Muaj qee yam tshwm sim. Something Happened
Peb los txog hauv lub Caij Hla lawm, yog qhov kawg nkaus nyob hauv lub xyoo teev Ntuj tsuj xeeb Yes Xus sawv rov los. Yog yam uas cov kws txawj ntse txhua tus puav leej muaj thiab paub txog. Kuv xav qhia tias : cov kws txawj ntse txheej thaud thiab txheej tshiab muaj qhov sib txawv uas txaus luag. Lawv tab tom hais txog lub tswv yim siab siab. Lawv nyob hauv lub voj kev xav uas ntsiag to hauv kev txawj ntse. Kuv nco tau tias ntau xyoo dhau los, thaum kuv tseem yog tub kawm ntawv nyob Paris. Qhov chaw uas kuv nyiam mus tshaj, yog nyob nram qab tsev kawm ntawv Notre Dame uas nyob ze ntug dej Seine. Kuv kheev kheev mus zaum pheeb nyob ntawm phab ntsa thiab kuv nqa ntawv nrog nraim kuv tas li. Kuv nyiam nyeem cov neeg no lawv tej hauj lwm. Tej zaum kuv nyeem cov kws txawj ntse lawv cov hauj lwm los yog cov kws kev ntseeg txheej siab.
Kuv saib mus rau saum lub tsev kawm ntawv Notre Dame qhov zoo zoo nkauj hauv fab ntsuj plig uas pheej xav thiab nyob ntsiag to. Nws muaj tas txhua yam ntawd thiab lub Moo Zoo. Kuv xav kom peb pom qhov txawv txav nyob hauv kev ua tib zoo xav ntawm kev txawj ntse. Nws yog qhov zoo nkauj heev thiab yog lub Moo Zoo.
Lub Moo Zoo yog Tswv Ntuj tej txuj ci, yog kev txhais lub ntsiab lus ntawm lo lus euangelion. Yog xov xwm zoo, yog tam sim no, yog Khoov Fum Txws, yog Aristotle, yog Plato, yog Aquinas thiab yog Anselm. Lawv yog tas txhua yam uas ntxim siab thiab zoo heev. Nws muaj lub tswv yim tob, tab sis tsis yog xov xwm tshiab pes tsawg. Tsis yog zoo li lo lus koj hais tias : “Cia kuv piav rau koj mloog me ntsis, vim muaj qee yam tshwm sim.” Tab sis nws muaj lub Moo Zoo uas txhawb dej siab rau cov kws txawj ntse. Yog lawm, nws tab tom ua lub zog txhawb siab rau cov xib hwb fab ntsuj plig. Ntawd yog qhov tseeb tiag thiab hauv lub ntsiab tseeb tiag lawv tsis yog rov xav kev txawj ntse hauv kev xyuam xim. Nws yog kev theej xov xwm tau sai thiab muaj qee yam tshwm sim, ces kuv xav kom koj paub txog zaj no.
Tam sim no thaum ua tib zoo xav txog zaj ntawd lawm, peb yuav los saib thawj zaj nyeem nyob hauv hnub no uas yog Pob Zeb cov lus nyob hauv Cov Hauv Paus Xa Lus tej hauj lwm. Nws hais li no : “Nej puas paub tias muaj dab tsi tshwm sim nyob Yus Das teb ? Hauv lub xeev Nkas Lis Lais uas Zam Ntxuav Plig tshaj ?”
Li ntawd, Pob Zeb tsis tau hais txog qhov tsis muaj lub cev ntaj ntsug, tab sis yog qhov muaj tseeb tiag. Nws tsis tau piav dab neeg, nws tab tom hais tias : “Nej puas hnov yam uas tshwm sim ? Kuv yuav piav txog tus Yes Xus no rau nej mloog.” Ces tsim nyog koj yuav hais tias koj nco tau. Nws hais ntxiv tias : “Tswv Ntuj pleev Yes Xus Nas Xas Les nyob hauv Leej Ntuj Plig Ntshiab.” Tej zaum koj tau hnov dua, los tej zaum koj tau pom dua Yes Xus lawm. Ces kuv xav piav rau koj mloog hais txog Yes Xus. Tswv Ntuj tau tsa tus txiv neej no sawv nyob hauv hnub 3, tom qab peb tus nom muab nws tua. Ntawd yog zaj hais txog Yes Xus yog tus qhuab qhia thiab koj tau hnov hais txog nws lawm. Peb tus nom muab nws tua thiab xaus rau qhov tu siab heev.
Tsis yog ! Zaj no nyuam qhuav pib xwb, vim Tswv Ntuj ua kom Yes Xus sawv hauv cov tuag rov los. Nov yog zaj hais txog kev tuag thiab kev sawv rov los. Tsis txhob xav ntau, vim ntawd tsis yog qhov Tswv Ntuj tab tom ua. Tswv Ntuj tab tom hais txog tus Yes Xus uas koj paub. Tej zaum nej twb tau hnov hais txog Yes Xus thiab paub nws lawm, tab sis muaj qee yam tshwm sim rau nws. Kab lus no txawm tias yuav rov pom nyob hauv txhua lub Caij Hla, tsis kav kuj ua rau ua pa tsis tawm.
