Ib tug tub zog hais tias nws yug los nyob hauv tsev neeg muaj nuj nqis thiab ntshe nws yuav tuag vim nuj nqis. Tseem yuav tseg nws cov me nyuam nyob nrog nus nqis.
4 xyoos dhau los, Masih raug nws tus tswv muab nws muag nrog cov nuj nqis rau ib tug tswv tsev av ci. Tam sim no tus neeg Kav Tos Liv uas nws muaj hnub nyoog 42 xyoos, tab tom ua hauj lwm nyob hauv qhov chaw tshiab uas yog ua av ci, nyob hauv lub nroog Faisalabad, lub xeev Punjab.
Nws tau txais nyiaj hli ib lub hlis yog 1,200 rupee los yog 4 dos las, thaum nws ci tau 1,000 daim av ci. Nws yuav tsum siv sij hawm 2 hnub thiaj ci tau 1,000 daim av. Tab sis nws tus tswv tshiab muab nws cov nyiaj hli ib nrab los them nws cov nuj nqis thiab them cov paj. Masih tau txais nqi zog tsawg heev thiab nws yuav tsum yug nws tsev neeg 6 leej. Kev ua hauj lwm ci av yog cov hauj lwm nyuab thiab ua rau nws tsev neeg yuav tsum siv sij hawm ua hauj lwm ntev heev nyob hauv ib hnub. Nws tsev neeg tseem muaj ib tug me nyuam me uas hnub nyoog tsis tau txog 5 xyoos.
Zoo li nws lub neej mag ntxiab tas ib sim neej los ntawm nuj nqis thiab kev ua qhev. Masih tsev neeg lawv nyob hauv ib lub tsev av pob pob nyob ze lub qhov cub ci av. Nws kheev kheev qiv nyiaj ntawm nws tus tswv thiab tej neeg txheeb ze uas muaj nyiaj, kom tau nyiaj los yuav txhuv noj thiab qee yam hauv lub yim neej.
Masih hais tias : tus neeg zoo li nws tshuav nuj nqis thawm niaj thawm xyoo. Thaum ntuj nag mas lub qhov cub ci av yuav tsum raug kaw ntau lub hlis, ces ua rau nws tsev neeg poob hauj lwm tsis muaj kev khwv nyiaj.
