Txhob tag kev cia siab, txhua yam yog kev kawm
Tus neeg dig muag uas muag qab zib (Baker), cov lus qhia txog lub neej muaj nqis rau cov tub ntxhais hluas txheej tshiab.
Phauj Nid ua siab ntev zaum tos tsheb nyob ntawm qhov chaw tos tsheb, nws lub ntsej muag luag ntxhi thiab nplhu tshiab. Nws hnav ib ce khaub ncaws luv luv kom tau ua hauj lwm nyob hauv hnub tshiab. Phauj Nid muaj 73 xyoos. Nws muag qab zib los tau 20 tawm xyoo lawm. Nws muag ib lis piam 6 hnub. Nws qhov kev kaj siab yog tau muag qab zib thiab txuag nws tus kheej kom txhob raug xwv txheej.
Phauj Nid tau kawm ntawv ntau xyoo nyob hauv lub tsev kawm ntawv uas yog cov neeg dig muag kawm, nyob hauv lub xeev Angthong thaum nws tseem yau. Lub caij nws kawm ntawv, nws lub neej txawv lwm tus me nyuam. Txij nws mus tsev kawm ntawv thiab rov los tsev, mus txog rau thaum nws pib ua hauj lwm. Chiv thawj nws pib muag lottery. Ces nws maj mam xyaum mus kev ib leeg rau ub rau no. Nws kheev kheev raug cov neeg phem ntxias ntau zaus. Xws li muaj neeg ntxais kom nws mus tej kis tsev tsaus tsaus, nws thiaj tau muag lottery. Tab sis qhov kawg nws cov lottery raug tub sab nyiag mus tas, vim nws tsis pom kev. Nws piav tsis tau tub sab tus yam ntxwv, ces tsis muaj leej twg pab tau nws. Vim li ntawd, nws thiaj hloov los muag qab zib. Yog thawj yam lag luam nws pib ua me me.
Phauj Nid ua hauj lwm sab kawg, kom tau nyiaj yug tus kheej. Tab txawm nws qhov muag tsis pom kev kuj xij, nws lub khw muag qab zig yog qhib 8 teev los 9 teev sawv ntxov. Nyob ntawm nws cov qab zib muaj neeg yuav tag qeeb los sai. Nws tsuas tau nyiaj me me xwb. Nws kheev los txog tsev 7 teev tsaus ntuj. Yog tias nws cov qab zib muag tas ntxov, mas nws kuj tau los tsev ntxov. Tab txawm nws tsis muaj neej thiab tsis muaj txheeb ze ua nws qhov chaw vam, tsis kav nws kuj tuaj yeem qhib tau ib lub tsev me me los muag qab zib. Nws muag qab zib tau 20 tawm xyoo lawm. Nws tej nyiaj tsuas txaus yug nws xwb. Txawm li ntawd tsis kav nws kuj muab siab rau ua, thiab ib hnub nws muag qab zib tag li ntawm 30 tawm kis lus. Nws muag ib nrab kis lus yog 5 npaj. Txhais tias nws muag qab zib ib hnub, nws tau li ntawm 300 txog 400 npaj.
Phauj Nid ntiav ib lub tsev me me rau nws nyob, thiab nqi vaj nqi tsev, nqi dej ib hlis yog 3,000 txog 4,000 npaj. Nws kuj tau txais nyiaj dig muag ntawm tseem hwv ib lub hlis yog 1,500 npaj. Nws hais tias nws cov nyiaj txaus rau nws siv. Nws npaj yuav ib lub tsev rau nws nyob, kom tsis txhob tau ntiav lawm. Dhau ntawm nqi vaj nqi tsev lawm, nws siv sij hawm hauv lub lis piam ua nws cov hauj lwm niaj hnub. Muaj ntau yam teeb meem uas nws ntsib, xws li muag qab zib tsis tas thiab qab zib tuaj pwm tsis zoo noj. Tej zaum kuj muaj neeg cia li nyiag nqa mus tsis them nyiaj. Txawm tias ntsib teeb meem ntau yam, tsis kav nws siab zoo. Ces nws xav tias cov neeg nyiag nws cov qab zib, tej zaum lawv tsis muaj dab tsi noj lawv thiaj nyiag. Qhov ntawd yog qhov laij thawj uas nws ib txwm xav txog zoo tas li. Phauj Nid hais tias nws tsis xav ua nra rau leej twg, vim lwm tus yuav ceeb laj mus txhua txoj kev thiab yuav meem txom nws. Thaum txog nws niam lub ntees tuag, twb tsis muaj ib tug txheeb ze tuaj tos nws mus koom lub ntees. Ces nws thiaj thov nws tej phooj ywg kom lawv tuaj tos, tab sis nws them nqi roj rau lawv thiab nws tsuas tau mus koom nws niam lub ntees ib hnub xwb. Vim nws tsis xav ua lub nra nyuab rau lwm tus xa mus xa los. Nws hais tias tej yam no thiab kev kawm yav tag, ua kom nws paub txog kev ua siab tawv. Nws ua lub neej raws lo lus tias: “Txhob tag kev cia siab, txhua yam yog kev kawm.”
