Khas Phus Chas cov tsev kawm ntawv nyob ntawm ciam teb rov qab qhib dua, tom qab kev kub ntxhov xoob lawm
Qhov ntsiag to hauv Khas Phus Chas lub xeev npuas ciam teb los yuav luag 1 lub hlis, mas cov tswb hauv cov tsev kawm ntawv thiab cov me nyuam lub suab luag rov qab nrov. Hnub tim 5 lub 1 hlis no lub pwm tsav fab kev kawm, cov tub ntxhais hluas thiab cov tub ncaws pob Khas Phus Chas tau rov qab qhib cov tsev kawm ntawv dua nyob thoob plaws hauv lub xeev Banteay Meanchey uas nyob npuas ciam teb Thaib.
Kev qhib cov tsev kawm ntawv yog tom qab kev kub ntxhov ntawm Thaib thiab Khas Phus Chas rov xoob. Ua ntej no mas kev sib ntaus sib tua tau ua rau cov tsev kawm ntawv raug kaw tas. Txij hnub tim 7 txog hnub tim 27 lub 12 hlis tsaib no, mas cov tsev kawm ntawv raug kaw tseg 1,311 lub. Kev kaw tsev kawm ntawv ua kev kub ntxhov rau cov me nyuam kawm ntawv 322,000 leej thiab 15,000 tus xib hwb qhia ntawv. Yog qhov ua rau cov tub ntxhais hluas tsis tau kev nrhiav kev kawm ntxiv.
Tab txawm tias kev sib cog lus ntawm tseem hwv Thaib thiab tseem hwv Khas Phus Chas nyob hauv hnub tim 27 lub 12 hlis tag los, yog qhov ua rau cov tsev kawm ntawv rov qab qhib, tsis kav kev thaj yeeb kuj tseem yog qhov tsis tso siab. Hauv cov lus no cov tub rog Thaib hais tias ; tab txawm tias zam tau kev sib ntaus sib tua lawm, tsis kav cov tub rog tseem nyob rawv hauv tej yeej tub rog thiab tau txais kev txhawb nqa tas mus li, zoo li ob tog npaj txhij yuav rov sib ntaus rog.
