Cov Kav Tos Liv Mas Les Xias sib sau ua thaj txi Ntuj kom tau nco txog Xis Npis - Kas This Nkas Xus hauv lub caij uas nws raug tsa ua Leej Ntshiab

Hnub tim 6 lub 6 hli no, cov neeg ntseeg Kav Tos Liv nyob Mas Les Xias teb tau tuaj sib sau nyob hauv lub tsev teev Ntuj hwm tus Tuam Tshiab Miv Kas hauv lub Cheeb Koom Txoos Pis Naas kom tau ua kev sam hwm rau Xis Npis - Kas This Nkas Xus (Sybil Kathigasu) uas nws yog ib tug poj niam nto npe hauv lub caij muaj tsov rog. Cov neeg ntseeg Kav Tos Liv taij thov kom tsa nws ua ib tus neeg Ntshiab thiab qhov kawg nws kuj raug tsa ua Leej Ntshiab. Kev nco txog zaum no yog ncaj rau hnub txwm 78 xyoo ntawm nws txoj kev tuag, muaj kev teev Ntuj ua ke thiab mus hwm nws lub ntxa. 

Tus qub thawj tub rog Aus Nkus Tis (Fitzgerald Augustin) hais lus nyob hauv lub txoos txi Ntuj muaj lub ntsiab lus tias ‘Kuv tuag rau kuv tus Tswv Ntuj, kuv cog lus nyob hauv Tswv Ntuj lub npe’, mas nws tau hais txog Kas This Nkas Xus lub neej ua kws muab tshuaj thiab tus pab yug me nyuam uas tiv cov Zis Pees nyob Mas Las Yas hauv ntsuj tsov rog ntiaj teb zaum ob ua rau nws yog tus neeg luag qhuas tshaj nyob hauv lub teb chaws.   

Kas This Nkas Xus nyiag pab cov tub tiv thaiv uas yog nws tsev neeg cov phooj ywg nyob Pas Pas As hauv lub xeev Pes Las. Nws pab nrhiav tshuaj, pab kho mob thiab txhawb nqa cov neeg tiv Zis Pees txoj kev kav teb chaws. Tej yam nws ua, ua kom qhov kawg nws raug cov tub rog thiab cov tub ceev xwm nyob Kes Paws Tasi (Kempeitai) ntes kaw. Tab txawm nws yuav raug tsim txom sab thiab raug soj ntsuam ntev loo, tsis kav nws tsis kam qhia txog cov neeg nws nyiag pab lawv. Nws txoj kev txom nyem hauv lub caij muaj tsov rog raug sau tseg nyob hauv nws phau ntawv sau cim xwm ‘No Dram of Mercy.’ Yog ib zaj tseem ceeb hais txog qhov nws tiv kev txom nyem, ua tiag nyiaj thiab nws txoj kev ntseeg ruaj khov. Cov qhov txhab uas nws raug lub caij nws nyob hauv nkuaj, muaj caws pliav nyob puv nkaus. Ib qho uas ntxim siab tshaj hauv nws lub neej, yog tshwm sim tom qab tsov rog. Thaum nws tus txha caj qaum mob heev, mas nws thov kom lawv muab nws coj mus rau lub tsev teev Ntuj hwm Leej Ntshiab Yos Xes nyob Npas Tus Nkas Ntsas (Batu Gajah). Kom lawv muab nws tso nyob ntawm lub qhov rooj tsev teev Ntuj, cia nws maj mam nkag mus kom txog lub thaj txi Ntuj, kom nws tau teev Ntuj nyob ntawm lub Cim Yug. 

Hais txog ntawm cov neeg ntseeg, mas cov xwm txheej no qhia kom pom txog txoj kev ntseeg ruaj khov, tab txawm yuav ntsib kev mob thiab txom nyem ntau yam kuj xij. 