Phauj Nid hais tias: “Koom roj ntsha tsis yog tias yuav zoo tas. Lwm tus uas lawv tsis khoom roj ntsha, lawv kuj ua siab zoo rau yus thiab pab yus.” Nws xav qhia rau cov hluas txheej tshiab txog ob peb yam uas tseem ceeb. Ruaj nreb hauv tus npau suav, ua siab ntev thiab ua qhov yog. Nws lub ntsej muag luag ntxhi, tsis yog tias zoo li ib yam dab tsi nyob ntawm lub ntsej muag xwb, nws yog qhov pom kev hauv nws lub siab los ntawm kev muab siab rau, kev ua siab ntev thiab coj ncaj ncees. Ruaj nreb rau kev npau suav, tsis txhob swb, thiab ua qhov zoo ncaj ncees. Muab siab rau ua hauj lwm kom tiav hauv kev qi muag. Xws li xaiv tej khaub ncaws yuav hnav, ua zaub mov noj thiab ntxuav tais diav. Cov hauj lwm no nyob hauv txhua txhia hnub, yog qhov ntxhov kawg. Tsis ntev koj yuav paub tias kev ua lub neej ntawm ib tug neeg dig muag, nws txom nyem npaum li cas. Tab sis kev dig muag kuj tsis yog qhov ua kom tib neeg ua tsis tau dab tsi. Xws li phauj Nid, nws muag qab zig los tau 20 tawm xyoo. Nws tsis cia kev dig muag los txiav nws tej kev npau suav hauv kev ua hauj lwm thiab kev nrhiav nyiaj. Tab txawm yog ib yam nyuab, tsis kav phauj Nid kuj tsis kam swb thiab muab siab rau ua tas zog.
Thaib teb muaj tsoom pej xeem 70 tawm plhom leej, thiab muaj cov neeg dig muag li ntawm 300,308 leej uas lawv xav tau kev pab txhua yam. Xws li pab txhua yam hauj lwm hauv txhua txhia hnub, kev mus kev rau txhua txhia qhov chaw, kev nyeem ntawv thiab kev sib xa xov. Cov neeg dig muag yuav tsum ntsib ntau yam kev nyuab, uas yog kev nyuab ntawm tus kheej. Vim nws muaj tej yam txaus txhawj, zoo li raug tsheb nrau los mus tsoo lwm yam. Poob nyob hauv tsis muaj kev ywj pheej, kev mus kev thiab kev txawj ntse. Tsis tas li ntawd, kuj ua kev ntxhov siab rau nws hais txog qhov muag tsis pom kev. Tsis tuaj yeem pom tej ntawv sau, tej daim phiaj qhia kev, phiaj tshaj tawm, ces tej yam no ua kom nws tsis paub tias muaj dab tsi tshwm sim nyob ib puag ncig.