Yes Xus hais tias : “Nws yees tawm tuaj rau peb, kom peb tau noj tau haus nrog nws tom qab nws sawv hauv cov tuag rov los.” Muaj ib qho tshwm sim hauv Hnub Chiv Hla, yog kev sawv hauv cov tuag rov los ntawm Yes Xus.
Tam sim no vim cov kev xav ntawd, kuv thiaj xav muab qhov ntawd los ua kev npaj siab rau peb zaj ntawv Moo Zoo. Uas yog Zam ntawv Moo Zoo hais txog Yes Xus sawv rov los. Nov yog qhov txhib kuv lub siab thiab kuv yeej tau nyeem zaj no, nthuav zaj no los ntau xyoo lawm. Tab sis yam uas ua rau kuv npaj siab zaum kawg no, yog muaj qhov khiav npaum cas nyob hauv zaj no ? Mab Liab Mas Ntas Las khiav mus cuag cov Thwj Tim, ces Pob Zeb thiab Zam nkawd thiaj khiav mus saib lub ntxa. Qhov tiag muaj ntawv sau tias Zam khiav nrawm dua Pob Zeb. Muaj qhov khiav tshwm sim nyob hauv zaj no. Khiav, vim li cas neeg thiaj khiav ? Lawv khiav vim yog muaj qee yam yuav hais qhia koj thiab muaj qee yam tshwm sim sai sai.
Yog tias tam sim ntawd kuv khiav tawm ntawm kem tsev ua hauj lwm tawm mus, mas luag tej yuav hais tias : “Heb ! Yog muaj dab tsi tshwm sim rau nws ?”
Lawv khiav vim lawv muaj dab tsi yuav hais yuav qhia.
Li ntawd, peb yuav saib tam sim no seb zaj no yuav xaus li cas ? Hnub Chiv Mab Liab Mas Ntas Las mus ntawm lub ntxa. Kuv nyiam txhua yam nyob hauv zaj no. Nws ua kom peb paub tseeb txog qee yam uas peb nco tau. Thaum koj piav zaj no yog koj tab tom piav txog yam uas tshwm sim rau koj pom, ces koj yuav piav tau meej txog zaj no. Mab Liab Mas Ntas Las mus ntxov ntxov thiab nws mus dab tsi ? Thaum ntawd tseem ntxov heev thiab lub ntuj tsis tau kaj, nws mus ntawm lub ntxa kom tau hawm. Tej zaum kuj yog nws xav quaj. Nws pib nco tias Yes Xus muaj nuj nqis rau nws li cas. Nws mus thiab nws ntsib dab tsi ? Nws pom daim txiag zeb qhib, lub pob zeb loj loj uas lawv dov los npog lub qhov tsua nws txav lawm. Leej twg yog tus tshem lub pob zeb ntawd los lub pob zeb ntawd ntog tau li cas ? Nws muaj qee yam tshwm sim nyob nov thiab nws khiav. Peb pom tias cov neeg sawv daws khiav. Kuv kuj nyiam khiav thaum kuv tseem me yaus, tab sis nyem no tsis tshuav khiav lawm. Thaum koj muaj hnub nyoog, koj yuav tsis khiav lawm. Cov neeg no lawv hnub nyoog pes tsawg ne ? Peb xav tias Pob Zeb, mas nws tuag thaum muaj 64 xyoos. Ces xav tias lub caij ntawd Pob Zeb lub hnub nyoog tej zaum yog 60 xyoo ntau me ntsis. Txhais tias Pob Zeb yog muaj 30 xyoo. Peb puas xav tias Pob Zeb yog li ntawd tiag ? Hos Zam hnub nyoog me dua, ces tej zaum nws muaj 20 xyoo ntau me ntsis. Thaum Mab Liab Mas Ntas Las khiav ntawd, tej zaum nws muaj 20 xyoo ntau. Nws khiav mus hais qhia lawv tias : “Muaj neeg coj Huab Tais mus lawm.”
Ces Pob Zeb thiab Zam nkawd thiaj khiav mus saib lub ntxa.
