Tsoom pej xeem khiav coob zuj zus nyob Myanmar sab hnub poob, vim kev sib ntaus rog
Cov tub rog Myanmar raug liam tias lawv tsom ntsoov tua cov pej xeem nyob hauv lub xeev Rakhine, uas yog siv dav hlau pov hoob pob thiab xuas phom loj tua. Cov tub rog Arakan thov kom tsoom pej xeem khiav tawm hauv lub xeev Rakhine uas nyob Myanmar sab hnub poob, vim tseem hwv Myanmar cov tub rog yuav siv dav hlau tua cheb ntxuav cov haiv neeg tiv tseem hwv nyob thaj tsam ntawd sai sai no. Cov tub rog tiv tseem hwv thov kom cov pej xeem nyob hauv lub nroog Maungdaw, uas nyob ze Npees Las Des ciam teb kav tsij khiav tawm mus rau lwm qhov chaw nrug deb thiab thaj yeeb. Cov xwm no tshaj tawm hnub tim 16 lub 6 hli no.
Cov tub rog Arakan hais tias : lawv tig ntsoob rau cov yeej tub rog uas tseem tshuav nyob hauv lub nroog Maungdaw, uas yog qhov chaw nyob Los Hees Yas nyob thiab lawv feem coob yog cov Mawv Xis Lim. Ntau lub hlis dhau los uas cov tseem hwv tub rog siv lub nroog uas muaj tsoom pej xeem 80,000 leej ua qhov chaw tua cov tub rog tiv tseem hwv nyob hauv thaj tsam ntawd. Cov tub rog Arakan thov kom cov tseem hwv txhob txhob tso tub rog tua tsoom pej xeem thiab txhob hlawv lawv tej vaj tse, tej tsev kawm ntawv, tej tsev kho mob thiab tej tsev teev hawm.
Ntawv xov xwm zej zog tshaj tias : cov tub rog Arakan txeeb tau 10 lub nroog nyob hauv lub xeev Rakhine thiab Rakchin uas nyob sib ze lawm. Suav txij li thaum lawv pib ntaus rog thiab siv lub npe Paletwa, lub 11 hlis tsaib no los.
