Vaj Qhia nthuav tias lub Moo Zoo hnub no Huab Tais Yes Xus qhia peb kom lees txais peb tus yeeb yam thiab ua siab ncaj rau Tswv Ntuj thiab ncaj ncees rau qhov nyuaj hauv peb.
Hnub tim 1 lub 10 hli ntuj 2023 ncaj rau Hnub Chiv lub Lis Piam 26 caij Nyob Nruab Xyoo, Vaj Qhia rov nthuav lub Moo Zoo rau sawv daws mloog ua ntej yuav thov Ntuj zaj tus Tshiab xa xov nyob hauv Leej Ntshiab Pob Zeb lub tshav puam, mas Vaj Qhia hais txog kev ua siab ncaj rau Tswv Ntuj tsis hais peb kev nyuaj, kev poob tsag, kev qaug zog, thiab Vaj Qhia tau ntuas sawv daws kom txhob ua neeg zoo sab nraud rau luag tej pom tias yus zoo tab sis tseeb tiag yus lub siab tsis zoo li qhov yus hais.
Lub Moo Zoo raws Mas Tais Ntawv Moo Zoo (MT 21: 28-32) piav txog ib leej txiv muaj ob tug tub, nws txib nkawd mus ua hauj lwm tom teb txiv cawv. Ib tug tub teb nws txiv tias ‘tsis mus’, tab sis nws muab xav xav ces nws mus; ib tug hais rau nws txiv tias ‘mam mus’, tab sis nws tsis mus.
Vaj Qhia pom tias thaum ib tug neeg mus ua teb mas nws yuav tsum muaj lub siab ‘fij’ nws lub sij hawm los ua daim teb. Teeb meem tsis yog kev tawm tsam leej txiv vim tsis xav mus ua teb, tab sis teeb meem yog puas muaj ‘lub siab ncaj’ rau leej txiv thiab rau nws tus kheej.
Pom tias ib tug tub ua yuam kev tab sis nws tseem muaj lub siab ncaj, ib tug tub nws dag nws txiv; tsis yog nws tsis ua xis nws txiv siab, nws tseem tsis xav nrog nws txiv tham txog txoj hauj lwm no thiab, yog li nws thiaj maj teb rau leej txiv tias ‘mam mus’. Nws hais li ntawd tsuas yog kom tau ntsej muag ntawm leej txiv, kom leej txiv pom tias nws tsis tiv leej txiv. Tab sis tseeb tiag mas nws dag leej txiv, nws tsis hwm leej txiv. Yog nws tsis xav mus ua teb, nws hais ncaj ncaj rau leej txiv tias ‘tsis mus’ mas tseem zoo dua nws tau hais lus dag leej txiv li ntawd.
Vaj Qhia hais ntxiv tias tus neeg muaj yeeb yam zoo li no, tsis yog nws muaj txhaum, tab sis yog nws siab tsis ncaj vim nws dag luag tej yam yooj yim thiab nws npog nws qhov tsis mloog lus mas nws thiaj teb li ntawd kom tas lus.
Tus tub teb ncaj ncaj rau leej txiv tias ‘tsis mus’ tab sis tom qab nws mus ua teb, mas txawm tias nws zoo tsis tas tsis kav nws tseem muaj lub siab ncaj. Nws tsis txaus siab mus tab sis nws paub lees nws tus yeeb yam ntawd. Hais tau tias nws yog neeg txhaum, tab sis nws lub siab ncaj. Tus zoo li no mas nws muaj kev vam khom tias yuav tau daws lub txim txhaum.
Tab sis ntawm tus neeg siab tsis ncaj mas nyuaj kawg nkaus, nws dag tau yam luag ntxhi, nws yog neeg zoo sab nraud, nws lub siab nkhaus, nws tsis paub qhov zoo qhov phem.
Vaj Qhia muab lus nug sawv daws saib puas tau muab yus fij rau Tswv Ntuj ua xis Tswv Ntuj siab nyiam. Sawv daws puas tau teb rau Tswv Ntuj tias ‘ua li mas’, txawm tias yuav poob sij hawm los nyiaj txiag, sawv daws puas ua siab ncaj rau Tswv Ntuj thaum raug kev nyuaj, poob tsag, los qaug zog. Sawv daws puas txaus siab tig los yuav siab tshiab thaum tau ua yuam kev. Los sawv daws tsuas xav tias kav liam, ces ua tus neeg tsis kub ntxhov txog qhov yuam kev ntawd.
Tshuav ib lo lus Vaj Qhia xav kom sawv daws rov muab nug tus kheej yog lo lus tias “Kuv puas yog tus neeg txhaum, puas muaj ib yam tsis ncaj nyob hauv kuv?”
Vaj Qhia thov niam Mab Liab tus tsom txog qhov ntshiab pab cov neeg ntseeg sawv daws kom ua tau ib tug neeg ntseeg muaj lub siab ncaj.
