Cov neeg Fis Lis Pees, cov neeg Suav, cov neeg Is Ntias thiab lwm cov neeg thoj nam txhawj xeeb txog kev raug ntiab tawm, yog tias TRAMP rov qab los ua Txoov Tim Tswv

Cov neeg As Xias ntau pua txhiab leej txhawj xeeb txog qhov lawv raug ntiab tawm As Mes Lis Kas teb nrog rau cov neeg Latin American. Tseem hwv Fis Lis Pees npaj siab pab cov neeg thoj nam Fis Lis Pees 370,000 leej. Cov neeg Is Ntias yog cov thov ua neeg thoj nam coob tshaj plaws thiab cov neeg Suav.

Lub pwm tsav tub zog neeg Fis Lis Pees tshaj txog kev pab cov neeg Fis Lis Pees uas tsis muaj ntaub ntawv li 370,000 leej uas nyob As Mes Lis Kas teb. Tej zaum lawv yuav raug ntiab tawm tom qab kev xaiv tsa ntawm TRAMP.

Xyoo 2014 txog 2024 muaj cov neeg Fis Lis Pees raug ntiab tawm ntawm As Mes Lis Kas teb li ntawm 10,000 leej. Txhais tias ib xyoos yog 1,000 leej. Xyoo 2017 txog 2021 uas yog TRAMP thawj zaug ua Txoov Tim Tswv twb muaj cov neeg Fis Lis Pees raug ntiab tawm 3,500 leej lawm. Cov neeg thoj nam coob tshaj ib nrab yog neeg Is Ntias thiab neeg Suav. Ntxiv los yog neeg Fis Lis Pees, neeg Kos Lim Naj, neeg Nyab Laj, neeg Pas Kis Taas, neeg Nes Pas, neeg Thaib, neeg As Kas Nis Taas thiab neeg Npees Las Des. Xyoo 2023 thiab 2024, muaj cov neeg Is Ntias 1,100 leej raug ntiab tawm As Mes Lis Kas teb. Tas cov neeg Is Ntias uas tsis muaj ntaub ntawv nyob As Mes Lis Kas xyoo 2022 yog 725,000 leej. Txij lub caij nplooj ntoos zeeg xyoo 2023 txog lub caij nplooj ntoos hlav xyoo 2024, muaj cov neeg Suav ua thoj nam li ntawm 56,000 leej khiav mus rau As Mes Lis Kas. Xyoo 2022 muaj cov neeg Suav uas tsis muaj ntaub ntawv nyob As Mes Lis Kas teb li ntawm 375,000 leej. Tus zauv no tej zaum yuav nce siab tshaj no thiab, vim kev lag luam nyob Suav teb tab tom poob qis tsis ntev los no.