Cov kab ke hais txog dej nyob hauv lub tsev teev Ntuj qub qub nyob Mumbai, yog qhia kom cov me nyuam txawj saib xyuas hav zoov nroj tsuag thiab yam Tswv Ntuj tsim.
Cov me nyuam tuaj sib sau nyob ntawm lub qhov rooj nkag mus hauv lub tsev teev Ntuj qub qub no, uas yog txhua tus tuav ib lub khob ntawv ntim ib nta khob dej. Lawv nqa cov khob dej thiab kom lawv nco tias ; dej yog qhov paj tshab muaj nqis uas txhob cia nkim pov tseg. Dhau ntawd lawv tau ua sab mus rau hauv lub tsev teev Ntuj thiab hliv nyias khob dej rau hauv lub lauj kaub av ci uas txawb ze ntawm lub dab zeb txais lub Cim Ntxuav. Cov dej uas hliv ua ke ntawd yuav raug coj mus siv cia ua lub Cim Ntxuav nyob hauv tsev teev Ntuj. Yog lub Cim hauv kev saib xyuas hav zoov nroj tsuag nrog rau lub Cim Ntshiab uas ntxuav cov neeg ntseeg tej kev txhaum. Tus npaj cov hauj lwm no hais tias ; cov hauj lwm no tus qauv yog xav pab kom cov me nyuam txawj nco txog dej qhov muaj nqis thiab txawj txuag dej. Tus xib hwb qhia kev ntseeg tau muab dej los hliv rau cov lam hwj iav thiab lam hwj tooj dawb hloov cov lam hwj roj hmab, kom qhia txog kev muab siab rau ntawm tsev teev Ntuj hauv kev txhawb nqa kev ua thiab txuag txhua yam nyob ib puag ncig. Nicole D’Souza tus xa lus ntawm lub tsev teev Ntuj cov hauj lwm ‘Yes Xus thiab kuv’ hais tias : “Cov hauj lwm no ua kom nws nco tias ; ntau zaus uas neeg ntsia tsis pom dej qhov muaj nqis nyob hauv tej qhov chaw muaj dej ntau, tab sis lawv tsis paub tias muaj ntau lub zej zog uas tab tom tshaib dej.”
Mary Olancewaju hais tias : “Peb tau kawm thiab paub tias dej yog yam muaj nqis thiab yog Tswv Ntuj qhov paj tshab. Kev txuag dej yog kev saib xyuas hav zoov nroj tsuag yam uas Tswv Ntuj tsim thiab yog kev txuag peb lub neej yav tom ntej.” Lub tsev teev Ntuj hwm Leej Ntshiab As Nres txhim tsa nyob hauv xyoo 1575, thiab yog lub tsev teev Ntuj Kav Tos Liv uas muaj keeb kwm los ntev nyob hauv Mumbai. Ntawm cov hauj lwm no lub tsev teev Ntuj thiaj xav tias yuav muab tej kab lis kev cai ntawm cov neeg ntseeg uas muaj los ntau caum xyoo, ua kom haum nrog kev saib xyuas hauv kev txuag hav zoov nroj tsuag thiab yam uas Tswv Ntuj tsim.