Qhov tias Zam khiav nrawm dua Pob Zeb, vim Zam lub hnub nyoog yau dua thiab tsis yog qhov txawv. Tej yam no muaj feem ua kom Graham Greene hloov siab tig los ntseeg. Koj paub zoo txog tus kws sau dab neeg uas nws yog neeg Aas Kiv thiab hloov siab tig los ntseeg. Nws hais tias muaj ib yam tshwm sim nyob hauv zaj no thiab nws yog kuj zaj no. Vim nws lub zeem muag ua kws sau dab neeg ua kom nws pom txog qhov tseeb tias : vim li cas lawv thiaj yuav tsum nco zaj no. Yog tias lawv muab tej zaj muaj hwj chim, tej zaj lawv lam xav thiab tej zaj lawv lam sau los hais, mas lawv kuj yuav nco tsis tau. Lawv yuav tsis muab cov zaj ntawd sau ntxiv rau zaj no. Qhov lawv sau ntxiv rau, vim yog qhov lawv nco tau meej thiab lawv tau pom. Lawv xub khiav mus txog ua ntej Zam, tab sis lawv tos. Tom qab ntawd Pob Zeb kuj khiav mus txog thiab. Lawv saib thiab Mab Liab Mas Ntas Las pom tias daim txiag zeb tshem tawm lawm. Thaum lawv saib hauv lub qhov ntxa, mas lawv pom dab tsi ? Lawv pom Yes Xus lub Cev ploj lawm, tab sis daim ntaub qhwv tuag tseem nyob. Nws txawv qhov tias yog muaj neeg nyiag Yes Xus lub Cev mus lawm, ua cas lawv ho muaj sij hawm los hle daim ntaub qhwv tuag thiab. Lawv tsis kwv hlo lub cev uas muaj ntaub qhwv zoo zoo mus lod ? Yog muaj neeg nyiag, mas lawv yuav khiav tawm ntawm qhov chaw ntawd mus kom sai, thiab lawv yuav tsis hle daim ntaub qhwv tuag cia.
Li ntawd, daim ntaub qhwv tuag thiaj nyob ntawd. Yam ob uas txawv, yog qhov tias lawv muab txhua yam tso tau zoo heev. Daim ntaub qhwv Yes Xus taub hau kuj kauv cia zoo heev. Txhais tias nws nyob nws qhov chaw qub. Yog muaj neeg nyiag Yes Xus lub Cev tuag, ua cas lawv ho muaj sij hawm los tais tej ntaub ntawd cia kom zoo zoo. Tej yam no ua rau peb xav tias, yog muaj qee yam tshwm sim. Muaj tej yam txawv tshwm sim nyob hauv lub qhov ntxa no.
Kev ntseeg ntawm kev sawv rov los, yog pib nyob hauv lub sij hawm poob siab no. Thaum lawv xav tias kev tuag tsis muaj lo lus teb, cov raws Yes Xus uas nyiam Yes Xus, lawv yog Yes Xus phooj ywg. Lawv xav tsis thoob rau Yes Xus. Lawv ntseeg tias Yes Xus yog cov His Xas Lais tus Mes Xias. Tab sis kev tuag nyob saum Ntoo Cuam, rhuav tshem lawv tej kev cia siab. Nej nco puas tau zaj hais txog txoj kev mus Es Mas Ws ? Lawv xav tias Yes Xus yog tus neeg ntawd. Tab sis Yes Xus txoj kev tuag nyob saum Ntoo Cuam, yog raug His Xas Lais cov yeeb ncuab tua. Yes Xus tsis tuaj yeem yog Mes Xias tau. Tsis yog peb tu siab txog Yes Xus xwb, peb tseem tu siab txog peb txoj kev ntseeg uas ploj mus thiab. Peb tab tom tu siab txog qhov tseeb uas peb nkim lub neej mus dawb dawb. Peb tu siab vim peb mob siab thiab tag kev cia siab rau txhua yam uas tshwm sim. Thaum Zam saib mus hauv thiab nws pom lub qhov ntxa khoob, mas nws pib ntseeg tias muaj neeg tawm hauv lub qhov ntxa los lawm, vim Tswv Ntuj txoj kev nyiam kev hlub. Ces sawv daws muaj zog ntau dua kev tuag. Tswv Ntuj txoj kev nyiam kev hlub thiab nws txoj kev khuv leej, muaj zog dua kev tuag. Txhais tias peb tau los txog qhov tseeb ntawm txoj kev ntseeg hauv lub Caij Hla lawm. Txhais tias peb txoj kev ntseeg raug teeb dua tshiab. Txhais tias lub ntiaj teb ntxeev nphau thiab muaj neeg ntxeev siab raws tus txwm ntawv ntxeev nphau. Ntxeev nphau hauv kev tas kev cia siab. Tam sim no peb nyob hauv lub ntiaj teb tshiab. Ces yog qhov peb yuav nkag siab txog thawj pab neeg ntseeg thiab lawv cov xov xwm. Lawv tsis zoo li Khoov Fum Txws cov thwj tim, los Plato cov thwj tim uas hais tias: “Cia kuv piav rau koj mloog hais txog txoj kev ntseeg tshiab no. Nws tsis yog tsuag plig zoo li ntawd.” Lawv hais rau koj tias lub ntiaj teb tau hloov mus lawm, thiab ntawd yog hu ua kev tshaj lub Moo Zoo. Kev tshaj lub Moo Zoo, lub Moo Zoo muaj qee yam tshwm sim. Nyem no, txog sij hawm lawm uas peb txhua tus yuav tawm mus thoob ntiaj teb nrog lo lus loj ntawd.
Kwv tij Hmoob sawv daws! Hnub no peb tham txog muaj qee yam tshwm sim los xaus li no xwb. Thov Huab Tais Yes Xus Pleev lub txiaj ntsim nrog nej nyob, ua nej siab kaj lug! Lwm zaus peb mam sib ntsib dua, nej sawv daws nyob zoo!