Txawm li cas kuj xij, cov neeg dig muag tsis tuaj yeem pom tej ntawd tau, vim lawv tsis pom kev. Kev ua hauj lwm kuj txawv tag. Piv txwv li muaj qee yam hauj lwm cia cov neeg dig muag ua thiab nrhiav nyiaj tau, xws li ua xib hwb nyob toj siab pab lwm tus. Thiab ib txoj hauj lwm yog pab tuav xam sib tham txog cov neeg puas siab puas ntsws. Vim ntawd yog txoj hauj lwm uas mloog thiab hais lus xwb, tsis yog siv qhov muag ntsia. Kev pab cov neeg dig muag muaj ntau txoj kev, xws li pab kom cov neeg dig muag kom muaj feem cuam hauv zej zog, pab lawv thaum ntsib teeb meem thiab tsis xyeej cov neeg dig muag, vim cov neeg dig muag kuj ua tau ntau yam raws li lawv lub peev xwm. Txij thaum muaj tus kab mob COVID-19 los, ib txhia neeg nrog rau cov dig muag ua hauj lwm tsis tau. Ua rau lawv tsis muaj nyiaj yuav tau txhiam xws thiab lwm yam. Peb yuav pab cov neeg dig muag tau, nyob hauv kev pub toob xib thiab pub tej yam muaj txiaj ntsim qab hau rau lawv. Peb tuav lawv tes hla kev tsheb thaum lawv xav hla kev. Peb txhob tshem txhua yam lawv siv tsis qhia lawv paub, vim yuav ua rau lawv nrhiav nyuab. Koj puas paub tias yuav luag 90 feem pua ntawm cov neeg dig muag, tiv thaiv thiab kho tau 1,000 plhom leej nyob hauv lub ntiaj teb uas tab tom txhim kho. Li ntawd, thaum koj pab nyiaj rau cov Koom Haum pab neeg dig muag, mas yog koj tab tom pab kom tas ntiaj teb neeg pom kev.
Tam sim no kuv xav piav txog kuv tej kev paub rau nej mloog. Hauv kev mus kev uas tau kawm thiab paub, kuv tau paub txog ntau yam tshiab tshiab. Kuv tau hnov txog tej zaj tseem ceeb ntawm lwm tus neeg, ces kuv xav faib tej zaj uas tsim nyog qhuas no rau nej. Kev mus kev hauv kev kawm zaum no yog pib ntawm qhov peb pab neeg raug qhia kom paub txog ib tug kws sau hu ua PARI thawj zaug. Peb pab neeg tau nug coob leej neeg thiab muab tej yam ntxim siab ntawd sau tso tawm nyob hauv lub Website hu ua PARI los yog People’s Archive of Rural India, uas yog lub zog txhawb siab hauv kev mus kev kom paub zaj hais txog “Thaib teb yog leej twg?”
Thawj yam hauv kev mus kev, tom qab ntawd kuj muaj kev taij thov kom ua hauj lwm. Thaum Peter uas nws yog ib tug tub koom tes tseem ceeb hauv lub Website hu ua LiCas News, qhia txog lub Website thiab thov kev pab sau zaj ntawm cov me nyuam yaus. Nov yog qhov pib ntawm kev ua hauj lwm.
Theem ntxiv mus yog kev ntxig nug, uas kuv thiab cov phooj ywg tau kawm txog tus txheej txheem thiab kev xyav moo hauv kev ntxig nug, xws li lub cev ntaj ntsug. Qhov uas lub cev ntaj ntsug yog qhov ntxim siab hauv kev ntxig nug. Yog qhov ua kom kev ntxig nug mus tau zoo thiab qhov kawg yog kev xyaum. Kev kawm kom paub tej yam uas hais no, pab txhim kho tus yam ntxwv hauv kev sib tham thiab kev ruaj siab nrog lwm tus sib tham. Thaum ntxig nug kuv tau pom txog tej yam sib txawv ntawm ib tug neeg hauv nws qhov kev faib thiab ua rau kuv paub tus neeg ntawd ntau tuaj.
Dhau no lawm, ob peb lub hlis ntxiv, kuv pib kawm hais txog kev sau keeb kwm kom tau npaj sau tej tus neeg nyob hauv kuv pab neeg uas tau txais txoj hauj lwm ntxig nug. Nws muaj txiaj ntsim qab hau heev hauv kuv txoj kev xyaum sau. Ua kom kuv txawj hloov kom haum rau cov ntsiab lus uas kuv sau, sau txhua yam kom ntxaws thiab txhij txhua. Thiab lub siab qhib dav rau kev sau lwm yam. Tom qab ntawm kev kawm paub ntau ntau yam thiab npaj sau tiag tiag lawm, kuj yog hnub uas peb pab neeg raug xa tawm mus ntxig nug peb cov neeg. Chiv thawj kuv txaj muag thiab txhawj txog yam uas yuav ntxig nug, tab sis tom qab sib tham li 10 fiab, mas kev ntshai ntawm kuv pib ploj zuj zus. Thaum kuv tau hnov zaj hais txog phauj Nid, tus neeg uas peb pab neeg mus ntxig nug, nws yog ib zaj raug siab heev. Phauj Nid yog neeg siab ntev, nquag thiab ncaj ncees. Thaum phauj Nid ntsib kev txhawj xeeb, nws kheev kheev nrhiav kev ua kom yeej tas li. Nws yog lub zog txhawb siab rau kuv kom txhob swb, tab txawm nws yuav nyuab npaum cas kuj xij.
