Cov neeg nyob txawm thaj tsam ntawd hu tias : “Pagsa-San Juan”, tab sis feem coob ib tsoom neeg paub nyob hauv lub npe “Taong Putik”. Cov neeg ntseeg xuas av nkos thiab nplooj tsawb qhuav los qhwv lawv lub cev thaum txog lub caij ua hmoov hwm Leej Ntshiab Zam Ntxuav Plig nyob hauv Bibiclat, Aliaga, thiab Nueva Ecija.
Txhua txhua xyoo hnub tim 24 lub 6 hli, lub zos Bibiclat, Aliaga thiab Nueva Ecija uas yog cov xeev nyob Fis Lis Pees qaum teb. Lawv sib koom ua hmoov hwm Leej Ntshiab Zam Ntxuav Plig.
Cov kab ke no yog lub cim hu ua “Pagsa –San Juan” los yog “Taong Putik”. Txhais tias neeg pleev av nkos. Yog cov kab ke uas cov neeg nyob cheeb tsam ntawd thiab cov neeg ncig tsham teb chaws nyiam kawg.
Cov neeg koom cov kab ke ntawd, lawv yuav sawv ntxov ntxov thaum tsis tau kaj ntug. Lawv mus pleev av nkos hauv lawv tej liaj uas nyob ze thiab xuas nplooj tsawb, nplooj ntoos qhuav los lo kom thoob ib ce. Cov kab ke no yog tshwm sim nyob hauv lub caij Xyis Pas Yas kav teb chaws thiab yog qhov nrov tshaj nyob hauv tsov rog ntiaj teb zaum ob. Thaum cov tub rog Zis Pees tuaj ntaus lawv, mas tsoom pej xeem khiav mus nkaum nyob hauv lawv cov liaj. Lawv thov Leej Ntshiab Zam Ntxuav Plig pab kom ntuj los nag loj loj, ces lawv thiaj tsis raug ntes. Thaum ntuj los nag, ces cov tub rog Zis Pees yuav tsum khiav nkaum nag. Tsoom pej xeem tawm los tiv nag dhia ua si thiab da av nkos ua lwj ua liam. Lawv mus ntxiv rau lwm lub nroog, tib co lo av li thiab nplooj ntoos puv ntia. Kom lawv tau muab tswm ciab thiab lawv tej nyiaj los cev rau Leej Ntshiab Zam Ntxuav Plig nyob hauv tsev teev Ntuj.
