Cov khaub ncaws qub muaj ntau tuaj, ces ua kev kub ntxhov ntxiv rau txhua yam nyob ib puag ncig nyob Pas Kis Taas teb

Pas Kis Taas teb tseem muaj kev khaws khib nyiab tsis zoo ua ntu zus. Muaj cov khib nyiab los ntawm tej ntaub ntos ze ntawm 270,000 ton nyob hauv txhua txhua xyoo. Kev txom nyem thiab nyiaj tsis muaj nqis, tab tom ua rau cov neeg Pas Kis Taas ntau plhom leej tig mus siv tej khaub ncaws qub. Xyoo 2021, cov teb chaws Aws Los Pas xa cov khaub ncaws qub mus muag thoob ntiaj teb ze ntawm 1 plhom 400 txhiab tons. Kev ua luam muag khaub ncaws qub loj hlob sai kawg nyob Pas Kis Taas teb, thiab ua kev txhawj xeeb hais txog teeb meem txhua yam nyob ib puag ncig uas yuav tshwm sim. Txhua txhia hnub muaj cov khaub ncaws qub tuaj ntawm Aws Los Pas teb, Aas Kiv teb, As Mes Lis Kas teb thiab lwm cov teb chaws nyob sab hnub poob. Cov khaub ncaws ntawd tuaj txog hauv lub tuam tsev xa tawm nyob Karachi's. 

Cov khaub ncaws no raug xa mus rau txhua txhia lub tuam tsev, xws li Silver Denim uas muaj neeg xaiv cov khaub ncaws zoo thiab tsis zoo tawm. Kom tau coj mus ua dua tshiab thiab xa tawm mus rau cov khw nyob Africa thiab nyob thoob Pas Kis Taas teb.