Pub lawm tsis vam pauj rov qab. Give Expecting Nothing Back
Ntawv Moo Zoo hnub no, yog Yes Xus cov lus qhuab qhia nyob ntawm tshav puam raws li Lus Kas sau tseg. Li ntawd, peb thiaj tau txais cov lus qhia tseem ceeb ntawm Yes Xus. Txhais tias peb lub pob ntseg yuav ua tib zoo mloog.
Qhov uas peb nyeem hnub no nws muaj qhov tshwj xeeb heev, tsis yog tias hais txog kev ncaj ncees hauv peb lub neej xwb, nws tseem hais txog qhov tob dua ntawd uas yog Tswv Ntuj thiab. Kuv xav tham txog zaj no hauv tej qho sib txawv. Nyob hauv tiam 20 uas muaj ntau tus neeg txawj ntse xav txog yam lawv hu ua aporia uas yog paj tshab aporia hauv xeem lus Hes Laas (Greek), txhais tias qhov nyuab los yog qhov mus tsis tau ntawm paj tshab. Qhov ntawd yog yam mus tsis tau nyob hauv paj tshab tseeb tiag. Tam sim no koj yuav xav tias : “Lawv tab tom hais txog dab tsi ?”
Kuv thov hais ib qho nto npe ua piv txwv rau koj mloog. Kuv tau hnov los ntawm zej zog hais txog cov neeg txheej thaud. Muaj ib tug thawj coj uas nws ua ib rooj mov loj rau ib tug thawj coj uas yog tus nrog nws sib tw. Rooj mov ntawd yog ib rooj mov tshwj xeeb kawg, vim nws nqes peev ntau heev. Nws siv nyiaj ntau mus yuav txhiam xws noj, ntiav tej twj paj nruag lom zem thiab txhua yam uas siv rau rooj mov ntawd. Tus thawj coj uas yog tus nrog nws sib twv hais tias :
“Nws nyuam qhuav ua kom peb pom tias nws siab loj npaum li cas. Nws tsis kam swb leej twg li. Li ntawd, kuv yuav npaj ib rooj mov kom loj dua no rau nws.”
Ces nws kuj ua tau li ntawd tiag. Nws siv nyiaj ntau dua thiab ua kev lom zem ntau dua. Ces thawj tug thawj coj hais tias : “Kuv tsis kam swb leej twg, kuv yuav npaj ib rooj mov loj dua no rau nws thiab.” Ces cov hauj lwm ntawd muaj ntxiv tas zog, mus txog thaum 2 tug thawj coj pluag tas. Vim kev sib tw hauv kev pub paj tshab sib pauj thiaj ua rau qhov kawg nkawd lub neej pluag piam sij tas.
Raws kev xav, puas mus tau hais txog qhov yuav pub paj tshab tiag tiag. Txhais tias tsis muaj kev sib pauj dab tsi. Yuav pub dawb paug raws qhov yus ua tau, thiab yuav tsis vam txog dab tsi rov qab. Los yog peb kheev kheev pom tias peb nyob hauv txoj kev sib pauj no tas li ? Li ntawd, kuv pub rau koj thiab koj tsis kam lees txais, vim nws yog paj tshab. Koj yuav xav tias yuav tsum pauj rov qab. Yuav xav txog lo lus ua tsaug, yog tias koj tau txais paj tshab thiab koj hais tias : “Qhov paj tshab no zoo kawg.” Yog kev zoo siab muab pub, ces koj yuav tsis sau ib lo lus ua tsaug rov qab lod ? Hais ncaj tias tus neeg pub paj tshab, nws puas sov siab ? Nws yuav xav tias kuv pub paj tshab mus, kuv tsis tau txais ib lo lus ntawm koj. Feem coob tus neeg pub paj tshab yuav me siab, vim nws tsis hnov ib lo lus ua tsaug rov rau nws. Xav tias koj tau ntsib tau pom nyob hauv koj lub neej xws li ; txwm hnub yug los yog muaj tej yam tseem ceeb rau koj, muaj neeg muab paj tshab thiab koj tau txais tej lub hnav ntawv muaj nyiaj nyob hauv. Koj yuav hais lus ua tsaug rau qhov paj tshab ntawd. Thiab ntawd yog qhov paj tshab tsis tseeb uas mus tsis tau, vim peb nyob hauv kev sib pauj thiab sib vam tas li.