Cov tuaj sib sau teev Ntuj hnub tim 6 lub 6 hli, tau mus hwm Kas This Nkas Xus lub ntxa. Tswv Qhia Liab Xes Npas Tis Nus (Sebastian Francis) uas yog tus Tswv Qhia nyob Pis Naas tau ua thaj txi Ntuj nco txog Kas This Nkas Xus tom qab lawv mus hwm nws lub ntxa los.

Hauv cov lus nthuav ntawv Moo Zoo, Tswv Qhia Liab tau hais txog Leej Ntshiab Paj Lug cov lus uas hais rau Tis Mos Tes tias “Kuv tau sib tw khiav los txog txoj kab kawg lawm. Kuv tau txuag kev ntseeg cia, thiab txog lub caij kuv yuav tau ncaim mus lawm.” Tswv Qhia thov kom cov neeg ntseeg xav tias cov lus ntawd txhua tus tuaj yeem coj mus siv tau, tsis yog Leej Ntshiab Paj Lug tib leeg xwb. Nrog rau Kas This Nkas Xus thiab qhov kawg kuj yog peb sawv daws. 

Tswv Qhia Liab hais txog Kas Thas Nkas Xus tias “Qhov pov thawj ntawm Kas This Nkas Xus ntawd, yog tus piv txwv mus deb dua kev ntseeg, haiv neeg thiab tej kab lis kev cai.”

Hnub tim 1 lub 7 hli xyoo 2024, lub Koom Txoos Kav Tos Liv nyob Mas Les Xias tau tshais ib kauj ruam ntxiv hauv kev lees txais Kas This Nkas Xus qhov ntshiab huv. Thaum Tswv Qhia Liab Xes Npas Tis Nus tab meeg tshaj txog kev teeb tsa ua tus neeg Ntshiab thiab ua Leej Ntshiab. Tab txawm nws yuav dim ntawm tsov rog, tsis kav Kathigasu tsis tau dim ntawm nws tej kev mob uas raug nyob hauv nkuaj. Nws thiaj mus rau Aas Kiv teb, kom tau kho nws tej mob. Nws tuag hnub tim 12 lub 6 hli xyoo 1948 nyob Las Nas Tshais (Lanarkshire) Kos Les teb (Scotland). Yog thaum nws muaj 49 xyoos.

Tom qab ntawd Kas This Nkas Xus cov pob txha raug xa rov mus Mas Las Yas thiab raug faus nyob ntawm lub tsev teev Ntuj hwm Leej Ntshiab Miv Kas nyob Is Pos (Ipoh). Zim txwv no nws lub ntxa yog qhov chaw tawm rooj fiv Ntuj ntawm ib tsoom neeg ntseeg Kav Tos Liv, thiab cov tau txais lub zog txhawb siab los ntawm nws tus piv txwv. 

Hais txog cov neeg Mas Les Xias uas yog Kav Tos Liv feem coob, mas Kas This Nkas Xus yog tus tseem ceeb tshaj ib tsoom poj niam nyob hauv ntsuj tsov rog ntawd. Nws raug sau cim tseg tias yog ib tug poj niam muaj kev ntseeg ruaj khov, tsis hloov siab thaum raug kev iab hiam thiab raug tsim txom. Nws tus piv txwv tseem yog lub zog txhawb siab rau cov neeg ntseeg kev ua lub neej kom muaj peev xwm, muaj kev khuv leej thiab muaj kev ncaj ncees rau Tswv Ntuj. 

Khis Tos Fes (Christopher Kushy) tus pab Tswv Qhia Liab Xes Npas Tis Nus hais rau lub tshaj xo Radio Veritas Asia tias Kas This Nkas Xus lub neej qhia peb tias lub peev xwm uas cog nyob hauv kev ntseeg, tuaj yeem zeem tseeb tau tsis hais lub caij nyob hauv qhov tsaus ntu nti. Tom qab nws tuag yuav luag txwm 80 xyoo, mas zaj hais txog Kas This Nkas Xus yog ib zaj ntxim siab tshaj nyob hauv lub Koom Txoos Mas Les Xias cov liv xwm.