Ntawm qhov kev paub no, kuv tau paub txog ntau tus txheej txheej tshiab uas muaj txiaj ntsim qab hau hauv lub neej thiab hauv kuv cov hauj lwm yav tom ntej. Hauv peb cov zaj tau hais txog phauj Nid tej kev yeej txhua yam uas nws ntsib. Qhov no ua rau tib neeg nkag siab txog kev dig muag thiab kev txom nyem uas cov neeg dig muag tau ntsib. Kev kawm zaum no, kuv tau paub txog lub peev xwm, kev hloov tus kheej thiab txawj npaj tus kheej. Muaj peev xwm hauv kev ntxig nug tej tus neeg uas nyuam qhuav ntsib. Hloov tus kheej kom haum rau txhua yam thiab npaj tus kheej kom paub ua hauj lwm tiav raws sij hawm tau zoo. Kev kawm zaum no, kuv nkag siab thiab tau paub txog ntau yam uas kuv tsis muaj hnub hnov qab.
Ua rau kuv paub txog tus kheej tias; kuv txawj muab siab rau thiab txawj npaj tus kheej hauv kev sau zaj kom tiav raws sij hawm. Kuv kuj tau kawm kom paub txog qhov yuav tsum ua siab ruaj nreb thaum yus ntxig nug lwm tus neeg. Thaum xub thawj nws nyuab kawg, tab sis dhau ntawd kuv kuj tswm seeb thiab saib lub ntiaj teb zoo tuaj. Ces kev ntxig nug kuj yooj yim rau kuv. Kuv tau kawm txog ntau yam kev sib raug zoo, xws li kev sam hwm thiab kev ncaj ncees. Tsis tas li ntawd, kuv kuj tau txais lub zog txhawb siab los ntawm tus neeg uas kuv nug nws. Vim nws yog tus neeg siab ntev, tsis kam swb thaum nws ntsib ntau yam kev txhawj xeeb. Xws li thaum muaj neeg nyiag nws cov lottery, tsis kav nws kuj ua kom nws yeej kev txhawj xeeb no tau. Nws nyob nws ib leeg, thiab nws ua txhua yam. Kuv pom tias yog qhov nyuab kawg rau ib tug neeg dig muag uas nws nyob ib leeg. Nws ua hauj lwm hnyav heev, vim nws sawv 7 teev txhua txhua hnub. Nws tau so hnub ob xwb, vim nws yuav tsum npaj qhib nws lub khw muag qab zib.
Yav tom ntej kuv yuav ua siab ntev txhua lub sij hawm, txawm tias thaum kuv xav swb tsis kav kuv tej kev paub uas tau los hauv kev mus kev zaum no, nws muaj txiaj ntsim qab hau rau lub neej thiab yav tom ntej. Kuv yuav coj tej kev paub no mus siv kom haum rau kuv txoj kev paub yav tom ntej. Kuv yuav ua kom pom txog kev ua pej xeem zoo hauv kev luam tawm zaj no. Tib neeg yuav nco txog teeb meem ntawm cov neeg dig muag nyob Thaib teb ntau tuaj. Nyob hauv Internet muaj xov xwm hais txog kev txom nyem uas cov neeg dig muag tau ntsib, thiab tej yam raug rau lawv lub neej.
Kev mus kev zaum no ua kev paub tau zoo kawg rau kuv, kom paub txog lub ntiaj teb no ntau tuaj. Kuv yuav coj yam kuv paub mus siv hauv lub neej thiab cov hauj lwm yav tom ntej. Kuv paub tias muaj neeg coob heev nyob hauv lub ntiaj teb no, uas yuav tsum tiv thiab ua, vim lawv txoj kev dig muag muaj ntau tshaj qhov kuv paub.