Kuv xav hais txog ib qho piv txwv ntawm qhov kuv tau ntsib. Tswv Qhia George nyuam qhuav tuaj txog Chicago thiab nws mus koom lub thaj txi Ntuj txwm 100 xyoo nyob hauv ib lub tsev teev Ntuj. Nws nyuam qhuav tuaj txog ntawd tau 6 lub hlis nyob hauv lub Cheeb Koom Txoos. Li ntawd, nws thiaj tsis paub thaj chaw ntawd zoo. Nws ua thaj txi Ntuj thiab thaum xaus lub thaj txi Ntuj, nws ua sawv daws tsaug. Tab sis nws tsis nco qab ob peb tus neeg uas lawv muab siab rau txhawb nqa lub tsev teev Ntuj, ces lawv chim rau qhov Tswv Qhia tsis ua lawv tsaug. Kuv xav tias xyov yuav zoo li cas, yog tias koj xav tias kev muaj feem cuam ntawm koj yog qhov paj tshab dawb huv, thiab koj tsis tau vam txog dab tsi los pauj. Nov yog aporia los yog kev ntshaw. Tab sis koj yuav xav txog yam Tswv Ntuj pub. Li ntawd, sim xav txog Tswv Ntuj qhov paj tshab seb, nws yog thawj lo lus nyob hauv Ntawv Ntshiab. Tswv Ntuj pub kev muaj sia rau lub ntiaj teb, Tswv Ntuj yog tus tsim lub ntiaj teb, Tswv Ntuj pub qhov paj tshab cog lus rau nws haiv neeg. Tswv Ntuj pub qhov paj tshab ntawm nws Leej Tub twm zeej nqes los ua neeg. Tswv Ntuj pub paj tshab tas mus li. Leej Ntuj Plig Ntshiab hu ua Donum Dei qhov paj tshab ntawm Tswv Ntuj.
Tam sim no sim saib seb, Tswv Ntuj tab tom nrhiav dab tsi nyob hauv yam no ? Tswv Ntuj tau dab tsi nyob hauv txhua yam no ? Peb pub paj tshab tas mus li, vim peb xav tau yam los pauj. Tab sis Tswv Ntuj yog tus Tswv Ntuj zoo txhij zoo txhua, Tswv Ntuj tsis xav tau dab tsi. Tswv Ntuj tsis tau nrhiav txiaj ntsim dab tsi hauv yam Tswv Ntuj tau pub. Li ntawd, Tswv Ntuj tib leeg xwb thiaj yog tus pub tau qhov paj tshab tseeb tiag. Peb rov los hais dua ib zaug, cov neeg ntseeg yog leej twg ? Yog cov neeg zoo, cov neeg ncaj ncees. Cov neeg zoo uas muaj lub siab zoo me me xwb txaus lawm.
Paj Lug hais tias : “Tsis yog kuv muaj txoj sia nyob, tab sis yog Yes Xus muaj txoj sia nyob hauv kuv.” Cov thawj coj hauv cov neeg ntseeg hais rov mus rov los tias :
“Deus fit homo ut homo fieret Deus.” Qhov ntawd txhais tias Tswv Ntuj rais los ua neeg, kom neeg tau rais ua Tswv Ntuj. Yog hais txog cov muaj feem cuam hauv txhua yam Ntuj tsim. Tam sim no peb pib nkag siab tias ; cov neeg ntseeg tsim nyog cia Yes Xus nkag los nyob hauv lawv lub neej, kom lawv tau ua raws Yes Xus tus piv txwv.
Yes Xus muaj txoj sia nyob hauv peb, ua kom peb ua lub neej mus raws nws tus piv txwv. Nyob hauv Mas Tais cov lus qhuab qhia : “Yog ua tus neeg zoo txhij zoo txhua, xws li Leej Txiv tus nyob saum Ntuj zoo txhij zoo txhua.” Yog Yes Xus nyob hauv peb, peb kuj yuav coj tus yam ntxwv xws li Yes Xus. Kev pub dawb thiab tsis vam pauj rov qab, kev pub uas tsis muaj qhov sib pauj, kev pub uas tsis vam txog lwm yam los ntawm peb txoj kev pub, thiaj yog kev pub tiag tiag.
Kuv hais ntau zaus txog qhov Tos Mas hais tias : “Kev nyiam yog kev xav yam zoo rau lwm tus.” Kuv tsis tau ua qee yam kom kuv tau txais qee yam ntawm koj. Kuv nyiam koj thiab kuv xav tau yam uas muaj txiaj ntsim qab hau rau koj. Tas txhua yam no yog qhov coj peb mus nyeem kab lus tseem ceeb no, thov koj muab phau Ntawv Ntshiab tawm los thiab saib Lus Kas zaj 6. Koj yuav nrhiav kab lus no, thaum koj xav txog txhua yam peb tab tom hais no.
Thov mloog Yes Xus cov lus : “Koj yuav nyiam koj tus yeeb ncuab, koj yuav ua zoo rau tus neeg ntxub koj. Koj yuav foom hmoov zoo rau tus foom phem rau koj, koj yuav thov Ntuj rau tus ua tsis zoo rau koj.” Los yog koj yuav muab koj txoj kev nyiam kev hlub mus rau cov neeg koj tsis xav tau kev pauj los ntawm lawv, cov ntxub koj thiab tus ntxub koj. Cov foom koj yuav tsis pauj rau koj. Lawv tsis muaj dab tsi pauj rau koj, tsis kav koj yuav foom hmoov zoo rau lawv. Yuav thov Ntuj rau leej twg ? Thov Ntuj rau cov ua tsis zoo rau koj, vim lawv tsis nyiam koj. Lawv tsis thov Ntuj rau koj, tab sis koj yuav thov Ntuj rau lawv. Yes Xus hais ntxiv tias
: “Yuav muab rau txhua tus uas lawv taij koj. Tus muab yam uas yog koj li mus lawm, koj txhob taij rov qab.”
