Thaib npaj siab txhib riam phom nyob ntawm ciam teb dua, tom qab tej kev cog lus raug rhuav

Kev sib cog lus nyob thaj yeeb thiab kev xa cov tub rog Khas Phus Chas raug ntes rov qab raug ncua tseg. Yog tom qab lub hoob pob tawg thiab ua rau cov tub rog Thaib raug mob. Ua rau kev sib cog lus nyob thaj yeeb ntawm Thaib thiab Khas Phus Chas piam sij tas hauv hnub tim 11 lub 11 hlis dhau los no. Hauv kev sib cog lus tso tseg kev sib tua rog, mas muaj As Mes Lis Kas tus Txoov Tim Tswv TRAMP ua pov thawj. Xov xwm tshaj tias Thaib tau xa tsheb tua rog thiab phom loj rov mus nyob ntawm ciam teb dua, kom tau pauj lub hoob pob uas tawg thiab ua rau 4 tug tub rog Thaib raug mob. Yawg Anutin uas yog Thaib tus thawj pwm tsav hais tias : “Kev sib ntaus sib tua uas rhuav tshem kev ruaj ntseg ntawm peb lub teb chaws, tsis tau tag yooj yim li qhov peb xav.” Nws hais ntxiv tias : “Tom qab kev tshaj tawm tias ob lub teb chaws tsis muaj kev sib ntaus sib tua lawm. Hnub tim 10 lub 11 hlis no, thaum cov tub rog Thaib mus ncig saib xyuas kev ruaj ntseg raws ciam teb nyob hauv lub xeev Sisaket, mas hoob pob tau tawg thiab ua rau ib tug tub rog Thaib phab ceg tu.”

Kev sib raug zoo ntawm Thaib thiab Khas Phus Chas poob nyob hauv txoj kev phem kawg, suav txij tsov rog tiaj tus xyoo 1998 los. Tab sis lub hauv xyoo tsaib no, rov qab muaj kev kub ntxhov tshwm sim nyob ntawm ciam teb. Ces lub 7 hli xyoo no, kev kub ntxhov ntawd rais ua tsov rog raws tus ciam teb uas ntev li 817 kis los mev.

Hauv kev sib cog lus nyob thaj yeeb lub 10 hli tas los, Thaib teb ua kom pom meej tseeb tias; xav rhuav tshem kev nyiag tua neeg, kev ua luam muag neeg thiab tej chaw muaj kev tsis ncaj ncees nyob Khas Phus Chas teb tawm mus.