Mias Mas teb tseem nyob rawv hauv tej tsov rog uas rhuav tshem kev lag luam. Ua rau tsoom pej xeem ntau plhom leej yuav tsum khiav tsiv teb tsaws chaw thiab kev kav tej thaj chaw sib tawg. Tab txawm muaj kev xaiv tsa zaum kawg no, tsis kav cov tseem hwv tub rog tsuas kav tau cov thaj tsam li ntawm 40 feem pua xwb. Cov tiv tseem hwv coob tshaj 20,000 leej tseem raug kaw hauv nkuaj nrog rau Oos Xas Xus Cis. Kev sib tawg hauv kev tuav riam phom ntawm cov haiv neeg, tau ua rau tsoom pej xeem tag kev cia siab thiab ris lub nra hnyav kawg.
Xav tias muaj tshaj 1 plhom 500 txhiab leej tsiv teb tsaws chaw nyob hauv lub teb chaws. Nyob pem tej toj siab muaj hoob pob caws ncig tej liaj teb thiab cov nroog me. Ua rau cov pej xeem tsis tuaj yeem rov mus hauv lawv tej zej zog tau. Qhov tseem ceeb tshaj ntawd yog lawv tej vaj tse, vim lawv tej vaj tse feem ntau raug hlawv thiab raug dav hlau tso hoob pob tua puas tsuaj tas. Raws kev tshaj tawm ntawm lub Leej Haum Kuj hauv lub caij pov ntawv xaiv tsa, mas cov tub rog Mias Mas tau siv dav hlau tua thiab pov hoob pob 408 zaug. Ua rau tsoom pej xeem tuag 170 leej thiab cov raug ntes lub caij xaiv tsa muaj kwv yees 400 leej.
Cov raug ntes vim lawv xyav moo txog kev xaiv tsa. Lub rooj ntawv xov xwm Mias Mas tshaj tias ; tsoom pej xeem raug hu kom mus sib sau nyob hauv tej nroog, hauv lub caij muaj kev sib ntaus rog nyob toj siab thiab hauv hav zoov. Tej kev sib ntaus sib tua no, ua rau Mias Mas teb rov poob qab mus li ntawm 70 xyoo.
