Caritas coj kev cia siab mus txog cov neeg tsis muaj vaj tse nyob los ntawm av qeeg nyob Nepal.
Caritas coj kev cia siab mus txog cov neeg tsis muaj vaj tse nyob los ntawm av qeeg nyob Nepal.
Hnub tim 5 lub 11 hlis tsaib no, cov neeg dim siav ciaj lawv tshawb nrhiav lawv tej cuab yeej cuab tam nyob hauv ib lub tsev uas av qeeg thiab pob los mus.
Lub zog av qeeg ua rau neeg tuag 154 leeg thiab raug mob ntau pua leej.
Tom qab av qeeg uas yog hnub tim 3 lub 11 hlis tsaib no, ua rau neeg tuag 154 leeg. Caritas uas yog lub Koom Haum pab neeg txom nyem ntawm lub Koom Txoos Kav Tos Liv nyob hauv lub teb chaws, lawv xav tsim tej lub chaw nyob rau cov neeg raug xwv txheej tau nyob. Lub Koom Txoos lub hom phiaj yog xav rub tej lub tsev ntaub los tsev tsam phooj rau 1,200 yim neeg kom lawv tau tsev nyob thiab txhob raug tiv no, vim av qeeg thiab huab cua no heev.
Cov tseem hwv hais tias : lawv lub zog peev nyiaj txiag muaj tsawg thiab kev ntiav tub zog kim heev. Txawm li cas kuj xij, Caritas Nepal yuav nqis tes txhim 1,200 lub tsev rau tsoom pej xeem nyob thiab maj mam txhawb nqa lawv lub neej.
Lub Koom Haum Caritas Nepal tau koom tes nrog lwm lub Koom Haum txhim kho zej zog Youth Awareness Raising Center Nepal (YARCN), kom tau txhim tej lub tsev nyob hauv cov thaj tsam av qeeg rau tsoom pej xeem nyob ib ntus.
Tej chaw nyob uas hais no, yuav siv peev nyiaj txiag qis thiab tsawg los txhim, xws li siv tej yam uas tsoom pej xeem muaj yam li ; xyoob ntoo, pob zeb, hmoov zeb sib thiab tshauv. Raws li cov xwm ntawm Dharma Raj Bhitrakoti ntawm YARCN, cov tsev uas txhim ntawd muaj 71 lub uas yuav ua tiav li 10 hnub tom ntej no.