Muab rau txhua tus uas lawv taij thov koj. Koj yuav muab rau leej twg ? Koj yuav xav tias koj muab rau tus no, vim koj xav tau tej yam dab tsi los ntawm nws. Los yog tej zaum koj yuav tsis muab rau txhua tus, vim lawv pauj rov rau koj thiab tsis pauj.
Yes Xus hais tias : “Yog tias koj hlub tus uas hlub koj xwb, yuav zoo dab tsi rau koj ? Tab txawm cov neeg muaj txhaum, lawv kuj txawj nyiam cov neeg hlub lawv. Yog koj ua zoo rau tus neeg ua zoo rau koj, koj yuav tau qhov zoo li cas ? Cov neeg txhaum kuj ua ib yam li ntawd.” Koj puas pom tias lawv tab tom ua dab tsi ?
Thaum peb hais txog cov neeg muaj txhaum, Yes Xus tab tom coj peb mus rau qhov kuv hais txog. Yog qhov chaw uas peb feem coob ua lub neej nyob nrog tas li. Ib sab tes ntxuav lwm sab tes. Kuv pub rau koj, vim kuv xav tau kev pauj rov qab. Nov yog lub ntuj uas muaj kev sib pauv thiab kev vam. Txhob ua li ntawd, vim koj raug teeb tseg nyob hauv txoj kev hlub li Tswv Ntuj hlub. Cov neeg txhaum nyiam tus uas hlub lawv, ces koj tsis xav ua kom tau tshaj cov neeg txhaum lod ? Koj yog tus neeg tshiab, koj tsis yog tus neeg qub uas muab kho kom zoo tuaj. Koj yog tus neeg tshiab, koj raug ua kom koom nrog Yes Xus. Li ntawd, koj tsis ua lub neej xws li cov neeg muaj txhaum xwb, koj yuav ua lub neej txawv. Yog tias koj txais nyiaj rau tus neeg uas koj xav tias koj yuav tau kev pauj rov qab, mas yuav zoo dab tsi ? Tab txawm cov neeg muaj txhaum, lawv kuj rov sib qiv lawv thiab tau txais npaum li qhov qub.
Yog koj nyob hauv txheej neeg qub qub, koj yuav hlub li cas ? Tswv Ntuj yog tus ua kom lub hnub ziab rau cov neeg phem thiab neeg zoo. Nws ua kom nag los ywg cov neeg phem thiab neeg zoo huv si. Tswv Ntuj zoo li lub hnub, ziab mus rau Leej Ntshiab Tes Les Xas thiab ziab rau cov neeg muaj txhaum, cov neeg phem. Qhov ntawd yog qhov tsim nyog peb ua raws.
Peb yuav los mloog lo lus xaus ua ke. Kuv ib txwm hais nyob hauv Mas Tais thiab Lus Kas ntawv Moo Zoo. Yog lo lus tob tshaj nyob hauv cov lus qhuab qhia : “Koj yuav nyiam koj cov yeeb ncuab thiab ua zoo rau lawv. Koj qiv nyiaj koj txhob vam luag pauj rau koj. Cia Leej Txiv tus nyob saum Ntuj mam ua tus pauj rau koj.”
Nej cov uas mloog kuv tam sim no, nej yog cov tau txais lub Cim Ntxuav lawm, Yes Xus muaj txoj sia nyob hauv nej. Kuv thov hais kom nej nco tias zaj no yog qhov tseeb. Yes Xus muaj txoj sia nyob hauv koj, koj thiaj tau txais kev npaj siab uas yuav sib nyiam sib hlub raws kev ntshiab huv. Qhov ntawd yog kev ua lub neej nyob hauv lub ntiaj teb tshiab thiab ua tus neeg tshiab.
Kwv tij Hmoob sawv daws ! Hnub no peb tham txog kev pub rau luag tej, yuav tsis vam txog kev pauj rov qab los xaus li no xwb. Feem ntau peb ua neeg nyob, sawv daws yeej xav tias yog yus pub rau luag lawm, ib hnub twg luag yeej yuav rov pauj rau yus.
Yog peb pub rau luag lawm, peb tsis tos luag pauj rov qab, peb yuav tshuav dab tsi ? Thov peb txhob xav li ntawd, peb yuav xav tias yog peb pub rau luag lawm, ces yuav muaj tus pub rau peb. Tus pub rau peb yog leej twg ? Tus pub rau peb yog Leej Txiv tus nyob siab, nws yog Tswv Ntuj.
Thov Huab Tais Yes Xus Pleev lub txiaj ntsim nrog nej nyob, ua nej siab kaj lug !
Lwm zaus peb mam sib ntsib dua, nej sawv daws nyob zoo !
