yog tus thawj tswj saib lub tsev kawm ntawv hwm Leej Ntshiab Fas Ntshis Kus hauv lub nroog Khunta Kheda raug ntes, thiab nws raug tso tawm tom qab raug ntaus thiab raug iab hiam tias : “Coj tus cuj pwm tsis zoo rau cov tub kawm.” Tab sis cov niam cov txiv coob leej hauv lub tsev kawm ntawv pab txuag nws. Lawv hais tias tej kev iab hiam no, yog xav ua kom Kav Tos Liv lub suab npe puas. Tswv Qhia Jesuraj hais tias : “Tsis muaj leej twg yuav muab kev ncaj ncees los tso nyob hauv nws tes tau. Cov teeb meem no yuav tsum tau txais kev soj ntsuam kom ncaj ncees.” Cov lus sib cav sib ceg no tshwm sim los ntawm tej lus iab hiam tsis meej tseeb txog Txiv Plig Arisher tias : “Coj tus cuj pwm tsis zoo”. Nws yog tus Txiv Plig Kav Tos Liv thiab yog tus txhim tsa lub tsev kawm ntawv. Nws raug ntes hnub tim 16 lub 2 hlis no thiab tib hnub ntawd nws kuj raug tso tawm tom qab xuas nyiaj mus yuam.